ក្នុងនាមជាធនាគារពាណិជ្ជឈានមុខគេនៅកម្ពុជា អេស៊ីលីដា ភីអិលស៊ី(ACLADA Bank Plc.) បានសហការជាមួយសមាគមអាម៉ាណះតាកាហ្វុលកម្ពុជា (Cambodian Amanah Takaful Association-CATA) ដើម្បីអនុវត្តកម្មវិធីគម្រោង«លុយខ្ញុំស្អាត»(RIBA Clearance) ដែលនឹងអនុញ្ញាតឱ្យបងប្អូនខ្មែរឥស្លាម អាចដាក់ប្រាក់សន្សំដោយមិនទទួលការប្រាក់ទៅក្នុងគណនីសហគមន៍ខ្មែរឥស្លាម។
ពិធីចុះហត្ថលេខាលើអនុស្សរណៈនៃការយោគយល់គ្នាស្តីពីការអនុវត្តកម្មវិធី«លុយខ្ញុំស្អាត» ត្រូវបានធ្វើឡើងរវាងលោក អ៊ិន ចាន់នី ប្រធាននាយកប្រតិបត្តិធនាគារ អេស៊ីលីដា ជាមួយលោក សេន សាម៉ាន នាយកប្រតិបត្តិនៃសមាគមអាម៉ាណះតាកាហ្វុលកម្ពុជា នៅអគារស្នាក់ការកណ្តាលធនាគារ អេស៊ីលីដា កាលពីព្រឹកថ្ងៃទី៧ ខែមេសា ឆ្នាំ២០២៥។
ប្រធាននាយកប្រតិបត្តិធនាគារ អេស៊ីលីដា លោក អ៊ិន ចាន់នី បាននិយាយថា អនុស្សរណៈនៃការយោគយល់គ្នាស្តីពីការអនុវត្តគម្រោង«លុយខ្ញុំស្អាត» ដែលចុះហត្ថលេខាងរវាង ធនាគារអេស៊ីលីដា ជាមួយ សមាគមអាម៉ាណះតាកាហ្វុលកម្ពុជា បានឆ្លុះបញ្ចាំងពីការប្តេជ្ញាចិត្តរបស់ភាគីទាំង ២ ដើម្បីផ្តល់ជូននូវសេវាកម្មហិរញ្ញវត្ថុមួយមានភាពល្អប្រសើរស្របតាមគោលការណ៍ច្បាប់ឥស្លាម និងក៏អាចជួយធ្វើឱ្យការគ្រប់គ្រងហិរញ្ញវត្ថុរបស់សមាជិក CATA កាន់តែមានភាពរឹងមាំ និងទំនុកចិត្តខ្ពស់ផងដែរ។ ការដាក់ប្រាក់ ទៅក្នុងគម្រោង «លុយខ្ញុំស្អាត» ពីសំណាក់សហគមន៍ខ្មែរឥស្លាម ក៏អាចជួយពួកគេឱ្យមានទំនុកចិត្តថាទ្រព្យសម្បត្តិពួកគេនឹងត្រូវបានការការពារដ៏រឹងមាំ បើទោះបីទីកន្លែងរស់នៅ(លំនៅឋាន)ពួកគេជួបនឹងការខូចខាត ឬបំផ្លាញដោយសារហេតុផលអ្វីក៏ដោយ។
លោកបានថ្លែងថា៖«ភាពជាដៃគូនេះ ក៏ផ្តល់នូវដំណោះស្រាយប្រកបដោយតម្លាភាព សុវត្ថិភាព ដោយធនាគារ អេស៊ីលីដា នឹងផ្តល់ជូននូវសេវាកម្មធនាគារដែលគោរពតាមច្បាប់សាវីអះ(Sharia) ដែលអនុញ្ញាតឱ្យបងប្អូនខ្មែរឥស្លាមអាចដាក់ប្រាក់សន្សំដោយមិនទទួលការប្រាក់ ឬត្រូវបានកាត់ចេញដោយស្វ័យប្រវត្តិចូលទៅក្នុងគណនី CATA ដែលមាននៅធនាគារ អេស៊ីលីដា សម្រាប់គម្រោង[លុយខ្ញុំស្អាត] យកទៅប្រើប្រាស់ក្នុងគម្រោងសហគមន៍ និងសកម្មភាពសប្បុរធម៌នានាដែលអនុលោមតាមច្បាប់ឥស្លាម»។
លោកលើកឡើងទៀតថា អេស៊ីលីដា នឹងប្រកាន់ខ្ជាប់នូវគោលការណ៍សីលធម៌ វិជ្ជាជីវៈ សង្គម ច្បាប់ និងបរិស្ថាន ក្នុងគោលបំណងលើកស្ទួយជីវភាពរស់នៅរបស់ប្រជាជនឱ្យប្រសើរឡើង និងបង្កើនអត្ថប្រយោជន៍ជូនដល់គ្រប់ភាគីពាក់ព័ន្ធ ព្រមទាំងជំរុញការអភិវឌ្ឍសេដ្ឋកិច្ចជាតិ។
បើតាមលោក ចាន់នី សម្រាប់នីតិវិធីបើកគណនីនៃគម្រោង«លុយខ្ញុំស្អាត» គឺគ្រាន់តែម្ចាស់គណនីប្រាប់ទៅបុគ្គលិកធនាគារអេស៊ីលីដា បន្ទាប់មកបុគ្គលិកនឹងជួយសម្របសម្រួលតាមទម្រង់ដែលបានរៀបចំ។
ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានក្រុមប្រឹក្សាសមាគម CATA លោក អូស្មាន ហាស្សាន់ ដែលធ្វើជាសាក្សីក្នុងពិធីចុះ MoU ខាងលើបានប្រាប់អ្នកសារព័ត៌មានថា គម្រោង«លុយខ្ញុំស្អាត» គឺជាក្តីប្រាថ្នាជាយូរមកហើយរបស់សហគមន៍ខ្មែរឥស្លាម ដែលចង់មានគ្រឹះស្ថានហិរញ្ញវត្ថុមួយផ្តល់លទ្ធភាពដល់ពួកគេសម្រាប់ការរក្សាទុក«ប្រាក់ស្អាត» ខណៈពួកគាត់មិនចង់បានការប្រាក់ ឬអត្ថប្រយោជន៍ផ្សេងៗយកទៅច្របូលច្របល់ជាមួយនឹងលុយផ្សេងទៀត។ លោកបន្តថា ការដាក់ឱ្យអនុវត្តគម្រោង«លុយខ្ញុំស្អាត» នឹងផ្តល់ឱកាសដល់ខ្មែរឥស្លាមដែលចង់ផ្តល់ការប្រាក់ បានពីប្រាក់សន្សំរបស់គាត់ ឱ្យសមាគម CATA យកទៅប្រើប្រាស់ដើម្បីផលប្រយោជន៍រួមស្របតាមច្បាប់ឥស្លាម ដូចជា ការសាងសង់ផ្លូវ មន្ទីរពេទ្យ និងសាលារៀនជាដើម។
លោកប្រាប់ទៀតថា រហូតមកដល់ពេលនេះ សមាគម CATA មានសមាជិកជាង ២ ០០០នាក់។ លោកសង្ឃឹមថា នឹងមានសមាជិកជាច្រើននឹងបើកគណនីនៃគម្រោង«លុយខ្ញុំស្អាត»។
លោកបានបញ្ជាក់ថា៖«ការដាក់ប្រាក់ធនាគារនឹងផ្តល់ឱ្យពួកគាត់នូវអត្ថប្រយោជន៍ត្រង់ថា ប្រាក់របស់ពួកគាត់ គឺបានចូលរួមចំណែកសម្រាប់យកទៅកសាងវិស័យបុណ្យទាន»។
បើតាមលោក នៅកម្ពុជាបច្ចុប្បន្នមានបងប្អូនខ្មែរឥស្លាម មានប្រហែលជាង ៨០ម៉ឺននាក់។
គិតត្រឹមដំណាច់ខែធ្នូ ឆ្នាំ២០២៤ ធនាគារ អេស៊ីលីដា មានទ្រព្យសកម្មសរុបចំនួនជាង ១០,៨៣ពាន់លានដុល្លារអាមេរិក ប្រាក់បញ្ញើសន្សំសរុបចំនួន ៨,៣៦ ពាន់លានដុល្លារ និងមានអតិថិជនប្រមាណជាង ៥,៥២ លាននាក់។ ធនាគារ អេស៊ីលីដា មានដៃគូអាជីវកម្មសរុបច្រើងជាង ០,៥៥លានដៃគូ និងមានអ្នកប្រើប្រាស់អេស៊ីលីដា ស៊ូភើអេប សរុបចំនួនជាង ៤,៥៤ លាននាក់៕
