សកម្មភាពកម្មករកំពុងចៀរជ័រកៅស៊ូ ក្នុងចម្ការមួយកន្លែងក្នុងខេត្តត្បូងឃ្មុំ។ នៀម ឆេង
ការកើនឡើងនៃតម្លៃជ័រកៅស៊ូនៅទីផ្សារអន្តរជាតិ បានជួយឱ្យកម្ពុជារកប្រាក់បានជិត ១៥០លានដុល្លារពីការនាំចេញជ័រកៅស៊ូ និងឈើកៅស៊ូ នារយៈពេល ៤ខែដើមឆ្នាំ២០២៥ ដោយកើនជាង ១៨ភាគរយបើធៀបនឹងរយៈពេលដូចគ្នាកាលពីឆ្នាំមុន ខណៈតម្រូវការប្រើប្រាស់ជ័រកៅស៊ូពីសំណាក់ក្រុមហ៊ុនផលិតកង់រថយន្តនៅក្នុងស្រុកមានកាន់តែច្រើន។
ទិន្នន័យរបស់អគ្គនាយកដ្ឋានកៅស៊ូ នៃក្រសួងកសិកម្ម រុក្ខាប្រមាញ់ និងនេសាទ ដែលទើបផ្សព្វផ្សាយបង្ហាញថា ចាប់ពីខែមករា ដល់ខែមេសា ឆ្នាំ២០២៥ កម្ពុជាផលិតជ័រកៅស៊ូបាន ៨១ ៩៦២តោន ថយចុះ ៥ ១៧១តោន ឬស្មើនឹង ៥,៩ភាគរយបើធៀបនឹងរយៈពេលដូចគ្នាក្នុងឆ្នាំ២០២៤។ ជាមួយគ្នានេះកម្ពុជាក៏បាននាំចេញជ័រកៅស៊ូចំនួន ៧៦ ៤៦៧តោន ថយចុះ ៨ ៩៦១ តោន ឬស្មើ ១០,៥ភាគរយបើធៀបនឹងរយៈពេលដូចគ្នាក្នុងឆ្នាំ២០២៤ ដោយរកថវិកាបាន ១៤៨,១៨លានដុល្លារ និងចំណូលពីការលក់ឈើកៅស៊ូ ១ ៦៩១ ៥៥០ដុល្លារ(៦ ៩២៩ ម៉ែត្រគូប)។
ទិន្នន័យឱ្យដឹងទៀតថា សម្រាប់ខែមេសា ឆ្នាំ២០២៥ ការប្រមូលផលជ័រកៅស៊ូសម្រេចបាន ១៧ ៨៨២តោន កើន ១៣ ១២៧តោន ឬស្មើ ២៧៦ភាគរយបើធៀបនឹងខែមីនា(ឆ្នាំ២០២៥) និងកើនឡើង ១ ៦៤២តោន ស្មើ ១០,១ភាគរយបើធៀបនឹងខែមេសា ឆ្នាំ២០២៤។
សម្រាប់តម្លៃជាមធ្យមរបស់ជ័រកៅស៊ូក្នុងខែមេសា ឆ្នាំ២០២៥ គឺ ១ ៩៨៩ដុល្លារក្នុង ១តោន ដោយថយចុះ ៨៩ ដុល្លារ ឬស្មើ ៤,៧១ភាគរយបើធៀបនឹងមីនា(ឆ្នាំ២០២៥) ប៉ុន្តែបានកើនឡើង ៤៥៧ដុល្លារ ឬស្មើ ២៩,៨៤ភាគរយបើធៀបនឹងខែមេសា ឆ្នាំ២០២៤ ដែលមាន ១ ៥៣២ដុល្លារ។ ចំណែកឈើកៅស៊ូគិតជាមធ្យមមានតម្លៃ ២៣៣ដុល្លារក្នុងមួយម៉ែត្រគូប។
លោក គឹន ឧត្តមមុនីស៊ីណាត នាយកប្រតិបត្តិក្រុមហ៊ុន Sailun Tire Cambodia ដែលជាក្រុមហ៊ុនផលិតសម្បកកង់រថយន្តនៅក្នុងតំបន់សេដ្ឋកិច្ចពិសេសក្រុងព្រះសីហនុ បានប្រាប់ភ្នំពេញប៉ុស្តិ៍ក្នុងថ្ងៃទី១៦ ខែឧសភាថា តម្លៃជ័រកៅស៊ូនៅទីផ្សារក្នុងស្រុក និងអន្តរជាតិបានកើនឡើងក្នុងរយៈពេលជាង ១ ឆ្នាំមកហើយ។ លោកបន្តថា ការបើកដំណើររោងចក្រផលិតសំបកកង់រថយន្តនៅក្នុងប្រទេសកម្ពុជាជាបន្តបន្ទាប់ ក៏ជាចំណែកជួយឱ្យទីផ្សារជ័រកៅស៊ូនៅកម្ពុជាល្អប្រសើរផងដែរ។
លោកប្រាប់ទៀតថា សម្រាប់ជ័រកៅស៊ូនៅកម្ពុជាបច្ចុប្បន្នគឺមានតម្លៃជាមធ្យមជាង ១ ៩០០ដុល្លារក្នុង១តោន ដែលកើនឡើងតិចតួចបើធៀបនឹងរយៈពេលដូចគ្នាកាលពីឆ្នាំ២០២៤។ តម្លៃកៅស៊ូអាចនឹងកើនឡើងបន្ថែមទៀតនាពេលអនាគត។
លោកបានថ្លែងថា៖«តម្រូវការជ័រកៅស៊ូពីសំណាក់ក្រុមហ៊ុនផលិតសំបកកង់រថយន្តក្នុងស្រុកបានឡើងជាបន្តបន្ទាប់ ហើយវានឹងមានកាន់តែច្រើននាពេលខាងមុខ ខណៈបច្ចុប្បន្នទាំងរោងចក្រផលិតសំបកកង់រថយន្តកំពុងដំណើរការ និងកំពុងសាងសង់នៅកម្ពុជា គឺកើនដល់ ៧»។
បើតាមលោក គឹន ឧត្តមមុនីស៊ីណាត សម្រាប់ឆ្នាំ ២០២៥ នេះ គ្រាន់តែរោងចក្ររបស់ក្រុមហ៊ុន Sailun គឺអាចមានតម្រូវការជ័រកៅស៊ូក្នុងស្រុកប្រមាណ ១០ម៉ឺនតោន ខណៈរោងចក្រផ្សេងៗទៀតអាចនឹងមានតម្រូវការប្រហែល ១០ ម៉ឺនតោនផងដែរ។
យោងតាមក្រសួងកសិកម្ម រុក្ខាប្រមាញ់ និងនេសាទ កាលពីឆ្នាំ២០២៤ កម្ពុជាបានននាំចេញផលិតផលជ័រកៅស៊ូ និងឈើកៅស៊ូ មានទឹកប្រាក់សរុប ៦៧១,៦៨ លានដុល្លារ កើនឡើង ៣៦,៤៨ ភាគរយបើធៀបនឹងឆ្នាំ ២០២៣។
ប្រាក់ចំណូលដែលទទួលបានខាងលើ គឺពីការនាំចេញជ័រកៅស៊ូចំនួន ៦៦៦,២៥ លានដុល្លារ និងចំណូលពីការនាំចេញឈើកៅស៊ូ ៥,៤ លានដុល្លារ។
សម្រាប់តម្លៃជាមធ្យមរបស់ជ័រកៅស៊ូនៅទីផ្សារអន្តរជាតិ ក្នុងឆ្នាំ២០២៤ គឺ ១ ៩៧១ ដុល្លារក្នុង ១តោន កើនឡើង ៦៣៤ ដុល្លារក្នុង ១តោន ឬស្មើនឹង ៤៧ ភាគរយបើធៀបនឹងឆ្នាំ ២០២៣។
យោងតាមអគ្គនាយកដ្ឋានកៅស៊ូ គិតត្រឹមដំណាច់ឆ្នាំ២០២៤ នៅកម្ពុជាមានផ្ទៃដីកៅស៊ូសរុបចំនួន ៤២៥ ៤៤៣ហិកតា កើនឡើងពី ៤០៧ ១៧២ហិកតា កាលពីឆ្នាំ ២០២៣។
ក្នុងនោះផ្ទៃដីកៅស៊ូចៀរជ័រ មានចំនួន ៣៣០ ២៥៩ហិកតា ស្មើនឹង ៧៧,៦៣ ភាគរយនៃផ្ទៃដីកៅស៊ូសរុប និងផ្ទៃដីថែទាំ ៩៥ ១៨៤ហិកតា ស្មើនឹង ២២,៣៧ភាគរយ៕
