ស្ត្រីប៉ាគីស្ថានម្នាក់ត្រូវកាត់ទោសប្រហារជីវិត ដោយសារបង្ហោះសារប្រមាថសាសនាអ៊ិស្លាមលើបណ្ដាញសង្គម Whatsapp របស់នាង។ AFP
.jpg)
ស្ត្រីប៉ាគីស្ថានម្នាក់ត្រូវបានកាត់ទោសប្រហារជីវិតដោយព្យួរកក៏ព្រោះតែនាងបានបង្ហោះសារប្រមាថសាសនាអ៊ិស្លាម និងបង្ហោះរូបត្លុករបស់ទេវទូតមហាម៉ាត់ នៅលើបណ្ដាញសង្គម Whatsapp។នេះបើតាមការលើកឡើងរបស់តុលាការប៉ាគីស្ថានកាលពីថ្ងៃពុធកន្លងទៅ។
បើយោងតាមការសង្ខេបរឿងក្ដីរបស់តុលាការអ្នកនាង Aneeqa Ateeq ដែលមានវ័យ ២៦ ឆ្នាំ ត្រូវបានចាប់ខ្លួនកាលពីខែឧសភា ឆ្នាំ ២០២០ ដោយសារតែការបង្ហោះ «សារប្រមាថ» នៅលើបណ្ដាញ Whatsapp របស់នាង។
តុលាការទីក្រុង Rawalpindi ដែលស្ថិតជាប់នឹងរដ្ឋធានីអ៊ីស្លាម៉ាបាដ បានសម្រេចឱ្យនាងជាប់ទោស ២០ ឆ្នាំ ហើយក្រោយមកក៏កាត់ទោសប្រហារជីវិតដោយការព្យួរក។
តាមពិតទៅអ្នកដែលដាក់ពាក្យបណ្ដឹងប្រឆាំងនឹងនាង គឺជាបុរសជនជាតិប៉ាគីស្ថានហើយជាមនុស្សស្គាល់គ្នាតាមរយៈការលេងហ្គេមអនឡាញតាំងពីឆ្នាំ ២០១៩។ អ្នកទាំង ២ បានទាក់ទងគ្នានៅតាមបណ្ដាញ Whatsapp។
បុរសម្នាក់នោះក្រោយមកក៏បានចោទប្រកាន់នាងថាបានផ្ញើសារប្រមាថនិងរូបត្លុកមហាម៉ាត់មកកាន់ខ្លួនហើយប្រើប្រាស់គណនីហ្វេសប៊ុករបស់នាងដើម្បីចែករំលែកសារនេះទៅកាន់គណនីផ្សេងៗទៀត។
យ៉ាងណាក៏ដោយនៅក្នុងតុលាការអ្នកនាង Aneeqa Ateeq ដែលជាសាសនិកអ៊ិស្លាម ១ រូប បានបដិសេធរាល់ការចោទប្រកាន់ទាំងអស់ហើយបានប្រាប់តុលាការថាដើមបណ្ដឹងរបស់នាងបានអូសនាងឱ្យនិយាយរឿងសាសនាហើយប្រមូលភ័ស្តុតាងនានាដើម្បី «សងសឹក» នាងក្រោយពេលដែលនាងបដិសេធមិនរាក់ទាក់ជាមួយបុរសម្នាក់នោះ។
ប៉ាគីស្ថានជារដ្ឋកាន់សាសនាអ៊ិស្លាមហើយរឿងក្ដីនៃការប្រមាថសាសនាជារឿងដ៏រសើបមួយដោយតុលាការច្រើនតែកាត់ទោសស្ងាត់ៗហើយកាត់ទោសឱ្យប្រហារជីវិត។ ទោះជាកាត់ទោសដល់ថ្នាក់ហ្នឹងមែនតែជាទូទៅគេសង្កេតឃើញថា ពិរុទ្ធជនច្រើនតែទទួលទោសនៅពន្ធនាគារហើយមិនត្រូវបានសម្លាប់នោះទេ៕
ហ៊ីម រដ្ឋា
