ប្រជាកសិករបង្ហាញគ្រាប់ស្វាយចន្ទីទើបប្រមូលផលបាន។ វៀតណាម គឺជាទីផ្សារដ៏ធំដែលតែងទិញគ្រាប់ស្វាយចន្ទីមិនទាន់កែច្នៃពីកម្ពុជា។ ភ្នំពេញប៉ុស្តិ៍
អ្នកសេដ្ឋកិច្ចមានសុទិដ្ឋិនិយមថា ការនាំទំនិញដែលមានដើមកំណើតនៅកម្ពុជាទៅទីផ្សារប្រទេសវៀតណាម នឹងហក់ឡើងកាន់តែច្រើនបន្ទាប់ពីរដ្ឋាភិបាលវៀតណាម សម្រេចផ្តល់ភាពអនុគ្រោះពន្ធសូន្យភាគរយ(០%) លើមុខទំនិញកម្ពុជាចំនួន ២៨ បន្ទាត់ពន្ធគយ សម្រាប់រយៈពេល ២ឆ្នាំ។
សេចក្តីជូនដំណឹងក្រសួងពាណិជ្ជកម្ម ចុះថ្ងៃទី៣ ខែមិថុនា ឱ្យដឹងថា ក្រោមកិច្ចសម្របសម្រួលជំរុញពាណិជ្ជកម្មទ្វេភាគីរវាងរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋសង្គមនិយមវៀតណាម ដែលចុះហត្ថលេខាកាលពីថ្ងៃទី២៨ ខែមេសា ឆ្នាំ២០២៥ ក្នុងនោះប្រទេសកម្ពុជា នឹងទទួលបានភាពអនុគ្រោះពន្ធសូន្យភាគរយ(០%) នូវមុខទំនិញដែលមានដើមកំណើតនៅប្រទេសកម្ពុជា ចំនួន ២៨ បន្ទាត់ពន្ធគយពីសាធារណរដ្ឋសង្គមនិយមវៀតណាមសម្រាប់អនុវត្តឆ្នាំ២០២៥-២០២៦។
ក្នុងន័យជំរុញការអនុវត្តសេចក្តីជូនដំណឹងខាងលើ ក្រសួងពាណិជ្ជកម្ម បានលើកឡើងថា៖«ផលិតករ និងអ្នកនាំចេញអាចធ្វើការស្នើសុំវិញ្ញាបនបត្របញ្ជាក់ដើមកំណើតទំនិញ ទម្រង់ អេស (CO Form S) តាមរយៈគេហទំព័រ https://co.moc.gov.kh ចំពោះមុខទំនិញដូចមានក្នុងឧបសម្ព័ន្ធ ១ ដើម្បីនាំចេញទៅកាន់សាធារណរដ្ឋសង្គមនិយមវៀតណាម ក្រោមអត្រាអនុគ្រោះពន្ធសូន្យភាគរយ (0%)»។
សេចក្តីជូនដំណឹងបានបន្តថា ដោយឡែកសម្រាប់បរិមាណមុខទំនិញអង្ករ និងសន្លឹកថ្នាំជក់ សម្រាប់អនុវត្តឆ្នាំ២០២៥ សូមផលិតករ និងអ្នកនាំចេញមកដាក់ពាក្យស្នើសុំនៅក្រសួងពាណិជ្ជកម្ម (នាយកដ្ឋាននាំចេញ នាំចូលនៃអគ្គនាយកដ្ឋានសេវាពាណិជ្ជកម្ម) រៀងរាល់ម៉ោងធ្វើការចាប់ពីថ្ងៃជូនដំណឹងរហូតដល់ថ្ងៃទី២៧ ខែមិថុនា ឆ្នាំ២០២៥។
បើយោងតាមក្រសួងពាណិជ្ជកម្ម ទំនិញទាំងនោះរួមមានផលិតផលកសិកម្មមួយចំនួន រួមទាំងសាច់សត្វផងដែរ។
ការសម្រេចរបស់រដ្ឋាភិបាលវៀតណាម ដោយមិនយកពន្ធគយសម្រាប់ទំនិញកម្ពុជាចំនួន ២៨ បន្ទាត់ពន្ធខាងលើ បានកើតឡើងស្របពេលដែលប្រទេសកម្ពុជា និងថៃ កំពុងកើតមានជម្លោះជាមួយគ្នាទាក់ទងនឹងខ្សែបន្ទាត់ព្រំដែន ដែលជម្លោះនេះអាចធ្វើឱ្យការផ្លាស់ប្តូរពាណិជ្ជកម្មរវាងប្រទេសទាំង ២ ជួបបញ្ហាមួយចំនួន។
ទិន្នន័យកត់ត្រាដោយអគ្គនាយកដ្ឋានគយ និងរដ្ឋាករកម្ពុជា (GDCE) ឱ្យដឹងថា ក្នុងឆ្នាំ២០២៤ ការនាំចេញនាំចូលទំនិញរវាងកម្ពុជា និងវៀតណាម មានទឹកប្រាក់សរុប ៧,៧៨ ពាន់លានដុល្លារ កើនឡើង ១៨,២ ភាគរយបើធៀបនឹងឆ្នាំ២០២៣ ដែលមានចំនួន ៦,៥៨ ពាន់លានដុល្លារ។ ទំនិញកម្ពុជានាំទៅវៀតណាម មានទឹកប្រាក់ ៣,៦១ ពាន់លានដុល្លារ កើនឡើង ២១,៦ភាគរយ និងវៀតណាមនាំចូល ៤,១៧ ពាន់លានដុល្លារ កើន ១៥,៤ ភាគរយ។
ដោយឡែកសម្រាប់រយៈពេល ៤ខែដើម ឆ្នាំ២០២៥ ការផ្លាស់ប្តូរទំនិញរវាងប្រទេសទាំង ២ មានទឹកប្រាក់ ៣,២២ ពាន់លានដុល្លារ កើនឡើង ៧ ភាគរយបើធៀបនឹងរយៈពេលដូចគ្នាឆ្នាំ២០២៤ ក្នុងនោះកម្ពុជានាំទំនិញទៅវៀតណាម ១,៧៩ ពាន់លានដុល្លារ កើនឡើង ៤,៥ ភាគរយ និងវៀតណាមនាំចូល ១,៤៣ ពាន់លានដុល្លារ កើនឡើង ១០,៣ ភាគរយ៕
អនុប្រធានសមាគមពាណិជ្ជកម្មកម្ពុជា-ចិន លោក ឡោ វិចិត្រ បានប្រាប់ភ្នំពេញប៉ុស្តិ៍នៅថ្ងៃទី៥ ខែមិថុនាថា ថ្មីៗនេះរដ្ឋាភិបាលកម្ពុជា និងវៀតណាម បានបង្ហាញនូវមហិច្ឆិតាក្នុងការជំរុញទំហំពាណិជ្ជកម្មទ្វេភាគីឱ្យកើនដល់ ២០ពាន់លានដុល្លារនាពេលដ៏ខ្លីខាងមុខ។ បច្ចុប្បន្នប្រទេសវៀតណាមត្រូវគេដឹងថា គឺជាទីផ្សារដ៏មានសក្តានុពលសម្រាប់ការនាំចេញទំនិញកម្ពុជា ក្រៅពីសហរដ្ឋអាមេរិក កាណាដា សហគមន៍អឺរ៉ុប ចិន ថៃ ជប៉ុន និងកូរ៉េ ជាដើម។ លោកបន្តថា ភាគច្រើននៃប្រភេទទំនិញដែលកម្ពុជានាំទៅវៀតណាម គឺជាផលិតផលកសិកម្មមិនទាន់កែច្នៃ ដូចជា ស្វាយចន្ទី ស្រូវ ជ័រកៅស៊ូ ដំឡូងមី ចេក ស្វាយ និងធនធានធម្មជាតិមួយចំនួន។
លោកបន្ថែមថា ជម្លោះប្រដាប់អាវុធរយៈពេលខ្លីនៅព្រំដែនកម្ពុជា-ថៃ កាលពីចុងខែឧសភា ក៏បានជំរុញឱ្យសកម្មភាពនៃការផ្លាស់ប្តូរទំនិញរវាងកម្ពុជា-វៀតណាម កើនឡើងផងដែរ។ ការសម្រេចរបស់អាជ្ញាធរវៀតណាម ដែលមិនយកពន្ធលើមុខទំនិញមានដើមកំណើតនៅកម្ពុជា រយៈពេល ២ឆ្នាំនេះគឺប្រាកដជាធ្វើឱ្យមានលំហូរទំនិញពីកម្ពុជាទៅវៀតណាមមានកាន់តែច្រើន។
លោកបានថ្លែងថា៖«កិច្ចសម្របសម្រួលផ្នែកពន្ធគយនេះ នឹងជួយធ្វើឱ្យមានលំហូរទំនិញពីកម្ពុជាទៅប្រទេសវៀតណាមកាន់តែច្រើនទៀតនាពេលឆាប់ៗ ខណៈរដ្ឋាភិបាលប្រទេសទាំង ២ សុទ្ធតែមានឆន្ទៈធ្វើឱ្យទំហំពាណិជ្ជកម្មទ្វេភាគីកើនឡើង»។ លោកបន្ថែមថា៖«នៅពេលយើងនាំទំនិញទៅប្រទេសគេកាន់តែច្រើន ការនាំចូលមកវិញក៏នឹងកើនឡើងដែរ ដូច្នេះផែនការក្នុងការបង្កើនទំហំពាណិជ្ជកម្មទ្វេភាគីឱ្យកើនដល់ ២០ ពាន់លានដុល្លារនឹងអាចសម្រេចបានក្នុងពេលឆាប់ៗ»។
លោកលើកឡើងទៀតថា ការបន្ទាប ឬមិនយកពន្ធពីសំណាក់អាជ្ញាធរវៀតណាម ក៏នឹងជួយលើកទឹកចិត្តឱ្យវិនិយោគិនក្នុងស្រុក និងបរទេសចូលមកវិនិយោគលើការដាំដុះ ផលិត ឬកែច្នៃផលិតផលកាន់តែច្រើននៅកម្ពុជា ស្រមពេលដែលការអភិវឌ្ឍប្រព័ន្ធធារាសាស្រ្ត និងហេដ្ឋារចនាសម្ព័ន្ធដឹកជញ្ជូននៅកម្ពុជា ក៏កាន់តែល្អប្រសើរ។
លោកនិយាយទៀតថា បន្ថែមពីលើនេះ កិច្ចប្រជុំលើកទី១ នៃគណៈកម្មាធិការសមាជរដ្ឋសភា និងព្រឹទ្ធសភា កាលពីដើមសប្តាហ៍ ថ្នាក់ដឹកនាំកម្ពុជាក៏បានលើកឡើងអំពីការគាំទ្រ និងធានាជំរុញដំណើរការអភិវឌ្ឍក្នុងវិស័យកម្ពុជាឱ្យបោះជំហានទៅមុខកាន់តែលឿនផងដែរ។
លោកអះអាងថា៖«នេះនឹងធ្វើឱ្យវិស័យកសិកម្មនៅកម្ពុជាអាចអភិវឌ្ឍន៍ទាំងប្រព័ន្ធកសិកម្មសម័យថ្មី និងបច្ចេកវិទ្យា ហើយក៏នឹងជួយធ្វើឱ្យគុណភាពទំនិញនាំចេញទៅទីផ្សារបរទេសកាន់តែប្រសើរ»៕
