ទិដ្ឋភាពទូកុងតឺន័រជាច្រើននៅក្នុងបរិវេណកំពង់ផែស្វយ័តភ្នំពេញ។ PPAP
កុងតឺន័រសរុបជាង ២០ម៉ឺនបានឆ្លងកាត់កំពង់ផែស្វយ័តភ្នំពេញ(PPAP) ក្នុងរយៈពេល ៥ខែដើមឆ្នាំ ២០២៥ ដោយកើនឡើងជិត ៣០ភាគរយបើធៀបនឹងរយៈពេលដូចគ្នាក្នុងឆ្នាំ ២០២៤ ខណៈបរិមាណទំនិញ-ប្រេងឥន្ទនៈឆ្លងកាត់មានជាង ២លានតោន។
សេចក្តីប្រកាសព័ត៌មានរបស់កំពង់ផែស្វយ័តភ្នំពេញ ដែលជាអង្គភាពចុះបញ្ជីនៅផ្សារមូលបត្រកម្ពុជា(CSX) បានឱ្យដឹងថា ចាប់ពីខែមករា ដល់ខែឧសភា ឆ្នាំ ២០២៥ អង្គភាពមួយនេះទទួលបាននាវាដឹកទំនិញ ឆ្លងកាត់សរុប ១ ៤៧៨ គ្រឿង កើនឡើង ១,៤៤ភាគរយបើធៀបនឹងរយៈពេលដូចគ្នាក្នុងឆ្នាំ២០២៤។ សម្រាប់កុងតឺន័រ ឆ្លងកាត់ គឺមានចំនួន ២០៦ ០៥៥ ធីអ៊ីយូ(TEU) កើនឡើង ២៨,៧៥ភាគរយ និងបរិមាណទំនិញ-ប្រេងឥន្ទនៈឆ្លងកាត់ ២ ១៧៤ ៨៦៤តោន កើនឡើង ២១,៣៣ភាគរយ។
បើគេមើលទៅលើនាវាដឹកអ្នកដំណើរ គឺមានចំនួន ១៨៤ គ្រឿង កើនឡើង ៣,៩៥ ភាគរយ និងមានអ្នកដំណើរសរុប ១៩ ៦៩៥នាក់ កើនឡើង ៩,៨១ភាគរយ។
ប្រធានសមាគមពាណិជ្ជករដឹកជញ្ជូន និងខ្សែច្រវាក់ផ្គត់ផ្គង់នៅកម្ពុជា លោក ជា ចាន់ដារ៉ា បានប្រាប់ភ្នំពេញប៉ុស្តិ៍ក្នុងថ្ងៃទី១២ ខែមិថុនា ថា កំណើនការចូលមកបណ្តាក់ទុនថ្មីៗ និងកំណើនទិន្នផលកសិកម្ម បានធ្វើឱ្យសកម្មភាពនៃការដឹកជញ្ជូនទំនិញនៅកម្ពុជាកើនឡើងជាបន្តបន្ទាប់ ខណៈសមត្ថភាពនៃការលើកដាក់ទំនិញ និងឃ្លាំងស្តុកនៅកំពង់ផែភ្នំពេញក៏ត្រូវបានពង្រីកផងដែរ។ លោកបន្តថា ភាពវិជ្ជមានទាំងនេះនឹងមានសម្ទុះកាន់តែខ្លាំងនៅពេលស្ថានភាពសេដ្ឋកិច្ចពិភពលោកល្អប្រសើរ ជាពិសេសទាក់ទងនឹងទីផ្សារសហរដ្ឋអាមេរិក។
លោកបានបញ្ជាក់ថា៖«លំហូរវិនិយោគិនចូលមកបណ្តាក់ទុននៅកម្ពុជា នឹងក្លាយជាចំណែកដ៏ធំធេងក្នុងការជំរុញឱ្យសកម្មភាពពាណិជ្ជកម្ម និងការដឹកជញ្ជូននៅកម្ពុជាកាន់តែសកម្មជាងមុន។ ការដឹកជញ្ជូនតាមផ្លូវទឹកនឹងកាន់តែមមាញឹក ព្រោះជាមធ្យោបាយដែលមានតម្លៃទាប និងអាចដឹកបានច្រើនជាងមធ្យោបាយផ្សេងៗទៀត»។
បន្ថែមលើនេះ លោកក៏លើកឡើងពីគម្រោងព្រែកជីកហ្វូណន តេជោ ដែលចាប់ផ្តើមសាងសង់នៅពេលនេះថា នឹងចូលរួមចំណែកយ៉ាងច្រើនក្នុងការតភ្ជាប់ពីការដឹកជញ្ជូនទំនិញពីផ្លូវទឹកក្នុងប្រទេស ទៅកាន់ទីផ្សារអន្តរជាតិ។
លោកអះអាងថា៖«ប្រាកដណាស់ គឺភាពមមាញឹកនៃកំពង់ផែស្វយ័តភ្នំពេញនឹងមានកាន់តែខ្លាំងនៅពេលគម្រោងព្រែកជីកហ្វូណន តេជោ បើកឱ្យដំណើរការ»។
ប្រធានលេខាធិការដ្ឋាននៃកំពង់ផែស្វយ័តភ្នំពេញ លោក គង់ ចាន់នី កាលពីពេលថ្មីៗនេះបាននិយាយថា ប្រតិបត្តិការរបស់កំពង់ផែស្វយ័តភ្នំពេញត្រូវបានរំពឹងថានឹងមានកំណើនខ្ពស់បន្ថែមទៀតនៅពេលខាងមុខ ខណៈ PPAP កំពុងដាក់សំណើទៅថ្នាក់ដឹកនាំជាន់ខ្ពស់នៃរាជរដ្ឋាភិបាល ដើម្បីបើកដំណើរការផែរណបចំនួន ៧ ទីតាំងបន្ថែមទៀត។ ផែរណបទាំងនោះ មាននៅក្នុងខេត្តកំពង់ឆ្នាំង ២ កន្លែង, ខេត្តកណ្តាល ២, ខេត្តសៀមរាប កំពង់ចាម និងក្រចេះ ចំនួន ១ ទីតាំង។
បច្ចុប្បន្នកំពង់ផែស្វយ័តភ្នំពេញមានចំណត និងផែរណបចំនួន ៧ទីតាំង ដោយមាននៅភ្នំពេញ ៣ ទីតាំង, ២ នៅក្នុងខេត្តកណ្តាល និង ១ទីតាំងនៅក្នុងខេត្តព្រៃវែង និងត្បូងឃ្មុំ ដែលផែទាំងអស់នេះបានដើរតួនាទីយ៉ាងសំខាន់ក្នុងការដឹកជញ្ជូនកសិផល ព្រមទាំងទំនិញធ្ងន់ៗមួយចំនួន។
កាលពីឆ្នាំ២០២៤ កំពង់ផែស្វយ័តភ្នំពេញរកចំណូលបានប្រមាណជាង ៤១ លានដុល្លារ កើនឡើង ២១ ភាគរយធៀបឆ្នាំ២០២៣ ចំណែកទូរកុងតឺន័រ បានកើនឡើងជិត ៥០ម៉ឺនធីអ៊ីយូ៕
