ភ្នំពេញ ប៉ុស្ដិ៍ | ក្រុមហ៊ុន មេនូឡាយហ្វ៍ ខេមបូឌា រៀបចំ «កិច្ចប្រជុំធំប្រចាំឆ្នាំ ២០២៣» ដើម្បីអបអរសាទរចំពោះការរក្សាបានភាពនាំមុខសម្រាប់បណ្តាញចែកចាយតាមដៃគូធនាគារ

❮ ❯

ក្រុមហ៊ុន មេនូឡាយហ្វ៍ ខេមបូឌា កាលពីថ្ងៃទី១៨ ខែកុម្ភៈ ឆ្នាំ ២០២៣ បានរៀបចំកិច្ចប្រជុំធំប្រចាំឆ្នាំ ២០២៣ ក្រោមប្រធានបទ «GAME TIME to the CHAMPION» ដើម្បីអបអរសាទរសមិទ្ធផលសម្រេចបានក្នុងឆ្នាំ ២០២២ របស់នាយកដ្ឋានចែកចាយផលិតផលធានារ៉ាប់រងអាយុជីវិត តាមដៃគូធនាគារ ដែលក្នុងនោះមាន ធនាគារ ABA ធនាគារ ស្ថាបនា ធនាគារJ-Trust, CIMB និង FTB។

កម្មវិធីនេះ ត្រូវបានរៀបចំឡើងក្នុងគោលបំណងអបអរដល់ការបន្តរក្សាតំណែងលេខ «១» ក្នុងនាមជាក្រុមហ៊ុនដែលមានចំណែកទីផ្សារច្រើនជាងគេ នៅកម្ពុជា ក្នុងឆ្នាំ ២០២២ (ផ្អែកតាមបុព្វលាភធានារ៉ាប់រងឆ្នាំដំបូង) សម្រាប់បណ្តាញចែកចាយតាមដៃគូធនាគារ (Partnership Distribution channel)។ លើសពីនេះ កម្មវិធីនេះក៏បានអបអរសាទរដល់បុគ្គលិកជំនាញប្រឹក្សាធានារ៉ាប់រង ប្រធានផ្នែកលក់ និងប្រធានផ្នែកលក់ជាន់ខ្ពស់តាមតំបន់ឆ្នើម ៣០ រូបចំពោះកិច្ចខិតខំប្រឹងប្រែងសម្រេចបាននូវសមិទ្ធផលដ៏ត្រចះត្រចង់ក្នុងឆ្នាំ ២០២២ ក្នុងការផ្តល់ប្រឹក្សាយោបល់ប្រកបដោយគុណភាព និងវិជ្ជាជីវៈខ្ពស់ និងការការពារអនាគតហិរញ្ញវត្ថុជូនដល់ក្រុមគ្រួសារកម្ពុជា។

លោក ព្រូ ស៊ីថន នាយកគ្រប់គ្រងជាន់ខ្ពស់នៃនាយកដ្ឋានចែកចាយតាមដៃគូ ធនាគារនៃក្រុមហ៊ុន មេនូឡាយហ្វ៍ ខេមបូឌា បានសម្តែងការកោតសរសើរថា៖ «ខ្ញុំបាទ ពិតជាមានមោទកភាពណាស់ចំពោះការជួបជុំដ៏ធំមួយនេះដែលរៀបចំឡើងដើម្បីរឹតចំណងមិត្តភាពការងារ ការថ្លែងអំណរគុណ និងការទទួលស្គាល់ចំពោះសមិទ្ធផលដ៏ធំធេងដែលមហាគ្រួសារនាយកដ្ឋានយើង ក៏ដូចជា ក្រុមហ៊ុន មេនូឡាយហ្វ៍ ខេមបូឌា សម្រេចបានក្នុងឆ្នាំ ២០២២ កន្លងមក។ ការជួបជុំនេះ ក៏មានគោលដៅក្នុងការផ្តល់ព័ត៌មាន យុទ្ធសាស្រ្តថ្មីៗ និងបង្ហាញពីការយកចិត្តទុកដាក់ខ្ពស់ ក៏ដូចជា ការគាំទ្រពីគណៈគ្រប់គ្រងប្រតិបតិ្តរបស់ក្រុមហ៊ុនចំពោះបុគ្គលិកជំនាញប្រឹក្សាធានារ៉ាប់រង។

ខ្ញុំក៏សូមវាយតម្លៃខ្ពស់ចំពោះភាពជោគជ័យ ក្រោមការដឹកនាំរបស់នាយិកា-នាយក-ផ្នែកលក់ តាមធនាគារទាំងអស់ និងក្រុមការងារគ្រប់ផ្នែកដែលតែងតែសហការគាំទ្រគ្នាទៅវិញទៅមក ដើម្បីធ្វើឱ្យក្តីសុបិនរបស់អតិថិជនយើងក្លាយជាការពិត។ ជាក់ស្តែង ក្រុមហ៊ុនបានផ្តល់ទឹកប្រាក់ជូនអតិថិជនដែលបណ្ណសន្យារ៉ាប់រងដល់កាលកំណត់សរុបជិត ៨ ម៉ឺនដុល្លារអាមេរិកក្នុងឆ្នាំ ២០២២ និងបន្តផ្តល់ជូនប្រមាណ ១ លានដុល្លារអាមេរិកក្នុងឆ្នាំ ២០២៣ នេះ»។

លោកបានចែករំលែកពីផែនការយុទ្ធសាស្ត្រអភិវឌ្ឍអាជីវកម្ម និងអាទិភាពថ្មីៗ តាមដៃគូធនាគារនីមួយៗ ការវិនិយោគបន្ថែមលើការអភិវឌ្ឍអាជីពបុគ្គលិកផ្នែកលក់ ផលិតផលថ្មី និងផែនការជួបជុំគ្នាតាមតំបន់សម្រាប់ឆ្នាំ ២០២៣នេះ។

ឆ្លៀតក្នុងឱកាសនេះ លោក ព្រូ ស៊ីថន ក៍សូមធ្វើការថ្លែងអំណរគុណយ៉ាងជ្រាលជ្រៅចំពោះដៃគូធនាគារឈានមុខទាំង ៥ រួមមាន ធនាគារស្ថាបនា ធនាគារ ABA ធនាគារ J-Trust, CIMB និង FTB ដែលជានិច្ចជាកាលតែងតែជួយជ្រោមជ្រែង គាំទ្រ និងផ្តល់ទំនុកចិត្តមកកាន់ក្រុមហ៊ុនក្នុងបេសកកម្មជួយផ្តល់ការការពារ និងដំណោះស្រាយហិរញ្ញវត្ថុសម្រាប់អតិថិជនរបស់ធនាគារទាំង ៥។

គួរបញ្ជាក់ផងដែរថា វិស័យធានារ៉ាប់រងអាយុជីវិត គឺជាឧស្សាហកម្មមួយដ៏ថ្មីស្រឡាងដែលទើបតែមានកំណើតបាន ១០ ឆ្នាំ ប៉ុណ្ណោះនៅកម្ពុជា និងជាវិស័យដែលឈរលើមូលដ្ឋានចម្បងនៃការគោរពពាក្យសន្យា ការផ្តល់ទំនុកចិត្ត និងការរក្សាទំនាក់ទំនងល្អជាមួយអតិថិជន។

ដូច្នេះ លោក ព្រូ ស៊ីថន បានសង្កត់ធ្ងន់ផងដែរថា ភាពនាំមុខគេនៅទីផ្សារកម្ពុជារបស់ក្រុមហ៊ុនយើងនិងនាយកដ្ឋានចែកចាយតាមដៃគូធនាគារ បានឆ្លុះបញ្ចាំងពីវប្បធម៌ និងគុណតម្លៃនៃការបំពេញការងារដ៏ល្អពីនិយោជិតគ្រប់រូប និងការសហការល្អជាមួយដៃគូធនាគារទាំង៥ ក៏ដូចជា ការគាំទ្រពីភាគីពាក់ព័ន្ធនៅក្នុង និងនៅក្រៅក្រុមហ៊ុន។

ជាមួយនឹងផែនការយុទ្ធសាស្ត្រអភិវឌ្ឍអាជីវកម្ម និងអាទិភាពថ្មីៗ តាមដៃគូធនាគារនីមួយៗរួមផ្សំជាមួយនឹងសមត្ថភាពដ៏ខ្លាំងនៃការអនុវត្តផែនការទាំងនេះ ព្រមទាំងការវិនិយោគបន្ថែម ការអភិវឌ្ឍអាជីពបុគ្គលិកផ្នែកលក់ និងផលិតផលថ្មី លោកមានជំនឿយ៉ាងមុតមាំថា យើងនឹងរក្សាបានភាពនាំមុខគេបន្តទៀតនៅឆ្នាំ ២០២៣ នេះជាក់ជាមិនខាន៕

ដើម្បីក្លាយជាបុគ្គលិកជំនាញប្រឹក្សាធានារ៉ាប់រងរបស់ ក្រុមហ៊ុន មេនូឡាយហ្វ៍ ខេមបូឌា សូមចូលទៅកាន់៖ https://www.manulife.com.kh/km/careers-with-us/insurance-specialist.html