លោកនាយករដ្ឋមន្ត្រីអេស្ប៉ាញ ប៉េដ្រូ សានឆេស។ AFP
កាលពីថ្ងៃចន្ទ អាជ្ញាធរអេស្ប៉ាញបានប្រកាសថាពួកគេបានរកឃើញមេរោគចារកម្ម Pagasus នៅលើទូរស័ព្ទដៃរបស់លោកនាយករដ្ឋមន្ត្រីប៉េដ្រូ សានឆេស និងរដ្ឋមន្ត្រីក្រសួងការពារជាតិលោកស្រីម៉ាហ្គារីតា រ៉ូប៊ឺល។
រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី និងទំនាក់ទំនងសភាអេស្ប៉ាញលោកហ្វីលីក បូឡាណូស បាននិយាយក្នុងសន្និសីទសារព័ត៌មានមួយថា ទូរស័ព្ទដៃរបស់លោកសានឆេសបានឆ្លងមេរោគកាលពីខែឧសភា ២០២១ ហើយយ៉ាងហោចមានការបែកធ្លាយទិន្នន័យមួយបានកើតឡើង។ លោកមិនបានបញ្ជាក់ថាតើនរណាជាអ្នកលួចឃ្លាំមើលលោកនាយករដ្ឋមន្ត្រី ឬថាការឃ្លាំមើលនេះគឺធ្វើចេញពីទឹកដីបរទេស ឬនៅក្នុងទឹកដីអេស្ប៉ាញ។
លោកបូឡាណូសនិយាយថា៖ «អន្តរាគមន៍នេះគឺខុសច្បាប់ និងពីខាងក្រៅ។ ខាងក្រៅ មានន័យថាវាត្រូវបានអនុវត្តដោយស្ថាប័នក្រៅផ្លូវការ និងដោយគ្មានការអនុញ្ញាតពីរដ្ឋ»។ លោកបន្ថែមទៀតថា រឿងនេះ ត្រូវបានបញ្ជូនទៅឱ្យក្រសួងយុត្តិធម៌។
ការប្រកាសធ្វើឡើងបន្ទាប់ពីអង្គការសិទ្ធិឌីជីថលកាណាដា Citizen Lab បាននិយាយថារដ្ឋាភិបាលអេស្ប៉ាញបានឃ្លាំមើលមនុស្សយ៉ាងហោចណាស់ ៦០ នាក់ដែលពាក់ព័ន្ធជាមួយនឹងចលនាផ្ដាច់ខ្លួននៃតំបន់កាតាឡាន ដោយប្រើប្រាស់មេរោគ Pegasus ដដែល ដែលផលិតដោយក្រុមហ៊ុនអ៊ីស្រាអែល NSO Group។
ការចោទប្រកាន់នេះបានធ្វើឱ្យគណបក្សគាំទ្រឯករាជ្យភាពកាតាឡាន ERC ប្រកាសថាពួកគេនឹងដកការគាំទ្ររបស់ពួកគេចំពោះរដ្ឋាភិបាលសំឡេងភាគតិច រហូតដល់ពេលរដ្ឋាភិបាលចាត់វិធានការដើម្បីស្ដារទំនុកចិត្តឡើងវិញ។
ទីភ្នាក់ងារការពារសិទ្ធិឯកជនភាពទិន្នន័យរបស់សហភាពអឺរ៉ុប EDPS បានជំរុញឱ្យមានការហាមឃាត់ការប្រើប្រាស់មេរោគ Pegasus ជុំវិញការចោទប្រកាន់ថា អតិថិជនរបស់ NSO បានធ្វើការរំលោភបំពានលើសកម្មជនសិទ្ធមនុស្ស អ្នកសារព័ត៌មាន និងអ្នកនយោបាយ៕
