កិច្ចសហការជាយុទ្ធសាស្ត្រដើម្បីពាំនាំ «ភាពងាយស្រួល» ប្រកបដោយគុណភាពខ្ពស់ជូនដល់ប្រជាជនខ្មែរ
ក្រុមហ៊ុនកម្ពុជាតេលា និងក្រុមហ៊ុន ឌី អេហ្វ អាយ ឡាក់គី ប្រាយវេត លីមីធីត ដែលស្គាល់ថាជាផ្សារទំនើបឡាក់គី កាលពីថ្ងៃទី១០ ខែកញ្ញា បានចុះហត្ថលេខាលើអនុស្សរណៈនៃការយោគយល់គ្នា (MoU) នៅការិយាល័យកណ្តាលក្រុមហ៊ុន កម្ពុជាតេលា ដើម្បីពាំនាំភាពងាយស្រួលប្រកបដោយគុណភាពខ្ពស់ជូនដល់ប្រជាជនខ្មែរ។ ពិធីនេះទទួលបានការអញ្ជើញចូលរួមពីថ្នាក់ដឹកនាំ បុគ្គលិកនៃក្រុមហ៊ុនទាំង២ ព្រមទាំងភ្ញៀវកិត្តិយស និង អ្នកសារព័ត៌មានជាច្រើនរូបផងដែរ។
កិច្ចសហការនេះជាចំណុចដ៏សំខាន់សម្រាប់ក្រុមហ៊ុនទាំង២ ដើម្បីបង្កើនភាពងាយស្រួល និងការផ្ដល់ជូននូវសេវាកម្មដ៏ល្អសម្រាប់អតិថិជនក្នុងព្រះរាជាណាចក្រកម្ពុជា។
តាមរយៈកិច្ចសហការនេះហាងទំនិញតេលាម៉ាត នឹងត្រូវជំនួសវិញដោយហាងទំនិញរបស់ក្រុមហ៊ុន ឌី អេហ្វ អាយ ឡាក់គី នៅតាមបណ្តាស្ថានីយ៍ប្រេងឥន្ធនៈតេលាទូទាំងព្រះរាជាណាចក្រកម្ពុជា។ ហាងឡាក់គីមីនី នឹងផ្តល់ជូននូវផលិតផលក្នុងស្រុក និងក្រៅស្រុកដ៏សម្បូរបែបជាច្រើនប្រភេទ ដែលរួមមានអាហារសម្រន់ ភេសជ្ជៈ គ្រឿងទេស និងផលិតផលផ្សេងៗទៀត ដើម្បីបំពេញតម្រូវការរបស់អតិថិជនដែលកំពុងស្វែងរកសេវាកម្មឆាប់រហ័ស ផលិតផលប្រកបដោយគុណភាពខ្ពស់ និង ភាពងាយស្រួល។
អ្នកឧកញ៉ា ឈុន អូន អគ្គនាយកនៃក្រុមហ៊ុន កម្ពុជាតេលា បានមានប្រសាសន៍ថា៖«ខ្ញុំមានសេចក្តីរំភើបត្រេកអរចំពោះកិច្ចសហការមួយនេះ ដែលនឹងផ្ដល់ផលប្រយោជន៍ជូនក្រុមហ៊ុនទាំង២ ក៏ដូចជាប្រជាជនខ្មែរយើងឱ្យបានប្រើប្រាស់ផលិតផលដែលមានគុណភាពខ្ពស់ ជាមួយនឹងសេវាកម្មរហ័សប្រកបដោយទំនុកចិត្ត ថែមទាំងចូលរួមជំរុញកំណើនសេដ្ឋកិច្ចជាតិ។ ខ្មែរគាំទ្រខ្មែរដើម្បីការរីកចម្រើនទាំងអស់គ្នា»។
លោកបានបន្ថែមថា៖ «ក្រុមហ៊ុនកម្ពុជាតេលា និងផ្សារទំនើប ឡាក់គី គឺជាក្រុមហ៊ុនដែលបង្កើតទ្បើងដោយកូនខ្មែរ និងបានឈរជើងបម្រើប្រជាជនខ្មែរក្នុងទីផ្សាររយៈពេល ៣០ឆ្នាំជាងមកហើយ»។
លោក JOSE CARLOS REIS BETTENCOURT អគ្គនាយកប្រតិបត្តិក្រុមហ៊ុន ឌី អេហ្វ អាយ ឡាក់គីប្រាយវេត លីមីធីត ក៏បានសម្តែងការសាទរចំពោះភាពជាដៃគូនេះ ហើយបានប្តេជ្ញាចិត្តយ៉ាងមុតមាំក្នុងការនាំយកសេវាកម្មល្អ ដើម្បីបម្រើអតិថិជនរបស់ក្រុមហ៊ុនទាំង២។
លោក JOSE CARLOS REIS BETTENCOURT មានប្រសាសន៍ថា៖«យើងខ្ញុំពិតជាមានអារម្មណ៍រីករាយជាខ្លាំង ក្នុងការចូលរួមកិច្ចសហការជាមួយក្រុមហ៊ុនដ៏មានកេរ្តិ៍ឈ្មោះ ដូច កម្ពុជាតេលា ដើម្បីពង្រីកវត្តមានរបស់យើងខ្ញុំក្នុងព្រះរាជាណាចក្រកម្ពុជា តាមរយៈការផ្ដល់ភាពងាយស្រួល និងសេវាកម្មល្អសម្រាប់អតិថិជនខ្មែរទាំងអស់។ កិច្ចសហការនេះពិតជាស្របជាមួយនឹងការប្ដេជ្ញាចិត្តរបស់យើងខ្ញុំដើម្បីផ្តល់ភាពងាយស្រួល និងបំពេញតម្រូវការដល់អតិថិជនទាំងអស់គ្នា»។
នៅពេលសួរថា តើក្រុមហ៊ុនមានយុទ្ធសាស្ត្រអ្វីខ្លះដើម្បីប្រកួតប្រជែង ជាមួយផ្សារទំនើប និងផ្សារខ្នាតតូចជាច្រើនដែលកំពុងដំណើរការក្នុងប្រទេសកម្ពុជា លោកអគ្គនាយកប្រតិបត្តិបានពន្យល់ថា បច្ចុប្បន្នផ្សារទំនើបឡាក់គីមានហាងទំនិញប្រមាណជាង ១០០ទីតាំងនៅទូទាំងប្រទេសកម្ពុជា។ ផ្សារទំនើបឡាក់គី ផ្គត់ផ្គង់អាហារស្រស់ គ្រឿងទេស និងផលិតផលនាំចូលផ្ដាច់មុខដ៏សម្បូរបែប ហើយក្រុមហ៊ុនបានប្តេជ្ញាចិត្ត ក្នុងការផ្តល់នូវផលិតផលគុណភាពខ្ពស់ និងភាពងាយស្រួលដើម្បីបម្រើអតិថិជនកម្ពុជា។
កិច្ចសហការអាជីវកម្មលក់រាយរវាងក្រុមហ៊ុនទាំង២ នឹងចាប់ផ្ដើមនៅថ្ងៃទី០១ ខែវិច្ឆិកា ឆ្នាំ២០២៤ តទៅ។ ហាងទំនិញតេលាមួយចំនួននឹងចាប់ផ្ដើមកែប្រែជាហាងទំនិញឡាក់គីមីនី ចាប់ផ្ដើមពីខែវិច្ឆិកាឆ្នំា២០២៤ ខាងមុខនេះ។
អំពី
ក្រុមហ៊ុន ឌី អេហ្វ អាយ ឡាក់គី ប្រាយវេត លីមីធីត ដែលស្គាល់ថាជាផ្សារទំនើបឡាក់គី គឺជាអាជីវកម្មលក់រាយឈានមុខគេក្នុងព្រះរាជាណាចក្រកម្ពុជា ដែលបានបង្កើតផ្សារទំនើបដំបូងរបស់ខ្លួននៅតាមបណ្តោយមហាវិថីព្រះសីហនុក្នុងឆ្នាំ ១៩៩៣។ ក្នុងឆ្នាំ២០១២ ផ្សារទំនើបឡាក់គីបានចូលរួមជាមួយ ឌីអេហ្វអាយ រីធេលគ្រុប ដើម្បីពង្រីកអាជីវកម្មរបស់ខ្លួនក្នុងព្រះរាជាណាចក្រកម្ពុជា។ បច្ចុប្បន្ន ផ្សារទំនើបឡាក់គីមានហាងទំនិញប្រមាណជាង ១០០ទីតាំងនៅទូទាំងព្រះរាជាណាចក្រកម្ពុជាដែលផ្គត់ផ្គង់អាហារស្រស់គ្រឿងទេសនិងផលិតផលនាំចូលផ្ដាច់មុខដ៏សម្បូរបែប។
ក្រុមហ៊ុន កម្ពុជាតេលា គឺជាក្រុមហ៊ុនប្រេងឥន្ធនៈនិងឧស្ម័នឈានមុខគេក្នុងព្រះរាជាណាចក្រកម្ពុជាដែលបានបង្កើតឡើងជាង ៣ទស្សវត្សមកហើយ។ ជាមួយនឹងការប្ដេជ្ញាចិត្តក្នុងការផ្គត់ផ្គង់ប្រេងឥន្ធនៈនិងឧស្ម័នប្រកបដោយគុណភាពខ្ពស់ និងសេវាកម្មល្អ តេលាដំណើរការបណ្តាញដេប៉ូប្រេងឥន្ធនៈ និងស្ថានីយ៍លក់រាយធំជាងគេ ក្នុងព្រះរាជាណាចក្រកម្ពុជា។ ក្រុមហ៊ុនបានផ្ដោតទៅលើការរួមគ្នាជាធ្នុងមួយ ឧត្តមភាព ការក្រេបយកចំណេះដឹង និងគណនេយ្យភាព ដើម្បីក្លាយជាក្រុមហ៊ុនផ្គត់ផ្គង់ថាមពល ទទួលបានការគាំទ្រច្រើនជាងគេនៅក្នុងព្រះរាជាណាចក្រកម្ពុជា។ ក្រុមហ៊ុនកម្ពុជា តេលាតែងតែបន្តអភិវឌ្ឍគ្រឿងបរិក្ខារផ្សេងៗ និងសេវាកម្ម ដើម្បីពាំនាំមកនូវអ្វីថ្មីៗ ដែលជួយដល់ជីវភាពរបស់ប្រជាជនកម្ពុជា៕
