.jpg)
ករណីវិជ្ជមាននៃជំងឺកូវីដ ១៩ នៅប្រទេសកូរ៉េខាងត្បូង មានការកើនឡើងយ៉ាងខ្លាំង នៅបន្ទាប់ពីប្រទេសនេះឈប់សម្រាកសម្រាប់ទិវាថ្លែងអំណរគុណអំឡុងថ្ងៃទី ២០ ដល់ថ្ងៃទី ២២ ខែកញ្ញា។នៅថ្ងៃសុក្រសប្ដាហ៍មុនប្រទេសកូរ៉េមួយនេះ បានរកឃើញមានករណីវិជ្ជមានសរុប៣ ២៧២ ករណី ដែលជាចំនួនករណីប្រចាំថ្ងៃច្រើនជាងគេបង្អស់។
«យើងព្យាករថាការកើនឡើងនៃការធ្វើដំណើរអំឡុងថ្ងៃឈប់សម្រាកបុណ្យថ្លែងអំណរគុណក៏ដូចជាការកើនឡើងនៃការប្រាស្រ័យទាក់ទងរវាងមនុស្សម្នាក់ទៅម្នាក់ទៀតអាចជាមូលហេតុចម្បងនៃការរាលដាលយ៉ាងខ្លាំងនៃជំងឺនេះ»។នេះបើតាមការលើកឡើងរបស់លោក ស្រី Jeong Eun-kyeong នាយិកានៃអង្គភាពប្រយុទ្ធប្រឆាំងនឹងជំងឺឆ្លងរបស់កូរ៉េខាងត្បូង (KDCA)។
ករណីវិជ្ជមានប្រចាំថ្ងៃអាចនឹងបន្តកើនឡើងរយៈពេល១សប្ដាហ៍ទៅ២សប្ដាហ៍ទៀត។នេះបើតាមការបន្ថែមរបស់លោកស្រី។
ជាមួយគ្នានេះដែរអាជ្ញាធរកូរ៉េខាងត្បូងបានជំរុញឱ្យអ្នកដែលត្រឡប់ពីដំណើរកម្សាន្តនៅថ្ងៃឈប់សម្រាកមុននឹងចូលធ្វើការវិញត្រូវធ្វើតេស្តរកជំងឺកូវីដ១៩ទោះបីជាមានរោគសញ្ញាស្រាលក៏ដោយ។
កូរ៉េខាងត្បូងរកឃើញមានអ្នកឆ្លងជំងឺកូវីដ១៩សរុបប្រមាណក្បែរ៣០ម៉ឺននាក់ ខណៈមានអ្នកស្លាប់តែជាង២ពាន់នាក់ប៉ុណ្ណោះ៕
ហ៊ីម រដ្ឋា
