លោក អេរដូហ្គែន ថ្លែងក្នុងសន្និសីទសារព័ត៌មាន ក្រោយកិច្ចប្រជុំគណៈរដ្ឋមន្ត្រី ក្នុងក្រុងអង់ការ៉ា កាលពីថ្ងៃទី ៦ ខែមិថុនា។ AFP
ប្រធានាធិបតីតួកគី ដែលជាប្រទេសនៅតំបន់មជ្ឈិមបូព៌ា មានព្រំដែនជាប់ប្រទេសក្រិក បានព្រមានប្រទេសជិតខាងខ្លួនកុំឱ្យបន្តធ្វើសកម្មភាពយោធានានាលើកោះ ក្នុងសមុទ្រ Aegean បើមិនដូច្នេះទេ «ពួកគេនឹងជួបវិប្បដិសារី» ខណៈប្រមុខរដ្ឋក្រិក អំពាវនាវឱ្យប្រជាជនខ្លួនសាមគ្គីគ្នា។
លោក រ៉េសិប តៃយីប អេរដូហ្គែន (Recep Tayyip Erdogan) នៅក្នុងសារ ដែលបង្ហោះលើបណ្តាញសង្គមធ្វីតធើរបន្តបន្ទាប់ ជាភាសាក្រិក ដែលមានខ្លឹមសារថា៖ «ជាថ្មីម្តងទៀត យើងព្រមានក្រិកឱ្យប្រុងប្រយ័ត្ន ដោយនៅឱ្យឆ្ងាយពីក្តីសុបិន វោហារស័ព្ទ និងសកម្មភាព ដែលនឹងនាំទៅរកលទ្ធផលដ៏គួរឱ្យ «សោកស្តាយ» ដូចដែលកើតឡើង កាលពី ១ សតវត្សរ៍មុន»។ នេះបើយោងតាមបណ្តាញសារព័ត៌មាន Middle East Monitor។
ទីភ្នាក់ងារព័ត៌មានតួកគី aa.com បានផ្សាយ កាលពីចុងខែឧសភា ដោយចោទប្រកាន់ក្រិកថា បន្តធ្វើសកម្មភាពយោធានៅតាមបណ្តាកោះនានា នៅភាគខាងកើតសមុទ្រ ដែលរំលោភទាំងសន្ធិសញ្ញា Lausanne នៃប្រទេសស្វ៊ីស ឆ្នាំ ១៩២៣ និងសន្ធិសញ្ញាទីក្រុងប៉ារីស ឆ្នាំ ១៩៤៧។
លទ្ធផលប្រកបដោយវិប្បដិសារី ដែលប្រធានាធិតីរូបនេះ បានលើកឡើង សំដៅលើជ័យជម្នះរបស់ប្រទេសតួកគី លើការឈ្លានពានទឹកដីរបស់ខ្លួន ដោយក្រិក និងសម្ព័ន្ធមិត្តអ្នកចក្រពត្តិនិយមលោកខាងលិចរបស់ពួកគេ បន្ទាប់ពីការដួលរលំនៃចក្រភពអូតូម៉ង់ បន្ទាប់ពីសង្គ្រាមលោកលើកទី១។
លោក អេរដូហ្គែន បានរិះគន់ការប្រើប្រាស់ចំពោះសហភាពអឺរ៉ុប (EU) និងសម្ព័ន្ធភាពណាតូរបស់ទីក្រុងអាថែន ដែលក្រោយមកទីក្រុងអង់ការ៉ា បានក្លាយជាសមាជិករបស់អង្គការយោធាណាតូដែរ ក្នុងការគាំទ្រក្រិកចំពោះជម្លោះ ក្នុងតំបន់របស់ពួកគេ ដោយនិយាយថា រដ្ឋាភិបាលក្រិកគួរតែចរចាបញ្ហាទាំងឡាយជាទ្វេភាគី។
លោកបាននិយាយថា៖ «ការប៉ុនប៉ងប្រើប្រាស់ណាតូធ្វើជាឧបករណ៍ និងប្រទេសទី៣ ដែលនាំឱ្យពួកគេជាប់ពាក់ព័ន្ធ ក្នុងភាពខុសច្បាប់នៃសមយុទ្ធយោធាផ្សេងៗ នៅលើកោះដោយលក្ខខណ្ឌគ្មានយោធា គឺគ្រាន់តែជាការប៉ុនប៉ង ដែលនឹងបញ្ចប់ទៅប្រកបដោយមហន្តរាយប៉ុណ្ណោះ»។
លោក អេរដូហ្គែន ក៏បានចោទរដ្ឋាភិបាលក្រិកពីបទរំលោភលើតម្លៃ និងច្បាប់របស់សហភាពអឺរ៉ុប ដោយធ្វើទុក្ខបុកម្នេញលើជនមូស្លីមរបស់ខ្លួន ដោយបញ្ជាក់ថា «ទោះបីជាសមាជិកនៃសហភាពអឺរ៉ុបក៏ដោយ ក្រិកនៅតែបន្តកៀបសង្កត់ជនជាតិភាគតិចតួកគី ដែលរស់នៅលើកោះ Western Thrace, Rhodes និង Kos ដោយមិនអើពើនឹងតម្លៃនៃសហភាព សិទ្ធិមនុស្សទូទាំងពិភពលោក និងកិច្ចព្រមព្រៀងអន្តរជាតិនោះឡើយ»។
ប្រឈមនឹងការព្រមាននេះ នាយករដ្ឋមន្ត្រីក្រិក លោក Kyriakos Mitsotakis បន្ទាប់មកបានអំពាវនាវឱ្យមានឯកភាពជាតិ ដោយឆ្ពោះទៅរកអ្នកជិតខាង «ដែលមិនអាចទាយទុកជាមុនបាន» ដោយនិយាយអំពីលោក អេរដូហ្គែន ថា «គាត់កាន់តែឯកោ គាត់កាន់តែខឹង»។ នេះបើយោងតាម Middle East Monitor។
រហូតមកដល់ពេលនេះ ក្រុងអាថែន បានបដិសេធមិនព្រមធ្វើឱ្យគ្មានយោធាលើកោះនានា ក្នុងសមុទ្រ Aegean នោះទេ ដោយទទូចថា ខ្លួនកំពុងការពារផលប្រយោជន៍សន្តិសុខជាតិរបស់ខ្លួន។ ទោះជាយ៉ាងនេះក្តី ទីក្រុងអង់ការ៉ា បានលើកឡើងពីសន្ធិសញ្ញា និងច្បាប់អន្តរជាតិ ក្នុងកិច្ចខិតខំប្រឹងប្រែង ដើម្បីបង្ហាញថា ទង្វើរបស់ក្រិក គឺជាការគំរាមកំហែងដោយផ្ទាល់ដល់សន្តិសុខជាតិរបស់ខ្លួន៕
វីដេអូ៖
