បទពិសោធទទួលទានអាហារនៅផ្ទះបុរាណដងទន្លេមេគង្គ។ រូបថត Veassna/Courtesy of Chef Nak
ភ្នំពេញ: ក្នុងចំណោមភោជនីយដ្ឋានពោរពេញដោយសិល្បៈចម្អិនម្ហូបអាហារ ការគិតគូរពីនិរន្តរភាពបរិស្ថានភពផែនដី និងបង្កប់រឿងរ៉ាវប្រពៃណីវប្បធម៌ដ៏អស្ចារ្យនៅអេស្ប៉ាញ ប៉េរូសហរដ្ឋអាមេរិក ថៃ ដាណឺម៉ាក នូវែលសេឡង់ ចិន ជប៉ុន អ៊ីតាលី និងម៉ិកស៊ិក អាហារនៅផ្ទះប្រពៃណីបុរាណមួយតាមដងទន្លេមេគង្គ ត្រូវបានចាត់ទុកជាបទពិសោធទទួលទានអាហារដ៏ល្អបំផុតទាំង ១៤ កន្លែងមកពីជុំវិញពិភពលោក។
នេះបើយោងតាមការចុះផ្សាយពីទស្សនាវដ្ដីទេសចរណ៍ដ៏ល្បីល្បាញ Travel and Leisure មានមូលដ្ឋានឯក្រុងញូវយ៉ក។
រាប់តាំងពីការទទួលទានអាហារអង្រួនពហុញាណ រហូតដល់ការបរិភោគជាលក្ខណៈដំណើរកម្សាន្ត ភោជនីយដ្ឋាននេះត្រូវបានផ្ដល់គុណតម្លៃជាទីកន្លែងភ្ញៀវទេសចរគួរដាក់គម្រោងហោះហើរទៅភ្លក្សអាហារផ្ទាល់។
Chef Nak Home Dining ជាសំណង់ផ្ទះបុរាណ ដែលមេចុងភៅខ្មែរល្បីល្បាញ អ្នកស្រី រស់ រតនៈ ហៅ Chef Nak ផ្ដល់នូវបទពិសោធអាហារដ៏ប្រណីតឈ្ងុយឆ្ងាញ់ ក្នុងបរិយាកាសដ៏សែនមនោរម្យនៃទេសភាពដងទន្លេក្នុងចម្ងាយធ្វើដំណើរតែ ៤៥ នាទីពីរាជធានីភ្នំពេញ។
ឆ្លើយតបនឹងការចុះផ្សាយពីវេបសាយទស្សនាវដ្ដីទេសចរណ៍នេះ Chef Nak បានសរសេរថា៖ «ខ្ញុំពិតជារីករាយដែលប្រទេសកម្ពុជា ក៏មានឈ្មោះជាកន្លែងទទួលទានអាហារល្អបំផុតទាំង ១៤ ក្នុងពិភពលោក»។
ម្ចាស់សៀវភៅម្ហូប «ញ៉ាំ» រូបនេះបានបន្តទៀតថា៖ «ប្រទេសកម្ពុជា មានរឿងជាច្រើនទៀតដែលពិភពលោកគួរតែដឹង ជាពិសេសប្រពៃណី វប្បធម៌ ដូចជាម្ហូបអាហារជាដើម»។
អស់រយៈពេលជាច្រើនឆ្នាំមកហើយ អ្នកស្រី Chef Nak បានសាងកេរ្តិ៍ឈ្មោះល្បីល្បាញក្នុងវិស័យម្ហូបខ្មែរ និងបានបម្រើអាហារប្រណីតនៅភោជនីយដ្ឋាននៃសណ្ឋាគារ៉ូសវូដភ្នំពេញ។
សព្វថ្ងៃ អ្នកស្រីកំពុងដំណើរការសាងសង់ផ្ទះថ្មី ដែលគ្រោងនឹងបើកដំណើរការចុងឆ្នាំនេះ ជាទីតាំងបម្រើការម្ហូបអាហារ និងផ្ទះស្នាក់។
ចុងភៅល្បីដែលតែងទន្ទេញជាប់មាត់នូវបេសកកម្ម «ធ្វើឱ្យម្ហូបខ្មែរមានភាពល្បីល្បាញ និងទទួលស្គាល់នៅទូទាំងពិភពលោក» រូបនេះ គ្រោងនឹងផ្ដល់បន្ទប់ធំចំនួន ២ សម្រាប់ការស្នាក់នៅ បន្ថែមពីលើទីតាំងបង្រៀនធ្វើម្ហូប និងសួនដំណាំ។ ខណៈភ្ញៀវអាចធ្វើដំណើរទៅតាមរថយន្តតាក់ស៊ីទៅផ្ទះរបស់ Chef Nak អ្នកស្រីក៏គ្រោងនឹងផ្ដល់សេវាជិះទូកពីរាជធានីមកកាន់ផ្ទះនៅដងទន្លេមេគង្គ ដើម្បីផ្ដល់នូវចំណីចក្ខុទស្សនីយភាពដ៏ស្រស់ត្រកាលមុននឹងចាប់ផ្ដើមបម្រើអាហារទទួលទានអាហារផងដែរ៕
