លោក ហ្សេឡេនស្គី (កណ្ដាល) ថ្លែងទៅកាន់បណ្ដាញសារព័ត៌មាន ក្នុងទីក្រុង Bucha ភាគពាយព្យនៃរដ្ឋធានីកៀវ ប្រទេសអ៊ុយក្រែន កាលពីថ្ងៃទី ៤ ខែមេសា ឆ្នាំ ២០២២។ AFP
លោកប្រធានាធិបតីអ៊ុយក្រែន វ៉ូឡូឌីមៀរ ហ្សេឡេនស្គី បានបង្កើនការងារការទូត ជុំវិញការលុកលុយរបស់រុស្ស៊ីមកលើប្រទេសរបស់លោក ដោយបានពិភាក្សាជាមួយមេដឹកនាំអាមេរិក តួកគី និងបារាំង ស្របពេលការប្រយុទ្ធអូសបន្លាយនៅខ្សែត្រៀមជួរមុខនៃសង្គ្រាមរយៈពេល ៩ ខែ នៅភាគខាងកើត។
ខណៈលោក ហ្សេឡេនស្គី បាន ធ្វើការពិភាក្សាជាញឹកញាប់ជាមួយលោកប្រធានាធិបតីអាមេរិក ចូ បៃដិន ប្រធានាធិបតីបារាំង លោក អេម៉ានុយអែល ម៉ាក្រុង ប្រធានាធិបតីតួកគីលោក រ៉េសិប តៃយីប អេរដូហ្គែន ចាប់តាំងពីកងកម្លាំងរុស្ស៊ី បានលុកលុយនៅចុងខែកុម្ភៈ វាជារឿងធម្មតាសម្រាប់លោកធ្វើការពិភាក្សាបែបនេះរយៈពេលជាង ១ ថ្ងៃ។
លោក ហ្សេឡេនស្គី បាននិយាយក្នុងសន្ទរកថាតាមវីដេអូយ៉ាងវែងរបស់លោកថា៖ «យើងធ្វើការជាប្រចាំជាមួយដៃគូ»។ ដោយលោកបន្ថែមថា លោករំពឹងថាលទ្ធផលសំខាន់ៗខ្លះ ក្នុងសប្តាហ៍ខាងមុខនេះពីព្រឹត្តិការណ៍អន្តរជាតិជាបន្តបន្ទាប់ដែលនឹងផ្តោតទៅលើស្ថានភាព នៅអ៊ុយក្រែន។
លោកអធិការបតីអាល្លឺម៉ង់ អូឡាហ្វ សូល គ្រោងកោះប្រជុំតាមអនឡាញជាមួយមេដឹកនាំ G7 និងរដ្ឋមន្ត្រីការបរទេសសហភាពអឺរ៉ុប នៅថ្ងៃចន្ទ ដើម្បីព្យាយាម និងឯកភាពគ្នាបន្ថែមទៀតអំពីទណ្ឌកម្មទៅលើប្រទេសរុស្ស៊ី និងជំនួយបន្ថែម ឬការដឹកជញ្ជូនអាវុធទៅអ៊ុយក្រែន។
ការវាយប្រហារមីស៊ីល និង្រដូនជាបន្តបន្ទាប់របស់រុស្ស៊ី បានបំផ្លាញភាគច្រើននៃរចនាសម្ព័ន្ធថាមពលរបស់ប្រទេសនេះ ដោយបានបណ្តាលឱ្យជនស៊ីវិលរាប់លាននាក់គ្មានអគ្គិសនី និងកម្តៅ នៅពេលសីតុណ្ហភាពចុះនៅត្រឹមសូន្យ ឬក្រោមសូន្យ។
លោក ហ្សេឡេនស្គី បានថ្លែងអរគុណលោក បៃដិន ចំពោះជំនួយហិរញ្ញវត្ថុ និងការពារមិនធ្លាប់មានពីមុន ដែលសហរដ្ឋអាមេរិក បានផ្តល់ឱ្យ និងនិយាយអំពីតម្រូវការរបស់អ៊ុយក្រែននូវប្រព័ន្ធការពារប្រឆាំងយន្តហោះចម្បាំង ដើម្បីការពារប្រជាជនរបស់ខ្លួន។
លោកបានបន្តថា៖ «យើងក៏អបអរសាទរចំពោះជំនួយដែលអាមេរិក កំពុងផ្តល់ឱ្យអ៊ុយក្រែន ដើម្បីស្តារប្រព័ន្ធថាមពលរបស់អ៊ុយក្រែន»។
លោកថ្លែងទៀតថា អ៊ុយក្រែននឹងចូលរួមជំនួប G7 ហើយថា អនុវត្តតាមការអំពាវនាវ ដែលទីក្រុងកៀវ បានរៀបចំទីតាំងឈរជើងរបស់យើងជាមួយអាមេរិក។
ក្រោយមក ក្នុងសេចក្តីថ្លែងការណ៍មួយ សេតវិមាន បានឱ្យដឹងថា លោក បៃដិន បានបញ្ជាក់ថា អាមេរិកកំពុងប្រឹងប្រែង ដើម្បីជំរុញការការពារដែនអាកាសរបស់អ៊ុយក្រែនជាអាទិភាព។
វិបត្តិថាមពលក៏បានបង្កើតផ្នែកដ៏សំខាន់មួយនៃកិច្ចពិភាក្សាដំបូងរបស់លោក ហ្សេឡេនស្គី ជាមួយលោក ម៉ាក្រុង និងលោក អេរដូហ្គែន។ លោក ហ្សេឡេនស្គី បានពិពណ៌នាការសន្ទនាជាង ១ ម៉ោងជាមួយលោក ម៉ាក្រុងថា «ពិតជាមានន័យណាស់» និងបានបញ្ចូល «ការការពារថាមពលសេដ្ឋកិច្ច និងការទូត»។
ស្របពេលជាមួយគ្នានោះ លោកក៏បានអរគុណតួកគី ចំពោះការផ្តល់ជម្រកដល់ក្មេងៗអ៊ុយក្រែន និងដាក់ពង្រាយម៉ាស៊ីនភ្លើងជាច្រើនគ្រឿង ទៅកាន់ទីក្រុងនានា នៅទូទាំងប្រទេសនេះ។ ប្រធានាធិបតីអ៊ុយក្រែនរូបនេះ ក៏បាននិយាយថា លោក និងលោក អេរដូហ្គែន បានពិភាក្សាអំពីលទ្ធភាពបន្តកិច្ចព្រមព្រៀងនាំចេញគ្រាប់ធញ្ញជាតិ ដែលបើកកំពង់ផែនានារបស់អ៊ុយក្រែន សម្រាប់ការនាំចេញ នៅក្នុងខែកក្កដា ក្រោយពីការបិទរបស់រុស្ស៊ីអស់រយៈពេល ៦ ខែ។
តួកគី ដែលដើរតួនាទីជាអ្នកសម្របសម្រួលក្នុងការចរចាសន្តិភាព នៅក្នុងសង្គ្រាមប៉ុន្មានខែដំបូង បានធ្វើការជាមួយអង្គការសហប្រជាជាតិទៅលើកិច្ចព្រមព្រៀងនោះ។ ការិយាល័យរបស់លោក អេរដូហ្គែន បាននិយាយថា មេដឹកនាំតួកគីរូបនេះ ក៏បាននិយាយទៅកាន់ប្រធានាធិបតីរុស្ស៊ី លោក វ្ល៉ាឌីមៀរ ពូទីន កាលពីថ្ងៃអាទិត្យ និងបានអំពាវនាវឱ្យបញ្ចប់ជម្លោះនេះឱ្យបានឆាប់។
កាលពីសប្តាហ៍មុន លោក ពូទីន បានព្រមានអំពីសង្គ្រាមអូសបន្លាយ ដោយបាននិយាយទៅដល់ការបាត់ជំនឿទុកចិត្តស្ទើរតែទាំងស្រុងរបស់ទីក្រុងម៉ូស្គូទៅលើបណ្តាប្រទេសលោកខាងលិច ដែលលោកបាននិយាយថា នឹងបង្កើតដំណោះស្រាយជាចុងក្រោយជុំវិញជម្លោះអ៊ុយក្រែន ដែលពិបាកឈានដល់។
លោក ម៉ាក្រុង បានគាំទ្រដល់ការទូត ក្នុងជម្លោះនេះ ប៉ុន្តែធ្វើឱ្យទីក្រុងកៀវព្រួយបារម្ភ សម្ព័ន្ធមិត្តខ្លះ និងបណ្តាប្រទេសបាល់ទិកជាមួយអ្វី ដែលមើលឃើញថា ជាសាររួម គឺថា វាស្រេចទៅលើទីក្រុងកៀវសម្រេចថា តើពេលណាធ្វើការចរចាជាមួយទីក្រុងម៉ូស្គូ ហើយការធានាសន្តិសុខ គឺចាំបាច់ណាស់សម្រាប់ប្រទេសរុស្ស៊ី។
រដ្ឋមន្ត្រីការបរទេសសហភាពអឺរ៉ុប (EU) នឹងពិភាក្សាអំពីកញ្ចប់ទណ្ឌកម្មទី ៩ ដែលអាចបន្ថែមបុគ្គលជិត ២០០ នាក់ និងអង្គភាពជាច្រើន ទៅក្នុងបញ្ជីទណ្ឌកម្មរបស់ EU រួមជាមួយប្រាក់ ២ ប៊ីលានអឺរ៉ូ (២,១១ ប៊ីលានដុល្លារ) សម្រាប់ការបញ្ជូនអាវុធទៅឱ្យអ៊ុយក្រែន៕
វីដេអូ៖
