ទិដ្ឋភាពកម្មករកំពុងបំពេញការងារក្នុងតំបន់សេដ្ឋកិច្ចពិសេស RGPPSEZ។ សហការី
តំបន់សេដ្ឋកិច្ចពិសេសកំពុងដើរតួនាទីយ៉ាងសំខាន់ក្នុងការទាក់ទាញក្រុមវិនិយោគិនជាតិ និងអន្តរជាតិឱ្យមកបើកដំណើរការរោងចក្រ/សហគ្រាសនៅកម្ពុជា ជាក់ស្តែងក្នុងត្រីមាសទី ១ ឆ្នាំ២០២៥ ការនាំទំនិញចេញរបស់តំបន់សេដ្ឋកិច្ចពិសេសទាំង ២ ដែលវិនិយោគដោយក្រុមហ៊ុន រ៉ូយ៉ាល់ គ្រុប ភ្នំពេញ អេសអ៊ីហ្សិត ម.ក (PPSP) មានទឹកប្រាក់សរុបជាង ៤៣០ លានដុល្លារ កើនឡើងជិត ១០ភាគរយបើធៀបនឹងរយៈពេលដូចគ្នាឆ្នាំ២០២៤។
សេចក្តីប្រកាសព័ត៌មានរបស់ PPSP ដែលជាអ្នកអភិវឌ្ឍន៍តំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ និងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល បានឱ្យដឹងថា ចាប់ពីខែមករា-ខែមីនា ឆ្នាំ២០២៥ ការនាំចេញទំនិញផលិតនៅក្នុងតំបន់សេដ្ឋកិច្ចពិសេសទាំង ២ មានទឹកប្រាក់សរុប ៤៣១លានដុល្លារ កើនឡើង ៨,៦ភាគរយបើធៀបនឹង ៣៩៧លានដុល្លារ កាលពីត្រីមាសទី១ ឆ្នាំ២០២៤។
ដោយឡែកគិតត្រឹមខែមេសា ឆ្នាំ២០២៥ តំបន់សេដ្ឋកិច្ចពិសេសទាំង ២ មានបុគ្គលិកកម្មករកំពុងបម្រើការចំនួន ៥០ ៧៤៦នាក់ ក្នុងនោះតំបន់សេដ្ឋកិច្ចពិសេស រ៉ូយ៉ាល់ គ្រុប ភ្នំពេញ មានបុគ្គលិកកម្មករ ៤៨ ៧៣០នាក់ និងតំបន់សេដ្ឋកិច្ចពិសេស រ៉ូយ៉ាល់ គ្រុប កណ្តាល មានបុគ្គលិកកម្មករ ២ ០១៦នាក់។
សេចក្តីប្រកាសព័ត៌មានឱ្យដឹងទៀតថា សមិទ្ធិផលដ៏ធំធេងនេះបានបង្ហាញពីការរីកចម្រើនដ៏ខ្លាំងរបស់តំបន់សេដ្ឋកិច្ចពិសេសទាំង ២ ក្នុងនាមជាគោលដៅវិនិយោគឈានមុខគេនៅកម្ពុជា។ នាពេលបច្ចុប្បន្នតំបន់សេដ្ឋកិច្ចពិសេសទាំង ២ ទទួលបានការវិនិយោគពីសំណាក់ក្រុមហ៊ុនចំនួន ១១៧ មកពី ១៤ ប្រទេសជុំវិញពិភពលោក ដែលបានពាំនាំនូវការវិនិយោគលើវិស័យផលិតកម្ម មានដូចជា រោងចក្រដំឡើងរថយន្ត និងផលិតគ្រឿងបន្លាស់នានា គ្រឿងអគ្គិសនី អេឡិចត្រូនិក សម្លៀកបំពាក់ ចំណីអាហារនិងភេសជ្ជៈ និងឧបករណ៍សម្ភារប្រើប្រាស់ក្នុងផ្ទះ ជាដើម។
លោក UEMATSU Hiroshi នាយកប្រតិបត្តិក្រុមហ៊ុន PPSP បាននិយាយថា តំបន់សេដ្ឋកិច្ចពិសេសរបស់ក្រុមហ៊ុន Royal Group កំពុងក្លាយជាក្បាលម៉ាស៊ីនដ៏សំខាន់មួយនៃការបង្កើតឱកាសការងារ និងការផ្លាស់ប្តូរវិស័យឧស្សាហកម្មដែលដើរតួនាទីយ៉ាងសំខាន់ក្នុងការអភិវឌ្ឍសេដ្ឋកិច្ចជាតិ។ ក្នុងនាមជាអ្នកអភិវឌ្ឍតំបន់សេដ្ឋកិច្ចពិសេស ក្រុមហ៊ុនតែងមានការតាំងចិត្តដ៏មោះមុតក្នុងការផ្តល់នូវសេវាកម្មដែលមានគុណភាពខ្ពស់ជូនដល់ភ្ញៀវវិនិយោគ និងបន្តខិតខំចូលរួមចំណែកក្នុងការបង្កើតឱកាសការងារកាន់តែច្រើនថែមទៀតជូនដល់ប្រជាជនខ្មែរ។ ទាំងអស់នេះគឺជាសមិទ្ធិផលដ៏ខ្ពង់ខ្ពស់ និងជាប្រភពនៃកម្លាំងចិត្ត និងមោទនភាពរបស់ក្រុមហ៊ុន Royal Group។
លោកថ្លែងថា៖«តួលេខទាំងអស់នេះឆ្លុះបញ្ចាំងពីវត្តមានដ៏សំខាន់របស់តំបន់សេដ្ឋកិច្ចពិសេសទាំង ២ លើឆាកអន្តរជាតិ និងការប្រមូលផ្តុំនូវចំណេះជំនាញពីគ្រប់ទិសទីចូលរួមចំណែកដល់ការអភិវឌ្ឍរបស់តំបន់សេដ្ឋកិច្ចពិសេសទាំង ២ នេះផងដែរ»។
ទាក់ទងនឹងចំនួនបុគ្គលិក និងកម្មករកំពុងបម្រើការ លោក UEMATSU Hiroshi បានលើកឡើងថា ជាមួយនឹងបុគ្គលិកកម្មករកំពុងបម្រើការជាង ៥ ម៉ឺននាក់ ក៏មានបុគ្គលិកជំនាញជាជនជាតិបរទេសចំនួន ៨០២រូប ផ្សេងទៀតដែលមកពីបណ្តាប្រទេសចំនួន ១៣ កំពុងបម្រើការងារនៅក្នុងតំបន់សេដ្ឋកិច្ចពិសេសទាំង ២។ ភាគច្រើននៃអ្នកជំនាញបរទេសគឺជាជនជាតិចិន, ជប៉ុន, វៀតណាម, ថៃ និង និងម៉ាឡេស៊ី។
ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP លោក សំ សុខនឿន បានប្រាប់ភ្នំពេញប៉ុស្តិ៍ក្នុងថ្ងៃទី១៩ ខែឧសភាថា តំបន់សេដ្ឋកិច្ចពិសេសទាំង ២ របស់ក្រុមហ៊ុន Royal Group កំពុងដើរតួនាទីយ៉ាងសំខាន់ក្នុងការទាក់ទាញអ្នកវិនិយោគឱ្យចូលមកបណ្តាក់ទុននៅកម្ពុជា។ មានកត្តាជាច្រើនដែលជួយឱ្យការបណ្តាក់ទុន និងការនាំចេញរបស់តំបន់សេដ្ឋកិច្ចពិសេសទាំង ២ កើនឡើង ដែលមានដូចជា ភូមិសាស្រ្តស្ថិតនៅទីប្រជុំជន ភាពងាយស្រួលដឹកជញ្ជូនទៅកំពង់ផែ និងមានប្រព័ន្ធគ្រប់គ្រងល្អប្រសើរ ជាដើម។ តំបន់សេដ្ឋកិច្ចពិសេសកំពុងចូលរួមចំណែកយ៉ាងខ្លាំងក្នុងការលើកកម្ពស់ការនាំទំនិញចេញរបស់កម្ពុជា។
លោកបន្ថែមថា៖«ការវិនិយោគក្នុងតំបន់សេដ្ឋកិច្ចពិសេស គឺផ្តល់ភាពងាយស្រួលច្រើនសម្រាប់អ្នកវិនិយោគទាំងប្រព័ន្ធដឹកជញ្ជូន បែបបទនៃលិខិតស្នាមនាំចេញ-នាំចូលទំនិញ និងអាចទទួលបានការលើកទឹកចិត្តមួយចំនួនផងដែរ»។
របាយការណ៍ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានឱ្យដឹងថា គិតត្រឹមចុងឆ្នាំ ២០២៤ នៅកម្ពុជាមានតំបន់សេដ្ឋកិច្ចពិសេសសរុបចំនួន ៣០ ដែលមានរោងចក្រកំពុងដំណើរការ។ ចំនួននេះគឺកើនឡើងចំនួន ៤ បើធៀបនឹងឆ្នាំ ២០២៣។
តំបន់សេដ្ឋកិច្ចពិសេសទាំង ៣០ គឺមានទីតាំងនៅ ១២ រាជធានី-ខេត្ត ដោយ ៩ ស្ថិតក្នុងខេត្តស្វាយរៀង, ៥ ក្នុងខេត្តព្រះសីហនុ, ៣ ក្នុងខេត្តបន្ទាយមានជ័យ កោះកុង និងកណ្តាល, និងចំនួន ១ នៅក្នុងរាជធានីភ្នំពេញ ខេត្តពោធិ៍សាត់ ក្រចេះ កំពត កំពង់ស្ពឺ កំពង់ឆ្នាំង និងខេត្តកំពង់ចាម។
ចំនួនតំបន់សេកិច្ចពិសេសដែលមានប្រតិបត្តិការ គឺកើនឡើងពីចំនួន ២១ ក្នុងឆ្នាំ ២០២០ ដល់ចំនួន ២៣ ក្នុងឆ្នាំ ២០២១ និង ២៥ ក្នុងឆ្នាំ ២០២២ ព្រមទាំងចំនួន ២៦ ក្នុងឆ្នាំ ២០២៣៕
