ទីភ្នាក់ងារ NASA បង្ហាញអាចម៍ផ្កាយឌីម័រហ្វូស Dimorphos កាលពីថ្ងៃទី ២៦ កញ្ញា។ AFP
នៅថ្ងៃទី ២៦ ខែកញ្ញា ត្រូវនឹងថ្ងៃទី ២៧ ខែកញ្ញា ឆ្នាំ ២០២២ នៅកម្ពុជា យានអវកាស DART របស់ទីភ្នាក់ងារអវកាស NASA បានហោះទៅបុកអាចម៍ផ្កាយឌីម័រហ្វូស Dimorphos ក្នុងប្រតិបត្តិការធ្វើតេស្តជាប្រវត្តិសាស្ត្រលើសមត្ថភាពរបស់មនុស្សជាតិ ដើម្បីការពារវត្ថុពីអវកាស ដែលហោះមកបំផ្លិចបំផ្លាញជីវិតនៅលើផែនដី។
អាចម៍ផ្កាយឌីម័រហ្វូស (Dimorphos) មានមុខកាត់ប្រមាណ ១៦០ ម៉ែត្រ ដែលត្រូវជាព្រះចន្ទរបស់អាចម៍ផ្កាយ ឌីឌីម៉ូស (Didymos) ត្រូវបានហោះបុកដោយយានអាវកាសរបស់ទីភ្នាក់ងារណាសា នៅព្រឹកថ្ងៃអង្គារទី ២៧ ខែកញ្ញា ឆ្នាំ ២០២២ នៅកម្ពុជា។ ជាប្រតិបត្តិការធ្វើតេស្តជាប្រវត្តិសាស្ត្រលើកទី ១ ដែលមានឈ្មោះថា DART (Double Asteroid Redirection Test) ដើម្បីសាកល្បងមើលអំពីប្រសិទ្ធភាពនៃការបង្វែរគន្លងអាចម៍ផ្កាយឱ្យចៀសពីការហោះមកបុកភពផែនដីក្នុងករណីវាត្រូវហោះតម្រង់មករក។
ប្រតិបត្តិការសាកល្បងកម្ទេចអាចម៍ផ្កាយបញ្ចៀសគ្រោះថ្នាក់ដល់ជីវិតនៅលើភពផែនដីនេះ ធ្វើឡើងក្រោយការបាញ់បង្ហោះសាកល្បងសមត្ថភាព ១ ដងរួចមកហើយ កាលពី១០ខែមុន។ លោក Lori Glaze នាយកផ្នែកវិទ្យាសាស្ត្រពិភពរបស់ទីភ្នាក់ងារ NASA បានគូសបញ្ជាក់ថា ដល់ពេលដែលត្រូវចាប់ផ្តើមយុគសម័យថ្មីមួយ ដែលមនុស្សជាតិមានសមត្ថភាពការពារខ្លួនពីគ្រោះថ្នាក់បង្កដោយអាចម៍ផ្កាយហើយ។
ទីភ្នាក់ងារណាសា បានអះអាងថា ប្រតិបត្តិការ DART នេះគ្មានគ្រោះថ្នាក់ដល់មនុស្សជាតិឡើយ ព្រោះថាវាជាការធ្វើតេស្តសាកល្បងនៅលម្ហអាកាសដែលឆ្ងាយពីភពផែនដីក្នុងចម្ងាយប្រមាណ ១០ លានគីឡូម៉ែត្រឯណោះ។ តែយ៉ាងណាក្ដី នៅក្រោយប្រតិបត្តិការនេះ គេនៅត្រូវត្រួតពិនិត្យបន្តពីការផ្លាស់ប្តូររបស់ទីតាំងអាចម៍ ផ្កាយនោះថា អាចនឹងងាករេចេញពីគន្លងឬក៏យ៉ាងណា?
គួរបញ្ជាក់ថាគេត្រូវចំណាយលុយជាង ៣០០ លានដុល្លារអាមេរិក ក្នុងប្រតិបត្តិការធ្វើតេស្តជាប្រវត្តិសាស្ត្រ DART នេះដែលរំពឹងថា នឹងក្លាយជាខែលការពារជីវិតលើផែនដី ផុតពីការវាយប្រហារដោយអាចម៍ផ្កាយធំៗ នៅថ្ងៃអនាគត។
មានការលើកឡើងថា កាលពីជាង ៦៦ លានឆ្នាំមុន មានអាចម៍ផ្កាយដ៏ធំមួយបានហោះមកបុកផែនដី បានធ្វើឱ្យពពួកសត្វដាយណូស័រត្រូវស្លាប់ផុតពូជ បាត់ស្រមោលទាំងស្រុងពីលើភពផែនដី។ ការគំរាមកំហែងរបស់អាចម៍ ផ្កាយមកលើភពផែនដី បាននិងកំពុងក្លាយជាក្តីបារម្ភរបស់មនុស្សជាតិថាអាចនឹងជួបជោគវាសនា ដូចគ្នានឹងសត្វដាយណូស័រដែរ បើសិនជាមានអាចម៍ផ្កាយធ្លាក់សំដៅមកបុកផែនដីសាជាថ្មី៕
