លោក ម៉ៅ ធនិន អភិបាលខេត្តកំពតជួបជាមួយតំណាងក្រុមហ៊ុន Guanzun Energy Investment នៅថ្ងៃទី៥ ខែមេសា។
ក្រសួងរ៉ែនិងថាមពល នៅថ្ងៃទី៣០ ខែមេសានេះបានចេញលិខិតបដិសេធទៅលើការចុះផ្សាយរបស់សារព័ត៌មួយចំនួន ដែលថា ក្រុមហ៊ុន Guanzun Energy Investment នឹងធ្វើការវិនិយោគទៅលើគម្រោងសាងសង់រោងចក្រចម្រាញ់ប្រេងក្នុងតម្លៃ ៣,៥ពាន់លានដុល្លារនៅខេត្តកំពត។
យោងតាមការចុះផ្សាយរបស់សារព័ត៌មានមួយចំនួន ក្រុមហ៊ុន Guanzun Energy Investment គ្រោងបើកគម្រោងរោងចក្រចម្រាញ់ប្រេងដែលមានសមត្ថភាពចម្រាញ់ប្រេងបាន ១០លានតោនក្នុងមួយឆ្នាំ នៅលើផ្ទៃដីប្រមាណ ២៣៤ ហិកតា នៅខេត្តកំពត។
បើតាមការចុះផ្សាយរបស់ទូរទស្សន៍ជាតិ ទទក នៅថ្ងៃទី៤ខែមេសា ឆ្នាំ២០២៥នេះ គម្រោងរោងចក្រចម្រាញ់ប្រេងនេះ នឹងប្រើពេលសាងសង់សរុប ៣ឆ្នាំ។ ដោយដំណាក់កាលទី១ នឹងសាងសង់រោងចក្រមានសមត្ថភាពចម្រាញ់ប្រេង ៥លានតោនក្នុងមួយឆ្នាំ ជាមួយនឹងការវិនិយោគប្រមាណ ២,៦ពាន់លានដុល្លារអាមេរិក មានរយៈពេលសាងសង់ ១៨ខែ។ ចំណែកដំណាក់កាលទីពីរ នឹងត្រូវចំណាយពេល ១៨ខែទៀត ដើម្បីបញ្ចប់ការសាងសង់ទាំងមូល។
ក្រុមហ៊ុន Guanzun Energy Investment បានចុះបញ្ជីជាមួយក្រសួងពាណិជ្ជកម្មកាលពីខែសីហា ឆ្នាំ២០២៤។
នៅថ្ងៃទី៥ ខែមេសា តំណាងក្រុមហ៊ុននេះ ក៏បានជួបជាមួយលោក ម៉ៅ ធនិន អភិបាលខេត្តកំពត ដើម្បី ពិភាក្សាការងារ និងសុំការអនុញ្ញាត «ដើម្បីចុះពិនិត្យភូមិសាស្ត្រ ក្នុងខេត្តកំពតដើម្បីសាងសង់រោងចក្រចម្រាញ់ប្រេងកាត»។ នេះបើយោងតាមការចុះផ្សាយរបស់រដ្ឋបាលខេត្តកំពត។
យ៉ាងណាក៏ដោយ ក្រសួងរ៉ែនិងថាមពលបញ្ជាក់ថា៖ «ក្រុមហ៊ុនខាងលើពុំធ្លាប់ទទួលបានការអនុម័តពីរាជរដ្ឋាភិបាលកម្ពុជាក្នុងការអនុញ្ញាតឱ្យធ្វើការវិនិយោគគម្រោងនេះនៅឡើយទេ»។
ក្រសួងស្នើសុំឲ្យសាធារណជនបញ្ឈប់ការចែកចាយព័ត៌មានដែលដែលក្រសួងចាត់ទុកថា «គ្មានការពិត»៕
