មីស៊ីលបាលីស្ទិកអន្តរទ្វីប (ICBM) «Hwasong Gun 17» ដែលកូរ៉េខាងជើងបាញ់តេស្ត កាលពីថ្ងៃទី ១៨ វិច្ឆិកា។ AFP
សេចក្តីថ្លែងការណ៍មួយពីទីភ្នាក់ងារសារព័ត៌មានរដ្ឋកូរ៉េខាងជើង KCNA បានលើកឡើងថា រដ្ឋមន្ត្រីការបរទេសកូរ៉េខាងជើងនៅថ្ងៃទី ២០ ខែវិច្ឆិកា បានសម្តែងការសោកស្តាយយ៉ាងខ្លាំងចំពោះការស្ដីបន្ទោសរបស់ប្រធានអង្គការសហប្រជាជាតិ លោក អង់តូនីញ៉ូ ហ្គុយតឺរេស (Antonio Guterres) ចំពោះការបាញ់មីស៊ីលផ្លោងអន្តរទ្វីបរបស់ប្រទេសនេះ។
កាលពីថ្ងៃសុក្រ សប្តាហ៍មុននេះកូរ៉េខាងជើងបានបាញ់មីស៊ីលផ្លោងអន្តរទ្វីប Hwasong-17 របស់ខ្លួនក្នុងការបាញ់សាកល្បងដ៏មានឥទ្ធិពលបំផុតមួយរបស់ប្រទេសនេះដែលជំរុញឱ្យលោក ហ្គូតទែរ៉េសជំរុញឱ្យទីក្រុងព្យុងយ៉ាងបញ្ឈប់ «សកម្មភាពបង្កហេតុ» បន្ថែមទៀត។
រដ្ឋមន្ត្រីការបរទេសកូរ៉េខាងជើង លោកស្រី Choe Son Hui បានថ្លែងក្នុងសេចក្ដីថ្លែងការណ៍ដែលចេញផ្សាយដោយ KCNA ថា៖ «ខ្លួនមានការសោកស្ដាយយ៉ាងខ្លាំងចំពោះការពិតដែលថា អគ្គលេខាធិការអង្គការសហប្រជាជាតិ មានអាកប្បកិរិយាគួរឱ្យស្អប់ខ្ពើម»។
លោកស្រីបន្តថាសេចក្តីថ្លែងការណ៍របស់លោក ហ្គុយតឺរេស ជាការភ្លេចភ្លាំងពីគោលបំណង និងគោលការណ៍នៃធម្មនុញ្ញអង្គការសហប្រជាជាតិ និងបេសកកម្មដ៏ត្រឹមត្រូវរបស់អង្គការនេះ គឺរក្សាភាពមិនលម្អៀងវត្ថុបំណង និងសមធម៌ក្នុងគ្រប់បញ្ហាទាំងអស់។ មិនត្រឹមតែប៉ុណ្ណេះ លោកស្រីបានហៅលោក ហ្គុយតឺរេស ថាជា «អាយ៉ងរបស់អាមេរិក» ទៀតផង។
គួរកត់សម្គាល់ថា កូរ៉េខាងជើងដែលប្រដាប់ដោយអាវុធនុយក្លេអ៊ែរ បានធ្វើការបាញ់បង្ហោះមីស៊ីលបំបែកឯតទគ្គកម្មក្នុងរយៈពេលប៉ុន្មានសប្តាហ៍ថ្មីៗនេះដោយទីក្រុងព្យុងយ៉ាង និងទីក្រុងម៉ូស្គូ ដែលជាសម្ព័ន្ធមិត្ត បានស្តីបន្ទោសម្តងហើយម្តងទៀតលើចំណាត់ការរបស់ អាមេរិកក្នុងការជំរុញការការពារសន្តិសុខចំពោះសម្ព័ន្ធមិត្តកូរ៉េខាងត្បូង និងជប៉ុន។
គេសង្កេតមើលឃើញថា ចាប់តាំងពីមេដឹកនាំកូរ៉េខាងជើង លោក គីម ជុងអ៊ុន បានប្រកាសថាប្រទេសកូរ៉េខាងជើងជារដ្ឋនុយក្លេអ៊ែរ ដែលមិនអាចងាកក្រោយបាន នៅក្នុងខែកញ្ញារួចមកសហរដ្ឋអាមេរិកបានបង្កើនកិច្ចសហប្រតិបត្តិការសន្តិសុខក្នុងតំបន់។ ក្រោយការបាញ់មីស៊ីលផ្លោងអន្តរទ្វីប Hwasong-17 កាលពីថ្ងៃសុក្រនេះទីក្រុងតូក្យូ និងវ៉ាស៊ីនតោន ក៏បានធ្វើសមយុទ្ធយោធារួមគ្នា នៅតំបន់ដែនអាកាសលើសមុទ្រជប៉ុនផងដែរ។
ជុំវិញបញ្ហានេះ លោកស្រី Choe បានថ្លែងថា៖ «ថ្មីៗនេះ យើងបានព្រមានអគ្គលេខាធិការអង្គការសហប្រជាជាតិឱ្យពិចារណាលើបញ្ហានៃឧបទ្វីបកូរ៉េ ដោយឈរលើមូលដ្ឋាននៃភាពមិនលំអៀង និងវត្ថុបំណង»។
លោកស្រីបន្ថែមថា កូរ៉េខាងជើងបានបញ្ជាក់យ៉ាងច្បាស់ថាខ្លួននឹងត្រូវតែមានលទ្ធផលសម្រាប់«ការការពារខ្លួនក្រោមបរិយាកាសសន្តិសុខដ៏គួរឱ្យព្រួយបារម្ភនៅក្នុងឧបទ្វីបកូរ៉េ និងតំបន់ ដែលបង្កឡើងដោយកិច្ចសហប្រតិបត្តិការយោធាដ៏គ្រោះថ្នាក់របស់សហរដ្ឋអាមេរិក»។
លោកស្រី Choe បាននិយាយថា៖ «យ៉ាងណាមិញ អគ្គលេខាធិការអង្គការសហប្រជាជាតិ បានបង្វែរការស្តីបន្ទោសចំពោះករណីនេះ មកលើកូរ៉េខាងជើង ជាជាងសហរដ្ឋអាមេរិក»៕
វីដេអូ៖
