ការថតរូបអនុស្សាវរីយរវាងថ្នាក់ដឹកនាំ CDC ជាមួយប្រតិភូចិន។ CDC
កម្ពុជា រំពឹងថាគណៈប្រតិភូការិយាល័យទីប្រឹក្សានៃក្រុមប្រឹក្សារដ្ឋសាធារណរដ្ឋប្រជាមានិតចិន នឹងជួយពាំនាំព័ត៌មានល្អៗពីបរិយាកាសវិនិយោគផ្ទាល់នៅកម្ពុជាទៅកាន់ថ្នាក់ដឹកនាំ និងសហគមន៍ធុរកិច្ចនៅប្រទេសចិន ដើម្បីជំរុញឱ្យវិនិយោគិនចិនចូលមកវិនិយោគនៅកម្ពុជាកាន់តែច្រើនថែមទៀត។
នេះបើតាមខ្លឹមសារនៃជំនួបពិភាក្សាការងាររវាង លោក សួន សុផល អគ្គលេខាធិការរងគណៈកម្មាធិការវិនិយោគកម្ពុជា ជាមួយនឹងគណៈប្រតិភូការិយាល័យទីប្រឹក្សានៃក្រុមប្រឹក្សារដ្ឋនៃសាធារណរដ្ឋប្រជាមានិតចិន ដែលដឹកនាំដោយ លោក Wang Weimin អនុប្រធានការិយាល័យទីប្រឹក្សាក្រុមប្រឹក្សារដ្ឋនៃសាធារណរដ្ឋប្រជាមានិតចិន នៅទីស្តីការរបស់ក្រុមប្រឹក្សាអភិវឌ្ឍន៍កម្ពុជា(CDC) កាលពីថ្ងៃទី២៥ ខែមេសា ឆ្នាំ២០២៥។
ក្នុងជំនួបនោះ លោក សួន សុផល បានសម្តែងការស្វាគមន៍ចំពោះគណៈប្រតិភូចិន ដែលមកធ្វើទស្សនកិច្ចការងារផ្ទាល់នៅកម្ពុជា បន្ទាប់ពីដំណើរទស្សនកិច្ចផ្លូវរដ្ឋរបស់ប្រធានាធិបតីចិន លោក ស៊ី ជីនពីង កាលពីថ្ងៃទី១៧-១៨ ខែមេសា កន្លងមកថ្មីៗនេះ។ លោកបន្ថែមថា ទំនាក់ទំនងទ្វេភាគីកម្ពុជា-ចិន កំពុងបង្ហាញភាពល្អប្រសើរយ៉ាងខ្លាំង និងបានរីកចម្រើនឥតឈប់ឈរ ជាពិសេសសម្ទុះថ្មីនៃការកសាងសហគមន៍វាសនារួមគ្រប់រដូវកាលក្នុងយុគសម័យថ្មីប្រកបដោយគុណភាពខ្ពស់កម្រិតខ្ពស់ និងស្តង់ដាខ្ពស់។
លោកបន្ថែមថា ជាក់ស្តែងគម្រោងវិនិយោគផ្ទាល់របស់ចិននៅកម្ពុជាតែងតែឈរនៅលើគេជានិច្ចក្នុងរយៈពេល ១ ទសវត្សរ៍ចុងក្រោយនេះ។ វិនិយោគិនចិនកំពុងវិនិយោគនៅកម្ពុជាស្ទើគ្រប់វិស័យ ហើយលោកជឿថា គម្រោងវិនិយោគរបស់ចិននឹងនៅតែបន្តឈរនៅលំដាប់កំពូលតទៅអនាគត។
លោកបានថ្លែងថា៖«រាជរដ្ឋាភិបាលកម្ពុជាបានខិតខំធ្វើឱ្យប្រសើរឡើងជាលំដាប់នូវបរិយាកាសវិនិយោគរបស់ខ្លួនតាមរយៈការផ្តល់កិច្ចសម្រួលវិនិយោគឱ្យកាន់តែលឿន និងទាន់ចិត្ត ការផ្តល់នូវកញ្ចប់លើកទឹកចិត្តដែលមានភាពអនុគ្រោះខ្ពស់ និងការថែទាំវិនិយោគប្រកបដោយភាពកក់ក្តៅ»។
លោកបានបញ្ជាក់ថា៖«ខ្ញុំសង្ឃឹមថា គណៈប្រតិភូនៃការិយាល័យទីប្រឹក្សានៃក្រុមប្រឹក្សារដ្ឋដែលជាស្ថាប័នបណ្តុំគំនិតរបស់រដ្ឋាភិបាលនៃសាធារណរដ្ឋប្រជាមានិតចិន នឹងជួយពាំនាំព័ត៌មានវិជ្ជមានរបស់កម្ពុជាជម្រាបជូនថ្នាក់ដឹកនាំ និងសហគមន៍ធុរកិច្ចគ្រប់លំដាប់ថ្នាក់ដើម្បីប្រើប្រាស់ជាមូលដ្ឋានក្នុងការសិក្សាសមលទ្ធភាពពង្រីកខ្សែច្រវាក់ផលិតកម្មរបស់ខ្លួនមកកម្ពុជាបន្ថែមទៀតនាពេលដ៏ខ្លីខាងមុខ»។
ជាការឆ្លើយតបលោក Wang Weimin បានថ្លែងអំណរគុណចំពោះក្រុមការងារគណៈកម្មាធិការវិនិយោគកម្ពុជានៃ CDC ដែលបានទទួលជួបពិភាក្សាការងារនាឱកាសដំណើរទស្សនកិច្ចការងារលើកដំបូងមកកាន់ប្រទេសកម្ពុជា។ ដំណើរទស្សនកិច្ចរបស់ក្រុមការងារមកកម្ពុជានាពេលនេះ គឺក្នុងគោលបំណងជួបពិភាក្សា និងលើកកម្ពស់ការឈ្វេងយល់អំពីបច្ចុប្បន្នភាពថ្មីនៃបរិយាកាសវិនិយោគកម្ពុជានៅក្នុងបរិបទនៃការកសាងសហគមន៍វាសនារួមកម្ពុជា-ចិនគ្រប់រដូវកាលក្នុងយុគសម័យថ្មី។
លទ្ធផលជាវិជ្ជមានដែលកម្ពុជាកំពុងសម្រេចបាននាពេលនេះ គឺជាការបោះជំហានយ៉ាងត្រឹមត្រូវលើមាគ៌ានៃការអភិវឌ្ឍសង្គម-សេដ្ឋកិច្ចដែលស្តែងចេញតាមរយៈការរីកលូតលាស់នៃហេដ្ឋារចនាសម្ព័ន្ធរូបវ័ន្ត កំណើននៃរំហូរវិនិយោគបរទេស និងភាពល្អប្រសើរនៃជីវភាពរស់នៅរបស់ប្រជាជន។
លោកប្រាប់ទៀតថា ក្រុមការងាររបស់លោកពិតជាចាប់អារម្មណ៍ចំពោះបរិយាកាស និងវឌ្ឍនភាពចុងក្រោយនៃបរិស្ថានធុរកិច្ចនៅកម្ពុជា ហើយលោកមានជំនឿថា សហគ្រាសចិនក្រោមគំនិតផ្តួចផ្តើមខ្សែក្រវាត់ និងផ្លូវ នឹងបន្តពង្រីកការវិនិយោគរបស់ខ្លួននៅតាមបណ្តោយរបៀងអភិវឌ្ឍន៍ឧស្សាហកម្មកម្ពុជាជាក់ជាពុំខាន។
ទិន្នន័យពីអគ្គនាយកដ្ឋានគយ និងរដ្ឋាករកម្ពុជា(GDCE) ឱ្យដឹងថា ក្នុងត្រីមាសទី១ ឆ្នាំ២០២៥ ការនាំចូល នាំចេញទំនិញរវាងប្រទេសកម្ពុជា-ចិន មានទឹកប្រាក់សរុប ៤ ០៦៨,៦ លានដុល្លារ កើនឡើង ២៦,៧ ភាគរយបើធៀបត្រីមាសទី១ ឆ្នាំ ២០២៤។ ក្នុងចំនួននេះ គឺកម្ពុជានាំទៅប្រទេសចិន ៣៤៨,១៩ លានដុល្លារ ថយចុះ ៤,៩ ភាគរយ ចំណែកទំនិញចិននាំចូលកម្ពុជា ៣ ៧២០,៤១ លានដុល្លារ កើន ៣០,៨ ភាគរយ។
ផ្អែកតាមទិន្នន័យខាងលើ គឺជញ្ជីងពាណិជ្ជកម្មកម្ពុជា មានឱនភាព ៩១,៤៤ភាគរយ ដែលស្មើនឹងទឹកប្រាក់ ៣ ៣៧២,២២ លានដុល្លារ ខណៈកាលពីឆ្នាំ ២០២៤ មានត្រឹមតែ ២ ៤៤៤,៨៥ លានដុល្លារ។
ក្នុងឆ្នាំ ២០២៤ នាំចូល នាំចេញទំនិញរវាងប្រទេសទាំង ២ មានទឹកប្រាក់សរុប ១៥,១៩ ពាន់លានដុល្លារ កើនឡើង ២៣,៨ ភាគរយបើធៀបនឹងឆ្នាំ ២០២៣។ ក្នុងចំនួននេះ គឺចិននាំមកកម្ពុជា ១៣,៤៤ ពាន់លានដុល្លារ កើន ២៤,៦ ភាគរយ ចំណែកទំនិញកម្ពុជានាំទៅប្រទេសចិន ១,៧៥ ពាន់លានដុល្លារ កើន ១៨,៤ ភាគរយ៕
