នាយករដ្ឋមន្ត្រីកម្ពុជា លោក ហ៊ុន ម៉ាណែត បាន​អំពាវនាវ​​ឱ្យ​វិនិយោគិន​ជប៉ុន​មក​ធ្វើ​​​ទស្សនកិច្ច​នៅ​កម្ពុជាដោយ​ផ្ទាល់ ​​ដើម្បី​ងាយ​ស្រួល​​​​ពិនិត្យ​មើល​សក្តានុពល​ និង​ស្វែងរកឱកាស​បណ្តាក់​ទុន​ ព្រម​ទាំង​បាន​ជំរុញឱ្យ​មាន​ការ​​បង្កើត​តំបន់​សេដ្ឋកិច្ច​ជប៉ុន​នៅ​កម្ពុជា​ផងដែរ។

ក្នុង​​«​វេទិកាធុរកិច្ច​កម្ពុជា-ជប៉ុន»​ដែលរៀបចំឡើង​សភាពាណិជ្ជកម្មកម្ពុជា(CCC) សហការជាមួយ​អង្គការពាណិជ្ជកម្មក្រៅប្រទេសជប៉ុន(JETRO) គណៈកម្មាធិការកិច្ចសហប្រតិបត្តិការសេដ្ឋកិច្ចនិងឧស្សាហកម្មអាស៊ាន-ជប៉ុន(AMEICC) និងធនាគារ Mizuho នៅ​​​ទីក្រុងតូក្យូ ប្រទេសជប៉ុន កាល​ពី​ល្ងាចថ្ងៃទី២៩ ខែ​ឧសភា ២០២៥ លោក ហ៊ុន ម៉ាណែត បាន​លើក​ឡើង​ពី​ទំនាក់​ទំនង​ដ៏​ល្អ​រវាង​កម្ពុជា-ជប៉ុន ដែល​មាន​​ជាង ៧ ទសវត្សរ៍​កន្លង​មក ដោយ​ប្រទេស​ទាំង ២ បាន​កសាង​នូវ​ចំណង​ការទូត​ដ៏​ល្អ​ប្រកបដោយ​ការ​យោគយល់ ជា​ពិសេស​ការ​ដំឡើង​កម្រិត​ទំនាក់​ទំនង​ជាមួយ​គ្នា​​ទៅ​ជា«​ភាព​ជា​ដៃគូ​យុទ្ធសាស្រ្ត​គ្រប់​ជ្រុងជ្រោយ ក្នុង​ឆ្នាំ​២០២៣» ដែល​​ជា​បង្គោលចរដ៏​សំខាន់​​បង្ហាញ​ពី​ការ​ប្តេជ្ញាចិត្តកាន់​តែ​ខ្លាំង​ចំពោះ​កិច្ច​សហប្រតិបត្តិការ​លើ​គ្រប់​វិស័យ​​នៃប្រទេស​ទាំង ២។

លោក​បន្ត​ថា រដ្ឋាភិបាល និង​ប្រជាជន​ជប៉ុន ​មិន​ត្រឹម​តែ​ចូល​រួម​ចំណែកសំខាន់​​ក្នុង​ដំណើរការ​កសាង​សន្តិភាព​ ធនធានមនុស្ស និង​ការ​អភិវឌ្ឍ​ហេដ្ឋារចនាសម្ព័ន្ធសង្គម និង​សេដ្ឋកិច្ច​កម្ពុជាប៉ុណ្ណោះ​ទេ ប៉ុន្តែ​​ជប៉ុន​ក៏​ត្រូវ​បាន​ចាត់​ទុក​​​ជាដៃគូមិន​អាច​ខ្វះបាន​របស់​កម្ពុជាផងដែរ។

លោកនាយករដ្ឋមន្ត្រី​​​លើក​ឡើងទៀត​​ថា «​វេទិកាធុរកិច្ច​កម្ពុជា-ជប៉ុន»​នឹង​​​ជួយ​ឱ្យវិនិយោគិនជប៉ុន​ទទួល​បាន​​ព័ត៌មាន​កាន់​តែ​ច្រើន និង​ជាក់លាក់​ពី​កម្ពុជា ក៏​ដូច​ជា​បង្កើត​នូវ​ទំនាក់ទំនង​​រវាង​ធុរជន​ និង​ធុរជន ​ដែល​អាច​​​ទាក់​ទាញ​ចំណាប់​អារម្មណ៍​វិនិយោគិន​ជប៉ុន​ឱ្យ​ធ្វើ​ដំណើរ​មក​​​កម្ពុជា​កាន់​តែ​ច្រើន​​ដើម្បី​ស្វែងរក​ឱកាស​​រីក​ចម្រើន​ជាមួយ​គ្នា​រវាង​ប្រទេស​ជប៉ុន និង​កម្ពុជា។


លោក​បានថ្លែង​​ថា៖​«ក្រោយ​បញ្ចប់​វេទិកានេះ អ្នក​ចូលរួម​ទាំង​អស់​នឹង​អាច​ស្វែងរក​ឃើញ​នូវ​ឱកាស​ក្នុង​ការ​តភ្ជាប់​ទំនាក់​ទំនង​ ក៏​ដូច​ជា​ក្តីសង្ឃឹម​ថា អ្នក​ទាំង​អស់​គ្នា​នឹង​មាន​ឱកាស​ធ្វើ​ដំណើរ​មក​កម្ពុជា។ សម្រាប់​អ្នក​ដែល​មិន​ទាន់​ធ្លាប់ទៅដល់​ប្រទេស​កម្ពុជា គឺ​យើងអាច​និយាយថា ប្រសិនបើ​អ្នក​ស្តាប់ ឬលឺ ១០០ដង គឺមិន​ស្មើនឹង​បាន​ឃើញ​ផ្ទាល់​ភ្នែកម្តង​នោះ​ទេ ដូច្នេះ​កម្ពុជា​សូម​ស្វាគមន៍ជានិច្ច​ ហើយ​សង្ឃឹមថា​អ្នក​ទាំង​អស់​គ្នានឹង​ស្វែងរកឃើញ​ឱកាស​ក្នុង​ការ​រីក​ចម្រើន​រួមគ្នា»។

ជាមួយ​គ្នា​នេះ លោក ម៉ាណែត ក៏​បាន​លើក​ឡើងពី​​និន្នាការ​​សេដ្ឋកិច្ច​ពិភពលោក​ដែល​​កំពុង​ផ្លាស់ប្តូរ ប៉ុន្តែ​សម្រាប់​​​ទំនាក់​ទំនង​លើ​គ្រប់​វិស័យ​រវាង​​កម្ពុជា-​ជប៉ុន គឺ​នៅ​តែ​​ល្អ​ប្រសើរ​ និង​កាន់​តែ​បន្ត​សញ្ញា​វិជ្ជមាន​​។ ជាក់ស្តែង​ក្នុង​ឆ្នាំ​ ២០២៤ កន្លង​មក​ទំហំ​ពាណិជ្ជកម្ម​ទ្វេភាគីនៃ​​ប្រទេស​ទាំង ២ ​បាន​កើន​​លើស​ ២ពាន់​លាន​ដុល្លារ​អាមេរិក ដែល​ការណ៍នេះ​​បង្ហាញ​យ៉ាង​ច្បាស់​ពី​ការ​រីក​លូតលាស់​នៃ​ការ​តភ្ជាប់​ទីផ្សារ​នៃ​ប្រទេស​ទាំង ២។ ទំនុកចិត្ត​របស់​វិនិយោគិនជប៉ុន អាច​ឆ្លុះបញ្ចាំងតាម​រយៈ​ការ​បន្ត​ពង្រីក​ជាបន្ត​បន្ទាប់ និង​ការ​វិនិយោគឡើងវិញ​នៃ​ធុរកិច្ចជប៉ុនលើទឹកដីកម្ពុជា។ កម្ម​វិបាក​នៃ​ភាព​ជា​ដៃគូនេះ គឺ​អាច​ឆ្លុះបញ្ចាំង​ឱ្យ​ឃើញ​តាម​រយៈ​សមិទ្ធផល​របស់​ក្រុមហ៊ុន​ឈានមុខ​មួយ​ចំនួនដែល​កំពុង​ទទួល​​ភាព​ជោគជ័យ​នៅ​កម្ពុជា ដូច​ជា ក្រុមហ៊ុន Toyota, Honda និង Aeon ជាដើម។​

លោក​អះអាង​ថា៖​«​វិនិយោគិន​ជប៉ុន​ គឺបង្ហាញ​ពី​ការ​ឈានមុខ​នៅ​ក្នុង​ជម្រៅ​គុណភាព និង​ផល​ប៉ះពាល់​រយៈ​ពេល​វែង ដោយ​មិន​ត្រឹម​តែ​នាំមក​នូវ​ដើម​ទុន​ប៉ុណ្ណោះទេ ប៉ុន្តែ​វិនិយោគិនជប៉ុន​ថែមទាំង​បាន​នាំយក​មក​នូវ​បច្ចេក​វិទ្យា​ ជំនាញ គុណភាព និង​ស្តង់ដាខ្ពស់ ដែល​ជួយ​លើក​កម្ពស់​ឧស្សាហកម្ម​នៅ​​កម្ពុជា និង​ជំរុញ​កំណើន​ប្រកបដោយ​និរន្តរភាព​។ យើង​វាយ​តម្លៃ​ជប៉ុន​មិន​ត្រឹម​តែ​ជា​ដៃគូ​ពាណិជ្ជកម្ម​ប៉ុណ្ណោះទេ ប៉ុន្តែ​ក៏​ជា​អ្នក​រួម​ចំណែក​ដ៏​គួរឱ្យ​ទុក​ចិត្ត​លើ​ភាព​ប្រកួត​ប្រជែង និង​ភាព​ធន់នៃ​អនាគត​របស់​កម្ពុជាផងដែរ​។​ បច្ចុប្បន្ន​ជប៉ុន​បាន​ឈរជើង​យ៉ាងមាំ ជា​វិនិយោគិន​ដ៏​លេចធ្លោ​បំផុត​មួយ​របស់​កម្ពុជា ជាមួយ​នឹង​វត្តមាន​ដ៏រឹងមាំ​ក្នុង​វិស័យ​ជាច្រើនដូចជា រថយន្ត អេឡិចត្រូនិក និង​ហេដ្ឋារចនាសម្ព័ន្ធ ជា​ដើម»​។

លោកបន្ថែម​ថា៖​«​ក្រុមហ៊ុនជប៉ុនកាន់តែ​ច្រើនឡើង បាន​និង​កំពុង​ស្វែងរក​ភាព​ជោគជ័យ​នៅ​កម្ពុជា ដែល​ការណ៍​នេះ​បង្ហាញ​ថា កម្ពុជា​មិនមែន​គ្រាន់​តែ​ជា​ទីកន្លែង​សម្រាប់​ការ​វិនិយោគ​ប៉ុណ្ណោះ​ទេ ប៉ុន្តែ​ក៏​ជា​ទីកន្លែង​សម្រាប់​ការ​រីកចម្រើន និង​លូតលាស់​សម្រាប់​រយៈ​ពេល​វែង»។

ប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា លោក គិត ម៉េង បានលើក​ឡើង​ថា ប្រទេសជប៉ុនបាន​ផ្ដល់ជូនធុរកិច្ចកម្ពុជា​នូវទីផ្សារសម្រាប់អ្នកប្រើប្រាស់ក្នុងស្រុកដ៏ធំមួយសម្រាប់ផលិតផល និងធនធានគុណភាពខ្ពស់របស់កម្ពុជា ព្រម​ទាំង​បាន​នាំមក​នូវ​​ភាពសម្បូរបែប និង​ជំនាញបច្ចេកវិទ្យាទំនើប និងវប្បធម៌នៃការច្នៃប្រឌិតឥតឈប់ឈរ​មក​​ប្រទេស​កម្ពុជា​។ ជាមួយ​គ្នា​នេះ រាជរដ្ឋាភិបាលកម្ពុជាមាន​ការ​ប្តេជ្ញាចិត្តយ៉ាងមុតមាំក្នុងការទាក់ទាញ និងគាំទ្រការវិនិយោគពីបរទេស និងអនុញ្ញាតឱ្យក្រុមហ៊ុន​បរទេសមានកម្មសិទ្ធិ ១០០ភាគរយ​ផងដែរ។

លោក​​និយាយថា៖«​សម្រាប់ធុរកិច្ចជប៉ុន ប្រទេសកម្ពុជាផ្តល់ជូនទីផ្សាររីកចម្រើន និងរស់រវើកបំផុត។កម្លាំងពលកម្មវ័យក្មេង និង​កាន់តែមានជំនាញដែលបាន​ត្រៀមខ្លួនជាស្រេចដើម្បីរួមចំណែកដល់ការរីកចម្រើន។ កម្ពុជា​ជា​ប្រទេស​ដែល​មាន​ទីតាំងយុទ្ធសាស្ត្រស្ថិត​នៅ​ចំបេះដូងអាស៊ាន ដែលផ្តល់នូវការចូលទៅកាន់ទីផ្សារដ៏ធំ ដែលមានអ្នកប្រើប្រាស់រាប់រយលាននាក់​នៅក្នុងប្រទេសជិតខាង រួមទាំងកិច្ចព្រមព្រៀង​ពាណិជ្ជកម្មសេរីដែលមានស្រាប់»។

ទាក់​ទង​នឹង​ដំណើរ​ការ​​​សិក្សា​រៀបចំតំបន់សេដ្ឋកិច្ចពិសេសជប៉ុន​នៅ​កម្ពុជា លោកនាយករដ្ឋមន្ត្រី ហ៊ុន ម៉ាណែត កាល​ពី​រសៀល​ថ្ងៃ​ទី​២៩ ខែ​ឧសភា​ ក៏​បាន​ជួប​ពិភាក្សា​ជាមួយ​លោកសាស្រ្តាចារ្យ WATANABE Tetsuya ប្រធានវិទ្យាស្ថានស្រាវជ្រាវសេដ្ឋកិច្ចអាស៊ាន និងអាស៊ីបូព៌ា (Economic Research Institute for ASEAN and East Asia-ERIA) និងសហការី ផងដែរ។​

ក្នុងជំនួប​នេះ ​លោកសាស្រ្តាចារ្យប្រធានវិទ្យាស្ថាន ERIA បានប្រាប់​ថ្នាក់​ដឹក​នាំកម្ពុជា​អំពី​​លទ្ធផលនៃការសិក្សាសមិទ្ធិលទ្ធភាព (Feasibility Study) ក្នុងការរៀបចំតំបន់សេដ្ឋកិច្ចពិសេស (SEZs) សម្រាប់បម្រើដល់ការវិនិយោគជាក់លាក់​ តាមប្រភេទឧស្សាហកម្ម ឬ​ប្រទេស ដោយបានគូសបញ្ជាក់អំពីចំណុចសំខាន់ៗ និងតម្រូវការជាក់ស្ដែងក្នុងការបង្កើតគំរូតំបន់សេដ្ឋកិច្ចពិសេសនេះ។

ជាការឆ្លើយតប លោក ហ៊ុន ម៉ាណែត បានវាយតម្លៃខ្ពស់ចំពោះកិច្ចខិតខំប្រឹងប្រែងរបស់វិទ្យាស្ថាន ERIA ក្នុងការ​សិក្សាសមិទ្ធិលទ្ធភាពនេះ។ ជាមួយគ្នានេះលោក​​ក៏បានលើកទឹកចិត្តដល់វិទ្យាស្ថាន ERIA ឱ្យ​បន្តភ្ជាប់ទំនាក់ទំនង ក៏ដូចជាពិភាក្សាជាមួយក្រសួង-ស្ថាប័នពាក់ព័ន្ធ​ ដើម្បីសិក្សាលម្អិតបន្ថែមទៀតអំពីដំណើរការនៃការរៀបចំអភិវឌ្ឍ SEZ​ នេះ។

ប្រធាន​ក្រុម​ប្រឹក្សាភិបាល​នៃ​សម្ព័ន្ធ​ក្រុមហ៊ុន SAM SN GROUP លោក សំ សុខនឿន ដែល​បាន​ទៅចូល​រួមផ្ទាល់ក្នុង​​«​វេទិកាធុរកិច្ច​កម្ពុជា-ជប៉ុន»​​ក្នុង​បាន​ប្រាប់​ភ្នំពេញប៉ុស្តិ៍​ក្នុង​ថ្ងៃ​ទី៣០ ខែឧសភា ថា តំបន់​សេដ្ឋកិច្ច​ពិសេស(SEZ)​ កំពុង​ដើរ​តួនាទីយ៉ាង​សំខាន់​ក្នុង​ការ​ជួយ​ទាក់ទាញ​ និង​លើក​ទឹក​ចិត្ត​ឱ្យ​អ្នក​វិនិយោគ​ចម្រុះ​ជាតិសាសន៍​ចូល​មក​បណ្តាក់​ទុន​នៅ​កម្ពុជា​កាន់​តែ​ច្រើន។ ប្រសិន​បើ​នៅ​កម្ពុជា​មាន​តំបន់​សេដ្ឋកិច្ច​ដែល​វិនិយោគដោយ​វិនិយោគិនជប៉ុន គឺ​ប្រាកដ​ជា​អាច​ទាក់​ទាញ​​វិនិយោគិន​ជប៉ុនបាន​កាន់​តែ​ច្រើន ជាក់​ស្តែង​ការ​វិនិយោគលើ​តំបន់​សេដ្ឋកិច្ច​ពិសេស​ពី​សំណាក់​វិនិយោគិន​ចិន បាន​ជួយ​ទាក់​ទាញ​វិនិយោគិន​ចិន​ជា​ច្រើន​ឱ្យ​ចូល​មក​កម្ពុជា។​​

លោក​បន្ត​ថា ​តំបន់​សេដ្ឋកិច្ច​ពិសេសតែង​ផ្តល់​នូវ​​ភាព​ងាយ​ស្រួល​សម្រាប់​វិនិយោគិន ដោយ​ក្នុង​តំបន់​សេដ្ឋកិច្ច​ពិសេស​ គឺ​មាន​ការ​រៀបចំ​ហេដ្ឋារចនា​សម្ព័ន្ធ​គាំទ្រ​ដូច​ជា​ផ្លូវថ្នល់ ថាមពល និង​ការិយាល័យ​ឯកសារ​(ច្រកចេញ​ចូល​តែមួយ)​ដែល​បង្ក​ភាពងាយ​ស្រួល និង​ស្រប​តាម​តម្រូវ​ការ​របស់​ម្ចាស់​រោងចក្រ​/សហគ្រាស។

លោក​បានអះអាង​ថា៖​«​គ្រប់​សកម្ម​ភាព​អាជីវកម្ម​របស់​រោងចក្រ​/សហគ្រាស នៅ​ក្នុង​តំបន់​សេដ្ឋកិច្ច​ពិសេស​ គឺ​មាន​ភាព​ងាយ​ស្រួល​សម្រាប់​អ្នក​វិនិយោគ​ ដោយ​រាប់​ចាប់​តាំង​ពី​ការ​ស្នើសុំ​នាំចូល​ទំនិញ​ជា​វត្ថុធាតុ​ដើម​សម្រាប់​ផលិត​/កែច្នៃ រហូត​ដល់​ការ​នាំ​ចេញ​ទៅ​ទីផ្សារ​អន្តរជាតិ។ យើង​កំពុង​ខិតខំ​ជំរុញ​ឱ្យ​មាន​ការ​បង្កើត​តំបន់​សេដ្ឋកិច្ច​ជប៉ុន​នៅ​កម្ពុជា​»៕