លោក សុខ ពិសិដ្ឋ (ស្តាំ) ប្តូរ MoU ជាមួយលោក Datuk Ng Yih Pyng។ CCC
ផ្នែកឯកជនកម្ពុជា-ម៉ាឡេស៊ី បានចុះអនុស្សារណៈយោគយល់គ្នា(MoU) ដើម្បីបង្កើតក្របខណ្ឌសម្រាប់ការលើកកម្ពស់ទំនាក់ទំនងសេដ្ឋកិច្ច និងពាណិជ្ជកម្មទ្វេភាគីឱ្យកាន់តែធំបន្ថែមទៀត ខណៈក្នុងឆ្នាំ២០២៤ ការផ្លាស់ប្តូរទំនិញរវាងប្រទេសទាំង ២ មានទឹកប្រាក់ជាង ៨៦៥លានដុល្លារ។
ពិធីចុះកិច្ច Mou រវាងផ្នែកឯកជនកម្ពុជា និងផ្នែកឯកជនម៉ាឡេស៊ី ដែលតំណាងដោយសភាពាណិជ្ជកម្មកម្ពុជា(CCC) និងសភាពាណិជ្ជកម្មនិងឧស្សាហកម្មចិនម៉ាឡេស៊ី(The Associated Chinese Chambers of Commerce and Industry of Malaysia (ACCCIM) ត្រូវបានធ្វើឡើងក្នុងជំនួបពិភាក្សានៅទីស្នាក់ការរបស់សភាពាណិជ្ជកម្មកម្ពុជា នាថ្ងៃទី៦ ខែឧសភា។
MoU នេះត្រូវបានចុះហត្ថលេខារវាងលោក សុខ ពិសិដ្ឋ អនុប្រធានសភាពាណិជ្ជកម្មកម្ពុជា ជាមួយលោក Datuk Ng Yih Pyng ប្រធានសភាពាណិជ្ជកម្មនិងឧស្សាហកម្មចិនម៉ាឡេស៊ី (ACCCIM president, Datuk Ng Yih Pyng)។
អនុប្រធានសភាពាណិជ្ជកម្មកម្ពុជា និងជាប្រធានក្រុមប្រឹក្សាពិគ្រោះយោបល់ធុរកិច្ចអាស៊ានសម្រាប់កម្ពុជា លោក សុខ ពិសិដ្ឋ បានថ្លែងថា ជំនួបនេះធ្វើឡើងក្នុងគោលបំណងដើម្បីពង្រឹងទំនាក់ទំនងរវាងស្ថាប័នទាំងពីរ និងកំណត់វិស័យសំខាន់ៗសម្រាប់កិច្ចសហប្រតិបត្តិការនាពេលអនាគត ព្រមជាមួយនឹងការចុះអនុស្សារណៈយោគយល់គ្នា ដើម្បីបង្កើតក្របខណ្ឌសម្រាប់ការលើកកម្ពស់ទំនាក់ទំនងសេដ្ឋកិច្ច ការជំរុញពាណិជ្ជកម្ម ការវិនិយោគ និងការសម្របសម្រួលកិច្ចសហប្រតិបត្តិការរវាងសហគមន៍ធុរកិច្ចនៃប្រទេសទាំងពីរ។
លោកក៏បានលើកឡើងពីទំនាក់ទំនងសេដ្ឋកិច្ចដ៏ជិតស្និទ្ធរវាងប្រទេសកម្ពុជា និងម៉ាឡេស៊ី តាមរយៈកំណើនទំហំពាណិជ្ជកម្ម និងការវិនិយោគរបស់ម៉ាឡេស៊ីនៅក្នុងវិស័យសំខាន់ៗនៅកម្ពុជា។ ជាមួយគ្នានេះកំណើនសេដ្ឋកិច្ចកម្ពុជាក៏កំពុងមានភាពវិជ្ជមានផងដែរ ដែលជំរុញដោយកម្លាំងពលកម្មវ័យក្មេង និងស្វាហាប់ បរិយាកាសវិនិយោគអំណោយផល និងគោលនយោបាយរដ្ឋាភិបាលជាយុទ្ធសាស្ត្រ ខណៈរដ្ឋាភិបាលកម្ពុជា មានចក្ខុវិស័យក្នុងការប្រែក្លាយកម្ពុជាទៅជាប្រទេសមានប្រាក់ចំណូលខ្ពស់នៅឆ្នាំ ២០៥០។
លោក Datuk Ng Yih Pyng បានសម្តែងនូវសុទិដ្ឋិនិយមចំពោះកិច្ចសហប្រតិបត្តិការនេះ និងបានបញ្ជាក់ថា គោលបំណងចម្បងនៃដំណើរទស្សនកិច្ចរបស់លោកធ្វើដំណើរមកកម្ពុជានាពេលនេះ គឺដើម្បីស្វែងរកឱកាសសហប្រតិបត្តិការដែលមានសក្តានុពល និងជំរុញព្រឹត្តិការណ៍ធុរកិច្ចក្នុងអាស៊ាន ដូចជា សន្និសីទសហគ្រិនវ័យក្មេង ACCCIM លើកទី១៤ សន្និសីទកំពូលធុរកិច្ចអាស៊ាន AI និងសន្និសីទមេដឹកនាំធុរកិច្ចចិនអាស៊ាន ឆ្នាំ ២០២៥ ជាដើម។
យោងតាមសេចក្តីប្រកាសព័ត៌មានរបស់ CCC នៅក្នុងជំនួបខាងលើ ភាគីទាំងពីរក៏បានជជែកពិភាក្សា និងស្វែងយល់បន្ថែមអំពីទិដ្ឋភាពពាណិជ្ជកម្ម និងឱកាសវិនិយោគររបស់ប្រទេសទាំងពីរ ព្រមទាំងកិច្ចសហប្រតិបត្តិការរវាងសភាពាណិជ្ជកម្មកម្ពុជា និងសភាពាណិជ្ជកម្មនិងឧស្សាហកម្មចិនម៉ាឡេស៊ី តាមរយៈការបង្កើតឱកាសថ្មីៗសម្រាប់ពាណិជ្ជកម្ម និងការវិនិយោគ ដែលរួមចំណែកដល់ការអភិវឌ្ឍសេដ្ឋកិច្ចនៃប្រទេសទាំងពីរ និងជំរុញទំនាក់ទំនងកាន់តែរឹងមាំរវាងសហគមន៍ធុរកិច្ចកម្ពុជា និងម៉ាឡេស៊ី។
ប្រធានសម្ព័ន្ធក្រុមហ៊ុន SAM SN Group និងជាសមាជិកសភាពាណិជ្ជកម្មកម្ពុជា លោក សំ សុខនឿន ដែលបានចូលរួមក្នុងកិច្ចប្រជុំខាងលើ បានប្រាប់ភ្នំពេញប៉ុស្តិ៍នៅថ្ងៃទី៦ ខែឧសភាថា MoU ដែលសភាពាណិជ្ជកម្មប្រទេសទាំង ២ បានចុះហត្ថលេខានេះនឹងនាំមកនូវផលប្រយោជន៍ជាច្រើនសម្រាប់ភាគីទាំង ២ ជាពិសេសកម្ពុជានឹងអាចទាក់ទាញវិនិយោគិនម៉ាឡេស៊ីកាន់តែច្រើនឱ្យចូលមកបណ្តាក់ទុនផ្ទាល់។
លោកបន្តថា បច្ចុប្បន្ននេះវិនិយោគិនម៉ាឡេស៊ីបាននិងកំពុងបណ្តាក់ទុននៅក្នុងវិស័យមួយចំនួននៅកម្ពុជា ដូចជា រោងចក្រ(ពិសេសរោងចក្រកាត់ដេរ) អចលនទ្រព្យ សំណង់ កសិកម្ម សណ្ឋាគារ ប្រព័ន្ធទូរស័ព្ទ និងបច្ចេកវិទ្យា ជាដើម។
លោកបន្តថា៖«នៅពេលមានការវិនិយោគផ្ទាល់កាន់តែច្រើន គឺវានឹងជួយបង្កើតការងារ និងប្រាក់ចំណូលជាតិកាន់តែច្រើន។ វាក៏ជួយលើកកម្ពស់ទំហំពាណិជ្ជកម្មអន្តរជាតិរបស់កម្ពុជាផងដែរ»។
លោកបានបន្ថែមថា ទំនិញដែលម៉ាឡេស៊ីនាំមកកម្ពុជាភាគច្រើនជា គ្រឿងម៉ាស៊ីន ឧបករណ៍អេឡិចត្រូនិក-អគ្គិសនី ប្រេងឥន្ទនៈ អាលុយមីញ៉ូម ចំណីអាហារ និងផ្លាស្ទីក ជាដើម។ ចំណែកទំនិញកម្ពុជានាំទៅម៉ាឡេស៊ី ភាគច្រើនគឺជាផលិតផលក្នុងវិស័យកសិកម្ម៕
