លោក Yogi Adityanath អភិបាលរដ្ឋអ៊ុតតាប្រាដេស ដែលបានបញ្ជាឱ្យមន្ត្រីរុះរើគ្រឹះស្ថាន និងផ្ទះខុសច្បាប់របស់ប្រជាជន។ រូបថត AFP
ក្រុមមន្ត្រីឥណ្ឌានិយាយ កាលពីថ្ងៃអាទិត្យថា អាជ្ញាធរក្នុងរដ្ឋអ៊ុតតាប្រាដេស បានរុះរើផ្ទះរបស់ប្រជាជនជាច្រើន ដែលរងការចោទប្រកាន់ថា ជាប់ពាក់ព័ន្ធក្នុងកុបកម្ម កាលពីសប្តាហ៍មុន ដែលរៀបចំឡើងប្រឆាំងតវ៉ានឹងការប្រមាថមើលងាយព្យាការីម៉ូហាម៉ាត ក្នុងសាសនាអ៊ិស្លាម ពីឥស្សរជនគណបក្សកាន់អំណាច។
មូស្លីមធ្វើដំណើរតាមផ្លូវនានាទូទាំងប្រទេសឥណ្ឌា ក្នុងប៉ុន្មានសប្តាហ៍ថ្មីៗនេះ ជំទាស់នឹងការអត្ថាធិប្បាយប្រឆាំងអ៊ិស្លាម ពីសមាជិក ២ នាក់នៃគណបក្សកាន់អំណាចជាតិនិយមហិណ្ឌូ Bharatiya Janata (BJP) របស់លោកនាយករដ្ឋមន្ត្រី ណារិនដ្រា ម៉ូឌី។ ការប៉ះទង្គិចគ្នាផ្ទុះឡើង រវាងអ្នកកាន់សាសនាអ៊ិស្លាម និងហិណ្ឌូ និងប៉ូលិស នៅតំបន់ជាច្រើន ដោយប៉ូលិសរដ្ឋអ៊ុតតាប្រាដេសចាប់ខ្លួនមនុស្សជាង ៣០០ នាក់ ក្នុងភាពចលាចលនេះ។
ក្រុមមន្ត្រីនិយាយថា នៅតំបន់កាស្មៀរដែលគ្រប់គ្រងដោយឥណ្ឌា ប៉ូលិសចាប់ខ្លួនយុវជនម្នាក់ពីបទបង្ហោះវីដេអូគំរាមកាត់ក្បាលអតីតអ្នកនាំពាក្យរបស់គណបក្សកាន់អំណាច ដែលនិយាយពាក្យប្រមាថមួយចំនួន។
សហគមន៍មូស្លីម ដែលជាក្រុមភាគតិចរបស់ឥណ្ឌា មើលឃើញថា ការអត្ថាធិប្បាយពីមន្រ្តីបក្សកាន់អំណាច ជាឧទាហរណ៍ចុងក្រោយបង្អស់នៃសម្ពាធ និងការអាម៉ាស់ក្រោមការគ្រប់គ្រងរបស់បក្ស BJP លើបញ្ហាជាច្រើន ចាប់តាំងពីសេរីភាពនៃការថ្វាយបង្គំសាសនា រហូតដល់ការពាក់កន្សែងរុំក្បាលហ៊ីចាប។
គណបក្ស BJP បានព្យួរការងារអ្នកនាំពាក្យរបស់ខ្លួន លោកស្រី Nupur Sharma និងបណ្តេញមេដឹកនាំម្នាក់ទៀត គឺលោក Naveen Kumar Jindal សម្រាប់ការអត្ថាធិប្បាយដែលបង្កឱ្យមានភាពចម្រូងចម្រាសខាងសាសនា។ ប៉ូលិសបានប្តឹងអ្នកទាំង ២ ហើយរដ្ឋាភិបាលបាននិយាយថា ការអត្ថាធិប្បាយនេះមិនឆ្លុះបញ្ចាំងពីទស្សនៈរបស់ខ្លួនទេ។ ប៉ុន្តែក្រុមមូស្លីមទាមទារឱ្យមានការចាប់ខ្លួន ខណៈក្រុមហិណ្ឌូជ្រុលនិយមមួយចំនួន ចាត់ទុកអ្នកទាំង ២ ថា ជាអ្នកនយោបាយក្លាហាន និងជាតិនិយម។
ទាក់ទងនឹងភាពចលាចល អ្នកនាំពាក្យរដ្ឋរបស់បក្ស BJP និយាយថា កាលពីចុងសប្តាហ៍កន្លងទៅនេះ អភិបាលរដ្ឋអ៊ុតតាប្រាដេស លោក Yogi Adityanath បញ្ជាឱ្យមន្ត្រីរុះរើគ្រឹះស្ថាន និងផ្ទះខុសច្បាប់របស់ប្រជាជន ដែលរងការចោទប្រកាន់ថា មានជាប់ពាក់ព័ន្ធក្នុងកុបកម្មនៅក្នុងរដ្ឋ កាលពីសប្តាហ៍មុន។
មេដឹកនាំគណបក្សប្រឆាំងលើកឡើងថា រដ្ឋាភិបាលរបស់លោក Adityanath កំពុងតែបន្តប្រើវិធីសាស្ត្រមិនស្របតាមរដ្ឋធម្មនុញ្ញ ដើម្បីបំបិទមាត់បាតុករ។ រហូតទល់ពេលនេះ លោក ម៉ូឌី មិនទាន់ធ្វើអត្ថាធិប្បាយអ្វីទេ ជុំវិញភាពចលាចលក្នុងសហគមន៍នេះ។
នៅភាគខាងកើតរដ្ឋបេងហ្គាល់ខាងលិច អាជ្ញាធរអនុវត្តច្បាប់គ្រាអាសន្ន ដែលហាមមានការជួបជុំជាសាធារណៈរហូតដល់ថ្ងៃទី ១៦ ខែមិថុនា។
អភិបាលរដ្ឋពីបក្ស BJP បានចោទប្រកាន់ប្រទេសជិតខាងបង់ក្លាដែស ពីបទញុះញង់ឱ្យមានអំពើហិង្សានៅក្នុងរដ្ឋនេះ។ សប្តាហ៍មុន បណ្តាប្រទេសដូចជាកាតា អារ៉ាប៊ីសាអ៊ូឌីត អេមីរ៉ាតអារ៉ាប់រួម អូម៉ង់ អ៊ីរ៉ង់ បានធ្វើការតវ៉ាការទូត ដើម្បីទាមទារការសុំទោសពីរដ្ឋាភិបាលរបស់លោក ម៉ូឌី៕
ហួន ឌីណា
វីដេអូ៖
