ភ្នំពេញ: អ្នក​ស្រី ក្លែ​រ ណែ​ល​សុន បានធ្វើ​ដំណើរ​ពី​ក្រុង​ញូវ​យ៉ក​មកកាន់​រាជ​ធានី​ភ្នំពេញ​ដើម្បី​ធ្វើ​ជំនួញ ​ហើយ​ក្រុម​ការងារ​ទាំង​អស់​បាន​ទៅដល់​ផ្ទះ​អាហារ​ប​ស់មេ​ចុង​ភៅ​អ្ន​កស្រី រស់ រតនៈ ឬ Chef Nak​។ មិន​ខុសពី​ប្រពៃណី​ខ្មែរ​បុរាណ នៅ​ពេល​មកដល់​ភ្ញៀវ​ត្រូវបាន​អញ្ជើញ​ឱ្យ​ដោះ​ស្បែក​ជើង និង​ដួស​ទឹក​ពាង​លាង​សម្អាត​ជើង និង​ដៃ​ជាមួយ​ក្រូច​សើច មុន​ពេល​ឡើង​គេហ​ដ្ឋាន​។​


​ជា​បទពិ​សោធន៍​លើក​ដំបូង​ក្នុង​ឆាក​ជីវិត​អ្ន​កជំនួញ​រូបនេះ​ដែល​បាន​ទទួល​នូវ​បដិ​សណ្ឋារ​កិច្ច និង​ទទួល​ទាន​អាហារ​នៅ​ក្រោម​បរិយា​កាស​ផ្ទះ​ឈើ​បុរាណ​អម​ទៅ​ដោយ​រុក្ខជាតិ ​សំឡេង​សត្វ​យំ និង​ខ្យល់​ជំនោរ​ត្រសៀក​មក​កាត់​ស្លឹកឈើ​បៃតង​ស្រស់​មក​ប៉ះ​ផ្ទៃ​មុខ អ្នក​ស្រី ​ណែ​ល​សុន ​ចាប់​ចិ​ត្ដ​នឹង​សំណង់​ផ្ទៃ​បុរាណ​របស់​ខ្មែរ ក្រៅពី​មុខ​ម្ហូប​ដ៏​វិសេស​។


​អ្នកស្រីបាន​ប្រាប់​ ភ្នំពេញ​ ប៉ុស្ដិ៍​ថា​៖ «​វា​ជា​បទ​ពិសោធ​ន៍លើក​ដំបូង​សម្រាប់​ខ្ញុំ​។ មុខម្ហូប​នីមួយៗ​ត្រូវបាន​ច​ម្អិ​នឡើង​ពី​គ្រឿងផ្សំ​ពោរ​ពេញ​ដោយ​សេចក្ដី​ស្រឡាញ់ និង​បែប​សហ​សម័យ​។ វា​ពិត​ជា​មុខ​ម្ហូប​រចនា​ស្រស់​ស្អាត​ មាន​រស​ជាតិ​ឆ្ងាញ់​ពិសា ​និង​ប្រកប​ដោយ​សុខុមាល​ភាព​។ទាំង​អាហារ​ និង​ភេសជ្ជៈ​សុទ្ធតែ​ផ្ដល់នូវ​បទ​ពិសោធន៍​មិន​អាច​បំភ្លេច​បាន​»​។


​ស្ថិត​ក្នុង​ឃុំ​ព្រែក​ហ្លូង ស្រុក​ខ្សាច់​កណ្ដាល ដែល​បច្ចុប្បន្ន​ជា​សង្កាត់​មួយ​នៃ​ក្រុង​អ​រិ​យក្ស​ត្រ ចម្ងាយ​ ៧គីឡូម៉ែត្រ​ពី​កំពង់​ចម្លង​ស្វាយ​ជ្រំ អាហារ​បែប​នៅផ្ទះ ឬ​ Home Dining ផ្ដល់ជូន​នូវ​សេវាកម្ម​ដល់​ភ្ញៀវ​ទាំង​ជាតិ និង​អន្ដរ​ជាតិ​លើស​ពី​ការ​ទទួល​ទាន​អា​ហារ តែ​ជា​បទ​ពិសោធន៍ ប្រ​វ​ត្ដិ​សាស្ដ្រ វប្ប​ធម៌ និង​សិល្បៈ​ផង​ដែរ​។


Chef Nak បាន​និយាយ​ថា វា​មិន​មែន​ជា​ភោជនីយ​ដ្ឋាន​ទេ​។ អ្វីដែល​អ្នក​ស្រី​ធ្វើ​មាន​លក្ខណៈ​ប្លែក​ជាងគេ​នៅ​ស្រុក​ខ្មែរ ដោយ​សារវា​ជាទី​កន្លែង​ដ៏​វិសេស​សម្រាប់​ភ្ញៀវ ដូច​ជា​នៅផ្ទះ​របស់​ពួក​គេ​អ៊ីចឹង​ដែរ​។

​មេ​ចុងភៅ​ម្ហូប​ខ្មែរ ដែល​ល្បី​ល្បាញ​លើ​ឆាក​អន្ដរជាតិ​រូប​នេះ ​បាន​ឱ្យដឹង​ថា​៖ «​វា​មាន​ន័យ​ថា សម្រាប់​ពួក​យើង​ យើង​ទទួល​ភ្ញៀវ​តែ១​ក្រុម​ទេ​ ក្នុង​១ថ្ងៃ ​ទោះបី​ជា​ពួកគេ​មាន​ម្នាក់ ឬ​រហូត​ដល់ ៧០​នាក់ គឺ​តែ១ក្រុម​គត់​។ យើង​រៀបចំ​សេវា​កម្ម​អ្វីៗ​ទាំង​អស់​សម្រាប់​តែ​ពួក​គាត់​នោះ​ទេ​»​។

​ថ្វីដ្បិត​តែ​ផ្ទះ​បែប​ស្រុក​ស្រែ​នេះ​មាន​សភាព​ធំ​ទូលាយ​ ក៏​មេ​ចុង​ភៅ​រូបនេះ​ មិន​ទទួល​ភ្ញៀវ​ច្រើន​ក្រុម​ក្នុង​ពេល​តែមួ​យ​នោះ​ទេ ពី​ព្រោះ​អ្នក​ស្រី ចង់​ឱ្យ​ភ្ញៀវ​ទទួល​បាន​នូវ​អារ​ម្មណ៍​បែប​ពិសេស​។

Chef Nak បាន​អះអាង​ថា ពេល​មាន​ភ្ញៀវ​ច្រើន​ក្រុម ​អ្នក​ស្រី​ត្រូវ​បែង​ចែក​សម្រាប់​ក្រុម​ភ្ញៀវ​នីមួយៗ​។ ដូច្នេះ ​វា​ពិបាក​ធ្វើឱ្យ​ពួកគេ​ផ្ចង់​អារម្មណ៍​ណាស់ ​ដោយ​សារ​រាល់​មុខ​ម្ហូប​ទាំង​អស់​សុទ្ធ​តែមាន​សាច់​រឿង​ដែល​ចុងភៅ​ត្រូវ​រៀប​រាប់​បក​ស្រាយ​។

​មេ​ចុង​ភៅ​រូបនេះ​ត្រូវ​សិក្សា​អំពី​ភ្ញៀវ​នីមួយៗ​ថា តើ​ពួកគេ​មក​ពីណា?​ចូល​ចិ​ត្ដ​អ្វី? ឬ​ទទួល​ទាន​អ្វី​មិន​បាន​ជាដើម​ ដើម្បី​ងាយ​ស្រួល​ត្រៀម​មុខ​ម្ហូប និង​បញ្ចៀស​រាល់​ការ​មិន​ចូល​ចិត្ដ​របស់​ភ្ញៀវ​។​

​អ្នកស្រីបាន​ប្រាប់​ ភ្នំពេញ​ ប៉ុស្ដិ៍​ថា​៖ «​យើង​ផ្ដោត​សំខាន់​លើ​ក្រុម​ភ្ញៀវ​ណាដែល​ផ្ដល់​តម្លៃ​លើសពី​ការ​ទទួល​ទាន​អាហារ​ធម្មតាៗ ​តែ​ជា​បទ​ពិសោធន៍​និង​សិល្បៈ​វប្បធម៌​។នៅទីនេះ ​យើង​បាន​សាង​សង់​ផ្ទះ​ខ្មែរ​បុរាណ​២ ដែល​ផ្គុំ​ឡើង​ពី​ផ្ទះ​ឈើ​បុរាណ​នៅ​សៀម​រាប និង​បាត់​ដំបង​»​។

Chef Nakបន្ដថា​៖ «​ដូច្នេះ​ ទាំង​អស់​នេះវា​លើសពី​ការ​ទទួល​ទាន​អាហារ​ធម្មតា​។វា​បាន​បង្ហាញ​ពី​ប្រ​វ​ត្ដិ​សាស្ដ្រ វប្បធម៌​និង​សិល្បៈ​របស់​យើង ហើយ​រាល់​ពេល​យើង​ទទួល​ភ្ញៀវ​យើង​មានការ​ប្រគំ​តន្ដ្រី​កំដរ​អំឡុង​ពេល​ពិសា​អាហារ​»​។

​ភ្ញៀវ​អាច​រៀន​ធ្វើ​ម្ហូប​ជាមួយ​មេ​ចុងភៅ​ដោយ​ផ្ទាល់​ហើយ​ពួកគេ​ដើរ​ផ្សារ​និង​ទិញ​ម្ហូប​មក​ធ្វើ​ជាមួយ​គ្នា​។បន្ទាប់​មក​ ពួកគេ​ចម្អិន​ម្ហូប ក៏ដូច​ជា​ទទួល​ទាន​អាហារ​ជុំគ្នា​ថែម​ទៀត​។

​មេ​ចុង​ភៅ​ រតនៈ បាន​និយាយ​ថា អ្នក​ស្រី​មាន​គម្រោង​បើក​សម្ពោធ​អាហារ​បែប​នៅ​ផ្ទះនិ​ង​ផ្ទះ​ស្នាក់​ទាំង​នេះ​អំឡុង​ពេល​ដើមឆ្នាំ​នេះ ​តែដោយ​សារ​ភ្ញៀវ​បាន​កក់​មកជា​បន្ដ​បន្ទាប់​ អ្នកស្រី​ចាប់​ផ្ដើម​ទទួល​ភ្ញៀវ​បណ្ដើរៗ​តាំង​ពី​ខែតុលា​ឆ្នាំ​២០២២​។

​ស្ថិត​នៅ​ក្រុង​អរិយ​ក្សត្រ​ថ្មី Chef Nak ចង់បាន​បរិយា​កាស​មួយ​ដែល​មិន​ឆ្ងាយ​ពី​ទីក្រុង ​ត្រឹម​កន្លះ​ម៉ោង ​ឬ​ ៤៥​ នាទី​មក​ដល់​ តែ​ទទួល​បាន​អារម្មណ៍​បែប​ស្រុក​ភូមិឬ​ចម្ការ ឮ​សំឡេង​ចង្រិត​យំ ​សំឡេង​គោ​រោទ៍ រួម​ទាំង​បទពិ​សោធ​ន៍ឆ្លង​ទូកដ​ផង​ដែរ​។

​ដោយ​ទទួល​ស្គាល់​ថា កា​រផ្ដល់​សេវា​កម្ម​បែបនេះ​សម្បូរ​ទៅ​ទីក្រុង​សៀម​រាប​ ខណៈ​នៅ​រាជ​ធានី​ភ្នំពេញ វា​ហាក់​ដូច​ជា​រឿង​ថ្មី​សន្លាង​សម្រាប់​ភ្ញៀវ​ទេស​ចរ​ទាំង​អស់ ​អ្នកស្រី ​រតនៈ ​បាន​អះអាង​ថា នៅ​សៀម​រាប​មាន​ជម្រើស​ច្រើន​សម្រាប់​ផ្ដល់​ជូន​ភ្ញៀវ​។​អ្វី​ដែល​ភ្ញៀវ​ខ្វះ ឬ​ប្រជា​ជន​ខ្មែរ​ខ្វះ គឺ​នៅ​រាជ​ធានី​ភ្នំពេញ​ មិនមែន​នៅ​សៀម​រាប​នោះ​ទេ​។

​អ្នក​ស្រី​បាន​ប្រាប់​ថា​៖ «​សម្រាប់​នៅ​ភ្នំពេញ ​ពេល​ពួកគេ​ចង់​សម្រាក​បែប​វិស្សម​កាល ​ដែល​ធ្លាប់​ធ្វើ​ដំណើរ​ឆ្ងាយ​ ពួកគេ​អាច​ទទួល​បាន​អា​រម្មណ៍​ដូ​ចគ្នា ​និង​នៅ​ជិត​បង្កើយ​»​។

​វា​ជា​មោទន​ភាព​មួយ​ ដែល​ភ្ញៀវ​បរទេស​មក​ទទួល​យក​នូវ​បទ​ពិសោធ​ន៍ម្ហូប​ខ្មែរ និង​ជួយ​ផ្សព្វ​ផ្សាយ​មុខម្ហូប​ទៅ​កាន់​មិ​ត្ដ​ភក្ដិ​បន្ដ​ទៀត​នៅលើ​ពិភព​លោក​។ ប៉ុន្ដែ​អ្វីដែល Chef Nak ត្រូវការ​បំផុត​នោះ គឺជា​ភ្ញៀវ​ខ្មែរ​ ដែល​ពួកគេ​មាន​បំណង​ហ៊ាន​ចាយ​លុយ ​និង​ទទួល​យក​នូវ​បទ​ពិសោធន៍​វា​ពិត​ជា​មាន​ន័យ​សម្រាប់​មេ​ចុង​ភៅ​រូប​នេះ​ណាស់​។

​ដោយ​អះ​អាង​ថា ភ្ញៀវ​បរទេស​មាន​ចំនួន ​៨០​ ភាគ​រយនិ​ង​ភ្ញៀវ​ជាតិ​ ២០ ​ភាគរយ​អំឡុង​ពេល​មុន​ពេល​កូ​វីដ ​ខណៈ​ពេល​បច្ចុប្បន្ន​នេះ ភ្ញៀវ​ក្នុង​ ៦​០ ភាគ​រយ និង​ភ្ញៀវ​ពី​ក្រៅ​តែ ៤០ ​ភាគ​រយ Chef Nak និយាយថា​៖ «​ប្រជា​ជន​យើង​ ចង់​បាន​អ្វី​ពិសេស និង​មាន​ឯក​ជន​ភាព ​ហើយ​យើង​ព្យា​យាម​ធ្វើ​អ្វី​ចេញពី​បេះដូង ​និង​ធ្វើឱ្យ​អស់ពី​លទ្ធភា​ព​ដើម្បី​ទាញ​បេះដូង​ពួក​គាត់​មក​ដែរ​»​។​

​អ្នក​នាង លី សុផល​លីន(Ly Sophallin) ជា​លេខា​អគ្គ​នាយក ​និង​នាយក​ផ្នែក​ហិ​រញ្ញ​វត្ថុ​នៅ​ក្រុមហ៊ុ​ន Smart គឺជា​អ្នក​ផ្ដល់​ជម្រើស​ទីតាំង​ផ្ទះ​អាហារ​ដល់​ប្រធាន​ក្រុម​ប្រឹក្សា​ភិបាល ​(board directs)​។

​ការ​រៀបចំ​ទទួល​ទាន​អាហារ​បែប​ខ្មែរ​សម្រាប់​ក្រុម​ប្រឹក្សា​ភិបាល​ចម្រុះ​ជាតិ​សាសន៍​នេះ ​ប្រមាណ​ ៣០​ នាក់ ​ត្រូវបាន​ធ្វើ​ឡើង​ចំនួន ​២​ ដង ​គឺ​មុន​កូ​វីដ ១៩ ​ម្ដង និង​ក្រោយ​កូ​វីដ ​១៩ ​ម្ដង​ទៀត​។

​អ្នកនា​ង សុផល​លីន បាន​ប្រាប់ ​ភ្នំពេញ​ ប៉ុស្ដិ៍​ថា​៖ «​មិន​ថា​តែ​ភ្ញៀវ​បរទេស​នោះ​ទេ ​សូម្បីតែ​ភ្ញៀវ​ខ្មែរ​ក្នុង​ស្រុក ​ក៏មាន​ការ​ចាប់​អារម្មណ៍​នឹង​បដិសណ្ឋារ​កិច្ច​បែប​ប្រពៃណី​បុរាណ ​ជា​ពិសេស​មុខម្ហូប​ដែល​ធ្វើឱ្យ​នឹក​ឃើញ​ដល់​អតីត​កាល​ធ្លាប់​ទទួល​ទាន​»​។

​អ្នក​នាង​បាន​បន្ដថា​៖ «​ថ្វីដ្បិតតែ​យើង​ក៏​អាច​នៅតែ​បន្ដ​ទទួល​ទាន​មុខ​ម្ហូប ​ដូចជា​ កំពឹស​ចៀន ​និង​ទឹកកក​ឈូស​បែប​ទាំង​នេះ​យ៉ាង​ក៏​ដោយ ក៏​នៅផ្ទះ ​Chef Nak ពិតជា​ខុសប្លែ​ក និង​ធ្វើឱ្យ​យើង​នឹក​ឃើញ​ពី​កុមារ​ភាព​»​។

​អ្នក​ស្រី ទទួល​ស្គាល់​ថា ម្ហូប​នៅផ្ទះ Chef Nak ពិតជា​ថ្លៃ តែ​មេ​ចុងភៅ​រូបនេះ​ផ្ដល់​សេវាក​ម្ម​លើសពី​ការ​ទទួល​ទាន​អាហារ​ ដោយ​មុខ​ម្ហូប​នីមួយៗ​ត្រូវបា​ន​រៀប​រាប់​អំពី​ប្រ​វ​ត្ដិ និង​ប្រភព​កំណើត​របស់​វា​។

​លេខា​នៅ​ក្រុមហ៊ុន​ទូរ​គមនាគ​មន៍​រូបនេះ បាន​បន្ថែម​ថា​៖ «​មុន​ពេល​ចាប់​ផ្ដើម​ទទួល​ទាន​អាហារ​ Chef Nak គាត់​រៀបរាប់​អំពី​ប្រ​វ​ត្ដិ​របស់​ម្ហូប ​ដែល​ធ្វើឱ្យ​យើង​ស្លុង​ទៅនឹង​សម័យ​កាល​នៃ​ម្ហូប​នីមួយៗ​ ហើយ​ភ្ញៀវ​បរទេស​ក៏​មិន​ខុសគ្នា​ដែរ ពួក​គាត់​ពិត​ជា​ចាប់​អារម្មណ៍​ខ្លាំង​»​។

​ទាក់​ទង​នឹង​តម្លៃ​សេវា​កម្ម​ម្ហូប​អាហារ ​និង​បដិ​សណ្ឋារ​កិច្ច​ដ៏​វិសេស​ពី​មេ​ចុងភៅ​ម្ហូប​ខ្មែរ Chef Nakបាន​សា​រភាព​ថា តម្លៃ​អត់​ថោក​នោះ​ទេ​។

​អ្នក​ស្រី បាន​រំឭក​ថា អ្នកស្រី​ឮ​ផ្ទាល់​ត្រចៀក​ថា បរទេស​មក​លេង​ស្រុក​ខ្មែរ ដោយ​សារ​វា​ជា​ប្រទេស​ចំណាយ​តិច ហើយ​ប្រជា​ជន​ខ្មែរ​ខ្លួន​ឯង​ ដែល​ស្រឡាញ់​ខាង​ផ្នែក​ច​ម្អិ​ន និង​មាន​ឱកាស​ចូលរៀន​ធ្វើ​ចុងភៅ ក៏​មិន​ជ្រើស​រើស​ធ្វើ​ម្ហូប​ខ្មែរ​ដែរ ដោយ​សារ​ពួកគេ​គិត​ថា ​ឱកាស​ធ្វើ​ចុងភៅ​បាន​ប្រាក់ខែ​គឺ​មុខម្ហូប​បែ​បប​ស្ចិម​ប្រទេសឬ​យ៉ាង​ហោច​ណាស់ម្ហូប​ចិន​ដែរ​។

Chef Nakបាន​បន្ដថា​៖ «​ចំពោះ​ខ្ញុំ ខ្ញុំ​មិន​គិត​អ៊ីចឹ​ង​ទេ​។ ខ្ញុំ​លក់​ឱ្យ​ថ្លៃ ហើយ​ខ្ញុំ​ប្រាប់​ភ្ញៀវ​ថា ម្ហូប​ដែល​យើង​ញ៉ាំ​រាល់ថ្ងៃ ដែល​យើង​មើល​រំលង អាច​លក់​បាន​ថ្លៃ​ខ្លាំង​មែន​ទែន​។ ទាំង​នេះ គឺ​វា​ស្ដែង​ចេញ​ពីអ្វី​ដែល​យើង​នឹងធ្វើ​ជូន​ភ្ញៀវ​»​។

​អ្នក​ស្រី បាន​បញ្ជាក់​ជា​មួយ​សំណើច​ថា​៖ «​សម្រាប់​មនុស្ស ​២ នាក់​ចំពោះ​អាហារ​ដ៏​វិសេស​១ពេល​មាន​តម្លៃ ​៧០០ ដុល្លារ​។ ខ្ញុំ​ចង់​ប្រាប់​ប្រជា​ជន​យើង​ថា ម្ហូប​ខ្មែរ​យើង​មិន​អន់​ទេ​។ វា​នឹង​អន់ បើ​យើង​គិតថា វា​អន់ និង​បន្ដ​គិតថា វា​អន់​។ ម្ហូប​របស់​យើង​គឺ​ល្អ​ដូច​គេ​អ៊ីចឹ​ង គ្រាន់តែ​យើង​មិន​ទាន់​មាន​ជំនឿ​ចិ​ត្ដ​ថា យើង​នឹង​អាចធ្វើ​វា​បាន​»​។

​មុខ​ម្ហូប​សម្រាប់​មនុស្ស​២នាក់ ឬ​ជា​ក្រុម Chef Nakបាន​រៀបចំ​ចំនួន ៥ មុខ ដោយ​ចាប់​ផ្ដើម​ពី​ម្ហូប​ចុបៗ (finger food) ញាំរហូត​ដល់​ម្ហូប​ចម្បង (main courses) សម្ល និង​បង្អែម បន្ថែម​ជា​មួយ​ក្រុម​ភ្លេង​សម្ដែង​កំដរ​។​

​មេ​ចុង​ភៅ​រូបនេះ ក៏​បើក​មជ្ឈ​មណ្ឌល​សិល្បៈ​ម្ហូប​អាហារ​ខ្មែរ (Chef Nak Culinary Art Center) ដែល​មាន Food Lab ជាទី​កន្លែង​សិក្សា​ស្រាវ​ជ្រាវ និង​សាក​ល្បង​ច្នៃ​បង្កើត​មុខ​ម្ហូប​ខ្មែរ​ថ្មីៗ ដូច​ជា ​ការ​បង្កើត​ទឹកខ្មេះ​ទឹក​ត្នោត​ ទឹកខ្មេះ​ចេក ឬ​ផ្អក​ត្រីប្រៃ​ជាដើម​។

Chef Nak ​ចង​ក្រង​ជា​ក្បួន ឬ​ច្បាប់​មួយ​ ដែល​អាច​សរសេរ​ទុក និង​ទាញ​យក​រសជាតិ​អាហារ​ដែល​អ្នកស្រី​ចង​ចាំ​ញ៉ាំ​ពី​តូចៗ​។ អ្នក​ស្រី​ក៏មាន Hom​e​stay ផង​ដែរ ​ដែល​ផ្ដោត​ចម្បង​ទៅ​លើ​សិល្បៈ​ចម្អិន​មុខ​ម្ហូប​ខ្មែរ​៕