កម្មករលីអង្ករពីឃ្លាំងទៅដាក់លើរថយន្ត។ ភ្នំពេញប៉ុស្តិ៍
កម្ពុជារកប្រាក់បានជិត ១ ពាន់លានដុល្លារពីការនាំចេញស្រូវ(Paddy Rice) និងអង្ករ(Milled Rice) ទៅទីផ្សារអន្តរជាតិក្នុងរយៈពេល ៥ខែ ដើមឆ្នាំ២០២៥ កើនជិត ៧ ភាគរយបើធៀបនឹងរយៈពេលដូចគ្នាកាលពីឆ្នាំ២០២៤។ នេះបើយោងតាមសហព័ន្ធស្រូវអង្ករកម្ពុជា(CRF)។
ទិន្នន័យ CRF ដែលផ្សព្វផ្សាយក្នុងថ្ងៃទី៤ ខែមិថុនា ឱ្យដឹងថា ចាប់ពីខែមករា ដល់ខែឧសភា ឆ្នាំ២០២៥ កម្ពុជាប្រមូលប្រាក់បានពីការនាំចេញស្រូវ និងអង្ករទៅក្រៅប្រទេសសរុប ៩៩៣,២៤ លានដុល្លារ កើនឡើង ៦,៧៨ភាគរយបើធៀបនឹងរយៈពេលដូចគ្នាឆ្នាំ២០២៤។
យោងតាម CRF សម្រាប់ការនាំចេញអង្ករ គឺទៅកាន់គោលដៅចំនួន ៦៣ប្រទេស/ដែនដី ដោយមានបរិមាណ ៣៤៤ ១៩៩ តោន គិតជាប្រាក់ចំនួន ២៥២,៣ លានដុល្លារ(រយៈពេល ៥ខែ ឆ្នាំ២០២៤ មានទឹកប្រាក់ ២១៩,៩១លានដុល្លារ)។ ប្រទេសនៅក្នុងតំបន់អឺរ៉ុបបានទទួលទិញអង្ករពីកម្ពុជាច្រើនជាងគេ ជាមួយនឹងបរិមាណ ១៦០ ៧៣២ តោន (ស្មើនឹងប្រាក់ ១២៦,៧៥ លានដុល្លារ), ប្រទេសចិន និងតំបន់រដ្ឋបាលស្វយ័ត ៩០ ៦៦៥តោន (៥២,២៥ លានដុល្លារ), ប្រទេសសមាជិកអាស៊ាន ៤៩ ៧០០តោន (៣៤,៥៦លានដុល្លារ), និងប្រទេសចំនួន ៣០ ផ្សេងទៀតនៅតំបន់អាហ្វ្រិក មជ្ឈឹមបូព៌ា មានបរិមាណ ៤៣ ០៩៩តោន (៣៧,៨លានដុល្លារ)។
ចំណែកការនាំចេញស្រូវទៅលក់ឱ្យប្រទេសជិតខាង សម្រេចបាន ៣ ១០២ ៩៧៣ តោន ដោយទទួលបានប្រាក់ ៧៤០,៩៤លានដុល្លារ កើនពី ៧១០,២៣លានដុល្លារកាលពីរយៈពេល ៥ខែដើមឆ្នាំ២០២៤។
កាលពីឆ្នាំ២០២៥ កម្ពុជារកចំណូលពីការនាំចេញស្រូវ និងអង្ករ បានចំនួន ១ ៩៨៧,១៦លានដុល្លារ ក្នុងនោះការនាំចេញស្រូវ មានទឹកប្រាក់ ១ ៤៩៦ លានដុល្លារ និងនាំចេញអង្ករ ៤១៩,១៩ លានដុល្លារ៕
