ថ្នាក់ដឹកនាំក្រុមប្រឹក្សាអភិវឌ្ឍន៍កម្ពុជា ជួបពិភាក្សាជាមួយវិនិយោគិនបរទេស។ CDC
គម្រោងវិនិយោគចំនួន ៥៩ ដែលមានទុនសរុប ៨៦០ លានដុល្លារត្រូវបានក្រុមប្រឹក្សាអភិវឌ្ឍន៍កម្ពុជា(CDC) អនុម័តនៅក្នុងខែមេសា ឆ្នាំ ២០២៥ ដែលធ្វើឱ្យចំនួនគម្រោងវិនិយោគបានអនុម័តក្នុងរយៈពេល ៤ខែដើមឆ្នាំ ២០២៥ មានរហូតដល់ ២៣១។
សេចក្តីប្រកាសព័ត៌មានរបស់ CDC ចេញផ្សាយកាលពីល្ងាចថ្ងៃទី៦ ខែឧសភា ឱ្យដឹងថា ក្នុងខែមេសា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តឱ្យគម្រោងវិនិយោគសរុប ៥៩ ដែលមានទុនវិនិយោគសរុប ៨៦០លានដុល្លារ និងអាចបង្កើតការងារបាន ៣៩ ពាន់កន្លែង។ គម្រោងទាំងនោះគឺមានចំនួន ៣២ ស្ថិតនៅក្រៅតំបន់សេដ្ឋកិច្ចពិសេស និង ២៧ ស្ថិតក្នុងតំបន់សេដ្ឋកិច្ចពិសេស។ ជារួមការអនុម័តគម្រោងវិនិយោគក្នុងខែមេសា ឆ្នាំ២០២៥ ធៀបនឹងខែមេសា ឆ្នាំ២០២៤ គឺកើនឡើងចំនួន ៣៧ ស្មើនឹងប្រមាណ ១៦៨ ភាគរយ ខណៈទុនវិនិយោគឡើងជាង ៥៥០លានដុល្លារ ស្មើនឹងប្រមាណ ១៧៨ភាគរយ។
បើសរុបនៅក្នុងរយៈពេល ៤ខែដើមឆ្នាំ ២០២៥ គឺ CDC បានអនុម័តឱ្យគម្រោងវិនិយោគ ២៣១ ក្រោមទុនវិនិយោគ ៣,៤ ពាន់លានដុល្លារ។ បើប្រៀបធៀបនឹងរយៈពេល ៤ ខែដើមឆ្នាំ ២០២៤ គឺចំនួនគម្រោងវិនិយោគ បានកើនឡើងចំនួន ១០៣ ស្មើនឹងប្រមាណ ៨០ភាគរយ ខណៈទុនវិនិយោគកើនឡើងជាង ៨៥៦លានដុល្លារ ស្មើនឹងប្រមាណ ៣៤ភាគរយ។
យោងតាម CDC គម្រោងសំខាន់ៗដែលអនុម័តក្នុងខែមេសា មានដូចជា គម្រោងបង្កើតរោងចក្រផលិតសំបកកង់រថយន្ត មានទុនវិនិយោគ ២៤២ លានដុល្លារនៅតំបន់សេដ្ឋកិច្ចពិសេស ISI (ខេត្តព្រះសីហនុ), រោងចក្រផលិតសំបកកង់រថយន្ត មានទុន ៩៣ លានដុល្លារ នៅក្នុងតំបន់សេដ្ឋកិច្ចពិសេស ឈី លូ ជាន ពុ ចាយ(ខេត្តស្វាយរៀង) ព្រមទាំងគម្រោងមួយចំនួនទៀតដូចជា រោងចក្រផលិតសម្ភារប្រើប្រាស់ក្នុងផ្ទះ, រោងចក្រផលិត និងផ្គុំដំឡើងបន្ទះសូឡា និងគ្រឿងបង្គុំ, គម្រោងវិនិយោគផែស្ងួត, រោងចក្រផលិតឧបករណ៍បរិក្ខាពេទ្យ, រោងចក្រផ្គុំ និងដំឡើងត្រីចក្រយានយន្តអគ្គិសនី និងគម្រោងបង្កើតរមណីយដ្ឋានទេសចរណ៍ ជាដើម។
CDC បានឱ្យដឹងទៀតថា ក្នុងខែមេសា ឆ្នាំ២០២៥ វិនិយោគិនចិននៅតែបន្តឈរលើគេក្នុងការបណ្តាក់ទុននៅកម្ពុជា ដោយមានចំណែក ៥៨,៥១ ភាគរយនៃទុនវិនិយោគសរុប, សិង្ហបុរី ៣៥,១ ភាគរយ, កម្ពុជា ៤,៥១ភាគរយ, អង់គ្លេស ១,៦៥ភាគរយ និងអាមេរិក ០,២៣ភាគរយ។
អ្នកសេដ្ឋកិច្ចនៃរាជបណ្ឌិត្យសភាកម្ពុជា លោក ហុង វណ្ណៈ បានប្រាប់ភ្នំពេញប៉ុស្តិ៍ក្នុងថ្ងៃទី៧ ខែឧសភាថា កំណើននៃការអនុម័តរបស់ CDC គឺបញ្ជាក់ពីទំនុកចិត្ត និងការមើលឃើញពីឱកាសពីសំណាក់អ្នកវិនិយោគចំពោះការវិនិយោគទុនផ្ទាល់នៅកម្ពុជា ដែលជាទីតាំងមានភាពអំណោយផលទាំងកត្តាខាងក្នុង និងខាងក្រៅ។
លោកពន្យល់ថា កត្តាខាងក្នុង គឺប្រទេសកម្ពុជាមានស្ថិរភាពនយោបាយល្អ មានកំណើនសេដ្ឋកិច្ចរឹងមាំ មានច្បាប់វិនិយោគអំណោយផល មានហេដ្ឋារចនាសម្ព័ន្ធដឹកជញ្ជូនល្អ សម្បូរកម្លាំងពលកម្មវ័យក្មេង មានធនធានធម្មជាតិច្រើន និងមានទីតាំងស្ថិតនៅចំកណ្តាលតំបន់អាស៊ាន។
ចំណែកកត្តាខាងក្រៅ គឺរដ្ឋាភិបាលកម្ពុជាបង្កើតបានកិច្ចព្រមព្រៀងពាណិជ្ជកម្មអន្តរជាតិជាមួយនឹងប្រទេសជាច្រើន ដូចជា ចិន កូរ៉េ ព្រមទាំងកិច្ចព្រមព្រៀងពាណិជ្ជកម្មពហុភាគី RCEP ដែលមានប្រទេសជាសមាជិកចំនួន ១៥ ផងដែរ។
លោកបានថ្លែងថា៖«បើមិននិយាយពីសម្ពាធផ្នែកពន្ធគយដែលអាមេរិកបានប្រកាសដាក់មកលើប្រទេសជាច្រើន រួមទាំងកម្ពុជា កាលពីពេលថ្មីៗនេះ គឺខ្ញុំគិតថា កម្ពុជាគឺជាជម្រើសដ៏ល្អសម្រាប់អ្នកវិនិយោគ ព្រោះការបណ្តាក់ទុននៅកម្ពុជា មិនត្រឹមតែទទួលបានការយកចិត្តទុកដាក់ និងអាចទទួលបានភាពអនុគ្រោះច្រើនពីរដ្ឋាភិបាលប៉ុណ្ណោះទេ ប៉ុន្តែនៅកម្ពុជាក៏សម្បូរកម្លាំងពលកម្មវ័យក្មេងដែលមានចំណេះដឹង និងជំនាញច្រើនផងដែរ»៕
