លោកនាយករដ្ឋមន្ត្រីក្រិក Kyriakos Mitsotakis ធ្វើសេចក្តីថ្លែងការណ៍ក្នុងអំឡុងជំនួបនៃបណ្តាប្រទេសនៅសមុទ្រមេឌីទែរ៉ាណេកាលពីថ្ងៃទី ១៧ កក្កដា។
នាយករដ្ឋមន្រ្តីក្រិកបាននិយាយថា បណ្តាប្រទេសនៅតាម សមុទ្រមេឌីទែរ៉ាណេ ត្រូវតែដឹកនាំរកវិធីដោះស្រាយការប្រែប្រួលអាកាសធាតុដោយព្រមានថាផលប៉ះពាល់នៃការធ្វើអ្វីសោះ គឺអាចមានវិសាលភាពមិនអាចនឹកស្មានដល់ដោយមនុស្សជាតិអាចនឹងតស៊ូ ដើម្បីរស់រានមានជីវិតនៅសតវត្សរ៍បន្តបន្ទាប់។
ប្រទេសក្រិក តួកគី ស៊ីប និងអេស្ប៉ាញ ត្រូវបានបំផ្លិចបំផ្លាញដោយភ្លើងឆេះព្រៃ និងបានជួបប្រទះសីតុណ្ហភាពខ្ពស់នៅរដូវក្តៅនេះដោយអ្នកវិទ្យាសាស្ត្រព្រមានថាតំបន់នេះ បានប្រែក្លាយទៅជា«ចំណុចភ្លើងឆេះព្រៃ»។ ក្រៅពីនេះ ប្រទេសអាល្លឺម៉ង់ តួកគី និងប្រទេសចិន ក៏ត្រូវបានវាយប្រហារ ដោយទឹកជំនន់មហន្តរាយផងដែរ។
នាយករដ្ឋមន្រ្តីក្រិកលោក Kyriakos Mitsotakis បានប្រាប់ Reuters នៅក្នុងបទសម្ភាសមួយថា៖ «ខ្ញុំលែងចង់និយាយអំពីការប្រែប្រួលអាកាសធាតុ ប៉ុន្តែខ្ញុំចង់និយាយអំពីវិបត្តិអាកាសធាតុព្រោះវាបានមកដល់ហើយ។ ដើម្បីដោះស្រាយវាយើងត្រូវការគោលនយោបាយដែលមានសារៈសំខាន់ ដើម្បីជួយគ្រប់ផ្នែកនៃសេដ្ឋកិច្ចនិងជីវិតសង្គមរបស់យើង»។
ក្រុមប្រឹក្សាអាកាសធាតុរបស់អង្គការសហប្រជាជាតិបានព្រមានថា រលកកម្តៅដ៏អាក្រក់ព្យុះសង្ឃរាដ៏ធំ និងព្រឹត្តិការណ៍អាកាសធាតុចម្លែកៗ ផ្សេងទៀតនឹងកាន់តែធ្ងន់ធ្ងរទៅៗ។
លោកនាយករដ្ឋមន្ត្រី Mitsotakis ដែលមានការអប់រំនៅសាកលវិទ្យាល័យ Havard បានធ្វើឱ្យសកម្មភាពអាកាសធាតុក្លាយជាចំណុចស្នូលនៃរដ្ឋបាលរបស់លោក។ មិនយូរប៉ុន្មានបន្ទាប់ពីការបោះឆ្នោតនៅខែកក្កដា ឆ្នាំ ២០១៩ លោកបានប្រកាសហាមឃាត់ស្ថានីយថាមពលដើរដោយធ្យូងថ្មចាប់ពីឆ្នាំ ២០២៨ ហើយថ្មីៗនេះបានបង្កើតក្រសួងការពារស៊ីវិលដែលមានភារកិច្ចដោះស្រាយវិបត្តិអាកាសធាតុ៕
មឹង ច័ន្ទសុម៉ានីតា
