ពិព័រណ៍ភាគហ៊ុនរបស់ក្រុមហ៊ុន ម៉េងលី ជេ. គួច អេឌ្យូខេសិន ម.កស្តីពីការបោះផ្សាយលក់មូលបត្រកម្មសិទ្ធិសាធារណៈលើកដំបូង (IPO) ត្រូវបានធ្វើឡើងនៅផ្សារទំនើបអ៊ីអន២ សែនសុខ កាលពីថ្ងៃទី១២ ខែឧសភា ដើម្បីផ្តល់ឱកាសស្វែងយល់លម្អិតអំពីការវិនិយោគដ៏សំខាន់នេះ។
កម្មវិធីនេះប្រព្រឹត្តទៅក្រោមអធិបតីភាពរបស់ឯកឧត្តម ស៊ូ សុជាតិ ប្រតិភូរាជរដ្ឋាភិបាលទទួលបន្ទុកជាអគ្គនាយកនៃនិយ័តករមូលបត្រកម្ពុជា, ឯកឧត្តម ហុង សុហួរ ប្រតិភូរាជរដ្ឋាភិបាល ទទួលបន្ទុក ជាអគ្គនាយកនៃផ្សារមូលបត្រកម្ពុជា, អ្នកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាលនិងអគ្គនាយកប្រតិបត្ដិនៃក្រុមហ៊ុនម៉េងលីជេ. គួច អេឌ្យូខេសិន រួមទាំងភ្ញៀវកិត្តិយសជាច្រើនរូបទៀត។
ជាមួយនឹងការដាក់លក់មូលបត្រកម្មសិទ្ធិសាធារណៈរបស់ MJQE នៅលើផ្សារមូលបត្រកម្ពុជា ស្ថាបនិកគ្រឹះស្ថានអប់រំឯកជនឈានមុខគេមួយនៅកម្ពុជានេះ ក៏បានអំពាវនាវឱ្យបងប្អូនប្រជាពលរដ្ឋ ពិសេសអាណាព្យាបាលសិស្សានុសិស្សចូលរួមទិញភាគហ៊ុនជាមួយក្រុមហ៊ុនដើម្បីអាចពង្រីកនិងពង្រឹងខ្លួនកាន់តែរឹងមាំថែមទៀតសម្រាប់វិស័យអប់រំនៅកម្ពុជា។
បច្ចុប្បន្ន ក្រុមហ៊ុន ម៉េងលី ជេ. គួច អេឌ្យូខេសិន មានសាខាសរុបចំនួន ១៥ ក្នុងរាជធានីខេត្តក្រុង និងបណ្តាខេត្ត ក្នុងនោះមានសិស្សជាង ២០,០០០ នាក់, បុគ្គលិក ២,១៤៩ នាក់ និងមានអតីតសិស្សជាង ៥០,០០០ នាក់ កំពុងសិក្សា និងធ្វើការនៅជុំវិញពិភពលោក។
ក្រុមហ៊ុនក៏គ្រោងបើកដំណើរការសាខាថ្មី សម្រាប់ ឆ្នាំសិក្សា២០២៣-២០២៤ សាខាជាច្រើនបន្ថែម ទៀតក្នុងនោះ រួមមាន៖សាខា សែនសុខ, សាខាច្បារអំពៅ,សាខា កំពង់ចាម, សាខាតាកែវនិងសាខាបាត់ដំបង។
សម្រាប់កាលបរិច្ឆេទបរិវិសកម្ម បើកនៅថ្ងៃទី១០ ខែមេសា ឆ្នាំ២០២៣ និងបិទនៅថ្ងៃទី៩ ខែមិថុនា ឆ្នាំ២០២៣ ហើយ MJQE នឹងចូលរួមជាផ្លូវការជាមួយ CSX នៅថ្ងៃទី២៨ ខែមិថុនា អាស្រ័យលើការអនុម័តតាមការយល់ព្រមជាមុនពីនិយ័តករមូលបត្រកម្ពុជា។
ការបន្តភាពជោគជ័យរបស់ ក្រុមហ៊ុន ម៉េងលី ជេ. គួច អេឌ្យូខេសិន ក្នុងរយៈពេលជាច្រើនឆ្នាំកន្លងមកនេះបានរួមចំណែកដល់ការចូលក្នុងទីផ្សារភាគហ៊ុនកម្ពុជាដោយ IPO នេះ បើកសម្រាប់អ្នកវិនិយោគទូទៅ និងមានបំណងរៃអង្គាសថវិកាចំនួន ១០ លានដុល្លារដើម្បីបង្កើតសាលារៀនបន្ថែមទៀត។
ក្នុងនោះមូលធនីយកម្មចំនួន ១០,000,000 លានដុល្លារអាមេរិក, ធានាភាគលាភ ៦.០% ក្នុង១ឆ្នាំសម្រាប់រយៈពេល ២ឆ្នាំដំបូង, ភាគហ៊ុន IPO ចំនួន ១៩,៦០៦,៦០០ ភាគហ៊ុនស្មើនឹង ៥,៨៨ %នៃភាគហ៊ុនក្រុមហ៊ុនសរុបហើយតម្លៃ IPO គឺ ២,០៨០រៀល ឬ ០,៥១ ដុល្លារ៕
