រដ្ឋលេខាធិការ និងជាអ្នកនាំពាក្យនៃរដ្ឋលេខាធិការដ្ឋានអាកាសចរណ៍ស៊ីវិល លោក ស៊ីន ចាន់សិរីវុត្ថា បានប្រាប់​ភ្នំពេញ​ប៉ុស្តិ៍​ក្នុង​ថ្ងៃ​ទី​១៤ ខែ​ឧសភា ថា កាលបរិច្ឆេទនៃការផ្ទេរ បិទ និងការបើកឱ្យដំណើរការអាកាសយានដ្ឋានអន្តរជាតិតេជោនៅថ្ងៃទី១០ ខែកក្កដា ឆ្នាំ២០២៥ ខាងមុខនេះ បាន ឬមិនបាន គឺអាស្រ័យលើលទ្ធផល​នៃការពិនិត្យវាយតម្លៃ និងការធ្វើសវនកម្មលើកទី២ ដែលគ្រោងប្រព្រឹត្តទៅនៅចុងខែឧសភា ឬខែមិថុនាខាងមុខនេះ។

លោក​បន្ត​ថា ចំពោះថ្ងៃទី១០ ខែកក្កដា គឺគ្រាន់តែជាផែនការ​ដែលបានគ្រោង និងរំពឹងទុក​ដែលបានព្រមព្រៀងគ្នាជាមួយតួអង្គ និងសមត្ថកិច្ចជំនាញពាក់ព័ន្ធនាពេលកន្លងមក​(មាន​ជាអាទិ៍ រដ្ឋលេខាធិការដ្ឋានអាកាសចរណ៍ស៊ីវិល ក្រុមហ៊ុនវិនិយោគអាកាសយានដ្ឋាន​(ACIC)​ និង​ប្រតិបត្តិករសំខាន់ៗពាក់ព័ន្ធផ្សេងៗ)។

លោក​បាន​ថ្លែង​ថា៖​«​​ចំពោះកាលបរិច្ឆេទចុងក្រោយនៃការផ្ទេរ បិទ និងការបើកឱ្យដំណើរការអាកាសយានដ្ឋានថ្មីនេះ រដ្ឋលេខាធិការ​ដ្ឋានអាកាសចរណ៍ស៊ីវិល នឹងធ្វើការជូនដំណឹងជាផ្លូវការ​ក្នុងពេលឆាប់ៗ​ខាងមុខនេះ»។

លោក​បាន​បន្ថែម​ថា បើគ្មានអ្វីប្រែប្រួលនោះទេ​ អាកាសយានដ្ឋានអន្ដរជាតិតេជោ​លំដាប់ថ្នាក់ 4F ដំណាក់កាលទី១ នឹងបើកដំណើរការប្រតិបត្តិការ​នៅថ្ងៃទី១០ ខែកក្កដា ឆ្នាំ២០២៥ ខាងមុខនេះ ខណៈវឌ្ឍនភាពគម្រោងនៃការសាងសង់អាកាសយានដ្ឋាននាពេលនេះ​ស្ទើរតែរួចរាល់ទាំងស្រុងហើយ។

សូមជម្រាបបន្ថែមថា អាកាសយានដ្ឋានអន្ដរជាតិតេជោ មានលក្ខណះទំនើប និងមាន​លំហធំទូលាយ ដែលសាងសង់ឡើងលើផ្ទៃដីជាង ២ ៦០០ហិកតា អាចអនុញ្ញាតឱ្យយន្តហោះខ្នាតធំចុះចតបាន ក្នុងនោះមានយន្តហោះប្រភេទ Airbus A380 និង Boeing 747 និងអាចទទួលអ្នកដំណើរបានរហូតដល់ ១៣ លាននាក់ ក្នុង១ឆ្នាំ សម្រាប់ដំណាក់កាលទី១៕