អ្នកធ្វើការជួយសង្រ្គោះ ធ្វើដំណើរទៅកាន់តំបន់រងប៉ះពាល់ដោយរញ្ជួយដីនៅក្នុងតំបន់ Luding ស្រុកGanzi ខេត្តSichuan ភាគនិរតីប្រទេសចិន នៅថ្ងៃទី ៦ កញ្ញា។ AFP
មនុស្សយ៉ាងតិច ៦៥ នាក់ ត្រូវបានអះអាងថា ស្លាប់ ដោយសារផលប៉ះពាល់ពីការរញ្ជួយដីនៅក្នុងខេត្ត Sichuan ស្ថិតនៅភាគនិរតីនៃប្រទេសចិន ចាប់តាំងពីថ្ងៃចន្ទ ខណៈដែលអាជ្ញាធរ បន្តជួយសង្គ្រោះប្រជាជនរងគ្រោះ។
សេចក្តីរាយការណ៍របស់ទីភ្នាក់ងារព័ត៌មានអន្តរជាតិនៃប្រព័ន្ធផ្សាយរដ្ឋចិន CCTV បណ្តាញព័ត៌មាន CNN របស់អា មេរិក និង REUTER របស់ចក្រភពអង់គ្លេសជាដើម បានផ្សាយថា គ្រោះរញ្ជួយដីកម្រិត ៦,៦ រ៉ិចទ័រ ដែលបានវាយប្រហារទីក្រុង Chengdu នៃខេត្ត Sichuan នៅតំបន់និរតីនៃប្រទេសចិន ចាប់តាំងពីម៉ោង ១ រសៀលកាលពីថ្ងៃចន្ទ នៅតែមានបង្កគ្រោះថ្នាក់។
សេចក្តីរាយការណ៍បានឱ្យដឹងថា មនុស្សយ៉ាងតិច ២៤៨ នាក់ បានរងរបួស និង ១២ នាក់ផ្សេងទៀតនៅបាត់ខ្លួន។
ប្រព័ន្ធផ្សព្វផ្សាយរដ្ឋចិន បានរាយការណ៍ថា ក្រុមអ្នកជួយសង្គ្រោះ ក៏កំពុងធ្វើការលើការទាញយកមនុស្សជាង ២០០ នាក់ដែលជាប់គាំងនៅក្នុងតំបន់រញ្ជួយ និងស្ដារឡើងវិញនូវសេវាទូរគមនាគមន៍ និងថាមពល និងប្រព័ន្ធទឹក ព្រមទាំងការផ្តល់អាហារដល់ប្រជាពលរដ្ឋដែលរងផលប៉ះពាល់។
នៅថ្ងៃអង្គារ ទូរទស្សន៍រដ្ឋ បានរាយការណ៍ថា មនុស្សជាង ២០០ នាក់នៅតែជាប់គាំងនៅក្នុងទីក្រុង Hailuogou ដែលជាកន្លែងទេសចរណ៍ដ៏ពេញនិយមមួយ ដែលត្រូវបានគេស្គាល់ដោយសារផ្ទាំងទឹកកក ព្រៃឈើដ៏ខៀវស្រងាត់ និងកំពូលភ្នំដ៏ស្រស់ស្អាត។ក្រុមអ្នកជួយសង្គ្រោះនៅតែកំពុងធ្វើការ ដើម្បីបើកផ្លូវដែលបិទឱ្យដំណើរការឡើងវិញ។
នៅទីក្រុង Luding ចំណុចកណ្តាលនៃការរញ្ជួយដី ហេដ្ឋារចនាសម្ព័ន្ធ ថាមពល និងទឹក និងទូរគមនាគមន៍ ត្រូវបានខូចខាតយ៉ាងធ្ងន់ធ្ងរ។ នេះបើយោងតាមទូរទស្សន៍រដ្ឋ។
ការខូតខាត ត្រូវបានគេរាយការណ៍ផងដែរថា ផ្ទះចំនួន ២៤៣ ខ្នង បានដួលរលំ និង ១៣ ០១០ ខ្នង បានរងការខូចខាត។ សណ្ឋាគារចំនួន ៤ និងផ្ទះស្នាក់នៅរាប់រយកន្លែងក៏រងផលប៉ះពាល់ផងដែរ៕
