លោក កែវ រតនៈ ថ្លែងក្នុងពិធីសម្ពោធដាក់ឱ្យដំណើរការរោងចក្រផលិតស៊ីម៉ងត៍ នៅខេត្តកំពង់ស្ពឺ។ STPM
កំណើននៃសកម្មភាពរុករក និងធ្វើអាជីវកម្មរ៉ែនៅកម្ពុជា ជួយឱ្យរដ្ឋាភិបាលប្រមូលចំណូលមិនមែនសារពើពន្ធពីវិស័យរ៉ែបានជិត ១០០លានដុល្លារកាលពីឆ្នាំ២០២៤ ដោយកើនឡើង ៧៩ភាគរយបើធៀបនឹងឆ្នាំ២០២៣។ នេះបើយោងតាមថ្នាក់ដឹកនាំក្រសួងរ៉ែ និងថាមពល។
នៅក្នុងពិធីសម្ពោធដាក់ឱ្យដំណើរការរោងចក្រផលិតស៊ីម៉ងត៍តម្លៃ ២៥០លានដុល្លាររបស់ក្រុមហ៊ុនខនស៍ ខេធី ស៊ីមេន ដែលស្ថិតនៅស្រុកឱរ៉ាល់ ខេត្តកំពង់ស្ពឺ នាថ្ងៃទី២០ ខែឧសភា នេះ លោក កែវ រតនៈ រដ្ឋមន្រ្តីក្រសួងរ៉ែ និងថាមពល បានថ្លែងថា កត្តាសុខសន្តិភាពបានផ្តល់នូវបរិយាកាសដ៏ល្អដល់រដ្ឋាភិបាល និងប្រជាជនកម្ពុជាក្នុងការអភិវឌ្ឍប្រទេសជាតិ រួមទាំងវិស័យរ៉ែផងដែរ។
ទោះបីវិស័យរ៉ែនៅកម្ពុជាមានអាយុនៅក្មេងខ្ចី ក៏កម្ពុជាបានខិតខំប្រឹងប្រែងអភិវឌ្ឍវិស័យនេះបានយ៉ាងល្អ តាមរយៈការទាក់ទាញវិនិយោគិនជាតិ និងអន្តរជាតិឱ្យវិនិយោគលើវិស័យនេះបានកាន់តែច្រើន និងបានបង្កើតប្រភពចំណូលថ្មីបន្ថែមគួរឱ្យកត់សម្គាល់សម្រាប់រដ្ឋាភិបាល។ លោកបន្តថា ជាក់ស្តែង បច្ចុប្បន្នកម្ពុជាមានការដ្ឋានរ៉ែជាច្រើនសម្រាប់ផលិត និងផ្គត់ផ្គង់តម្រូវការក្នុងស្រុក និងនាំចេញផលិតផលរ៉ែទៅក្រៅប្រទេស។
លោកបញ្ជាក់ថា៖«នៅឆ្នាំ២០២៤ កន្លងទៅនេះ ក្រសួងរ៉ែ និងថាមពល បានប្រមូលចំណូលមិនមែនសារពើពន្ធពីវិស័យរ៉ែជូនរដ្ឋ បានប្រមាណជិត ១០០លានដុល្លារ ហើយមានការកើនឡើងប្រមាណ ៧៩ភាគរយធៀបនឹងឆ្នាំ២០២៣»។
លោកលើកឡើងទៀតថា សម្រាប់ខេត្តកំពង់ស្ពឺដែលជាទីតាំងនៃរោងចក្រផលិតស៊ីម៉ងត៍របស់ក្រុមហ៊ុនខនស៍ ខេធី ស៊ីមេន នេះ គឺការប្រមូលចំណូលមិនមែនសារពើពន្ធពីវិស័យរ៉ែ កាលពីឆ្នាំ២០២៤ បានប្រមាណជាង៥ លានដុល្លារ និងសម្រាប់ត្រីមាសទី១ ឆ្នាំ២០២៥ បានប្រមាណ ១ លានដុល្លារ ដោយផ្តល់ការងារដល់ប្រជាពលរដ្ឋដោយផ្ទាល់ប្រមាណ ១ ៩០០នាក់ពីការដ្ឋានរ៉ែចំនួន ៧៤។
ឯកសារច្បាប់ថវិកាឆ្នាំ២០២៥ បានកំណត់ឱ្យរដ្ឋាភិបាលកម្ពុជាប្រមូលចំណូលចូលថវិកាជាតិចំនួន ៣១ ៥៩៨ប៊ីលានរៀល(ប្រហែល ៧,៩ពាន់លានដុល្លារ) ក្នុងនោះចំណូលសារពើពន្ធ ២៦ ៤១៨ប៊ីលានរៀល(៦,៦ពាន់លានដុល្លារ) ចំណូលមិនមែនសារពើពន្ធ ៣ ៩៧១ ប៊ីលានរៀល(៩៩២,៧៥លានដុល្លារ) និងចំណូលផ្សេងៗចំនួន ១ ២០៩ ប៊ីលានរៀល(៣០២,២៥លានដុល្លារ)។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍នៅថ្ងៃទី២០ ខែឧសភាថា ចំណូលមិនមែនសារពើពន្ធពីវិស័យរ៉ែ កើនឡើងគឺបញ្ជាក់ថា សកម្មភាពក្នុងការធ្វើអាជីវកម្មរ៉ែនៅកម្ពុជាកំពុងកើនឡើងទាំងចំនួនទីតាំង និងផលដែលក្រុមហ៊ុនវិនិយោគទទួលបាន។ ការរុករក និងធ្វើអាជីវកម្មដោយគោរពតាមគោលការណ៍ច្បាប់ដែលបានកំណត់ នឹងនាំមកចូលចំណូលប្រកបដោយនិរន្តរភាព។ លោកបន្តថា នៅពេលចំណូលកើនឡើង វានឹងផ្តល់លទ្ធភាពកាន់តែច្រើនសម្រាប់រដ្ឋាភិបាលយកទៅចំណាយលើការវិនិយោគសាធារណៈ និងការអភិវឌ្ឍផ្សេងៗដូចជា ធនធានមនុស្ស សុខាភិបាល និងបច្ចេកវិទ្យា ជាដើម។
លោកបានបន្តថា៖«រដ្ឋាភិបាលអាចនឹងប្រមូលចំណូលពន្ធបានច្រើនថែមទៀត ប្រសិនបើការធ្វើបច្ចុប្បន្នភាពប្រភេទអាជីវកម្មកាន់តែមានភាពច្បាស់លាស់ និងតម្លាភាព»៕
