ប្រជាជនពិនិត្យមើលផ្ទះបាក់បែក បន្ទាប់ពីរញ្ជួយដីកម្រិត ៥,៦ រិចទ័រ ដែលបានបណ្តាលឱ្យមនុស្សយ៉ាងតិច ១៦២ នាក់ស្លាប់ និងរាប់រយនាក់ផ្សេងទៀត រងរបួស និងជាច្រើននាក់ទៀត បាត់ខ្លួននៅទីក្រុង Cianjur នៅពីថ្ងៃទី ២២ ខែវិច្ឆិកា។ AFP
គ្រោះរញ្ជួយដីកម្រិត ៥,៦ រ៉ិចទ័រ នៅលើកោះជ្វារបស់ប្រទេសឥណ្ឌូនេស៊ី បានសម្លាប់មនុស្សយ៉ាងហោចណាស់ ១៦២ នាក់ និងជាង ៣២០ នាក់រងរបួស។ នេះបើតាមតុល្យការរបស់អាជ្ញាធរឥណ្ឌូនេស៊ីគិតត្រឹមយប់ថ្ងៃចន្ទ ទី ២១ វិច្ឆិកា ឆ្នាំ ២០២២។
គ្រោះរញ្ជួយដីដ៏ខ្លាំងនេះ បានវាយប្រហារតំបន់ស៊ីអានជូ (Cianjur) ស្ថិតក្នុងខេត្តជ្វាខាងលិច (West Java) កាលពីរសៀលថ្ងៃចន្ទក្នុងជម្រៅ ១០ គីឡូម៉ែត្រ។ តំបន់ដែលមានប្រជាជនរស់នៅជាង ២,៥ លាននាក់នេះ មានចម្ងាយប្រមាណ ៧៥ គី ឡូម៉ែត្រភាគខាងត្បូងរដ្ឋធានីហ្សាការតា។
តាមទិន្នន័យចុងក្រោយក្រៅពីបណ្តាលឱ្យ មនុស្សស្លាប់ជាច្រើននាក់ គ្រោះរញ្ជួយដី ក៏បានធ្វើឱ្យមនុស្សជាង ១៣ ០០០ នាក់ រត់ចោលផ្ទះសំបែង។ ពួកគេទាំងអស់នឹងត្រូវទៅស្នាក់នៅក្នុងជំរំជនភៀសខ្លួនចំនួន ១៤។ ក្រៅពីនេះ យ៉ាងហោចណាស់មានផ្ទះជាង ២ ២០០ ខ្នង ត្រូវបានបំផ្លិចបំផ្លាញ។
អាជ្ញាធរក្នុងតំបន់ស៊ីអានជូបានឱ្យដឹងថា ភ្លើងអគ្គិសនីត្រូវបានកាត់ផ្តាច់និងរំខានដល់ប្រតិបត្តការ សង្គ្រោះ ហើយការរអិលបាក់ដីក៏កំពុងរារាំងដល់ដំណើរការជម្លៀសប្រជាជនផងដែរ។
ក្រុមអ្នកជួយសង្គ្រោះ បានធ្វើការយ៉ាងដុតដៃដុតជើងពេញ ១ យប់ថ្ងៃចន្ទ ដើម្បីជួយសង្គ្រោះមនុស្សផ្សេងទៀតដែលអាចនៅជាប់នៅក្រោមអគារដែលដួលរលំ។
អភិបាលខេត្តជ្វាខាងលិចលោក រីដវ៉ាន់ កាមីល (Ridwan Kamil) បានឱ្យ ដឹងថា ចំនួនអ្នកស្លាប់ទំនងជានឹងកើនឡើងបន្ថែមទៀត។
ចំណែកអ្នករងរបួសជាច្រើននាក់ត្រូវទទួលការព្យាបាលនៅខាងក្រៅឯចំណតរថយន្តមន្ទីរពេទ្យបន្ទាប់ពីអគ្គិសនីនៅមន្ទីរពេទ្យដាច់អស់រយៈពេលជាច្រើនម៉ោង ក្រោយហេតុការណ៍រញ្ជួយដី។
យ៉ាងណាក៏ដោយ ទីភ្នាក់ងារកាត់បន្ថយគ្រោះមហន្តរាយរបស់ប្រទេសឥណ្ឌូនេស៊ី (BNBP) បាននិយាយថា គ្រោះរញ្ជួយដីដ៏ខ្លាំងក្នុងកម្រិត ៥,៦ រ៉ិចទ័រ មិនបង្កឱ្យ មានហានិភ័យនៃរលកយក្សស៊ូណាមិឡើយ។
គួរជ្រាបថា គ្រោះរញ្ជួយដីគឺជារឿងធម្មតាទៅហើយនៅក្នុងប្រទេសឥណ្ឌូនេស៊ី ដែលស្ថិតនៅលើតំបន់ក្រវាត់ភ្នំភ្លើង (Ring of Fire) ជុំវិញគែមនៃអាងប៉ាស៊ីហ្វិកដែលជាទីតាំងងាយរងគ្រោះពីគ្រោះរញ្ជួយដីនិងការផ្ទុះភ្នំភ្លើង។
ប្រទេសដែលមានប្រជាជនចំនួជាង ២៧០ លាននាក់នេះ មានប្រវត្តិធ្លាប់ត្រូវរងការបំផ្លិចបំផ្លាញដោយគ្រោះរញ្ជួយដី និងរលកយក្សស៊ូណាមិ។ ជាក់ស្តែង កាលពីឆ្នាំ ២០១៨ មនុស្សជាង ២ ០០០ នាក់បានស្លាប់ ដោយសារការរញ្ជួយដីនៅលើកោះស៊ុឡាវ៉េស៊ី (Sulawesi)៕
