លោកប្រធានាធិបតី វ្ល៉ាឌីមៀរ ពូទីន ធ្វើកាយវិការ ខណៈលោកចូលរួមសន្និសីទកាសែត បន្ទាប់ពីជំនួបនៃក្រុមប្រឹក្សារដ្ឋកាលពីថ្ងៃទី ២២ ធ្នូ។ AFP
កងកម្លាំងរុស្ស៊ី បានធ្វើការវាយប្រហារដូចគេស្រោចគ្រាប់លើទីក្រុងផ្សេងៗរបស់អ៊ុយក្រែនចំថ្ងៃបុណ្យណូអែល (២៥ ធ្នូ) ខណៈប្រធានាធិបតីរុស្ស៊ីលោក វ្ល៉ាឌីមៀរ ពូទីន បានអះអាងពីការបើកចំហចំពោះការចរចារបស់វិមានក្រឹមឡាំង ដែលជាជំហរអ៊ុយក្រែន និងអាមេរិកច្រានចោល ដោយសារសកម្មភាពវាយប្រហារមិនឈប់របស់រុស្ស៊ី។
មេបញ្ជាការយោធាកំពូលអ៊ុយក្រែនអះអាងនៅថ្ងៃអាទិត្យថា កងទ័ពឈ្លានពានរុស្ស៊ីបានបើកការវាយប្រហារដោយគ្រាប់រ៉ុក្កែតជាង ១០ លើកនៅស្រុក Kupiansk ក្នុងតំបន់ខាកៀវបាញ់ផ្លោងលើទីក្រុងចំនួន ២៥ តាមបណ្ដោយសមរភូមិជួរមុខ តាំងពីក្រុង Kupiansk រហូតដល់ក្រុងលីម៉ង់នៃតំបន់លូហានស្ក៍ ស្របពេលដែលក្រុងចំនួន ២០ នៅតំបន់ហ្សាប៉ូរីចាក៏រងការវាយប្រហារដូចគ្នា។ យ៉ាងណាមិញ យោធាអ៊ុយក្រែនមិនបានបញ្ជាក់លម្អិតពីការខូចខាត ឬជនរងគ្រោះនោះទេ។ នេះបើតាម ការចុះផ្សាយរបស់ទីភ្នាក់ងារសារព័ត៌មានរ៉យទ័រ។
ការវាយប្រហារនេះធ្វើឡើងបន្តបន្ទាប់គ្នាពីល្ងាចមុនថ្ងៃបុណ្យណូអែល (Christmas Eve) ដែលសម្លាប់ជនស៊ីវិលយ៉ាងហោចណាស់ ១០ នាក់ និងរបួសជិត ៧០ នាក់នៅទីក្រុងឃឺរសុន ខណៈពិភពលោកត្រៀមរៀបចំប្រារព្ធពិធីបុណ្យណូអែល។
ទោះបីជាយ៉ាងណាក៏ដោយ រុស្ស៊ីនៅតែបដិសេធលើការដាក់គោលដៅលើជនស៊ីវិល។ ចំណែកឯក្រសួង ការពារជាតិរុស្ស៊ីវិញ ថ្លែងនៅថ្ងៃអាទិត្យថា ខ្លួនបានសម្លាប់ទាហានអ៊ុយក្រែនប្រហែល ៦០ នាក់នៅថ្ងៃសៅរ៍ពីក្រុង Kupiansk ដល់ក្រុង Lyman ហើយបានបំផ្លាញបំណែកសម្ភារយោធាអ៊ុយក្រែនអស់ជាច្រើនផ្សេងទៀត។
គួរបញ្ជាក់ថា ការឈ្លានពានរបស់រុស្ស៊ីលើអ៊ុយក្រែន បានអូសបន្លាយអស់រយៈពេលជាង ១០ ខែមកហើយ ប៉ុន្តែហាក់មិនមានសញ្ញានៃការបញ្ចប់នោះទេ ទោះបីជាលោក ពូទីន អះអាងពីជំហរលើការចរចាក្ដី។
ប្រធានាធិបតីរុស្ស៊ីរូបនេះ ប្រាប់ទូរទស្សន៍រដ្ឋ Rossiya 1 ក្នុងបទសម្ភាសន៍មួយដែលចាក់ផ្សាយកាលពីថ្ងៃអាទិត្យថា៖ «យើងត្រៀមខ្លួនរួចរាល់ហើយ ក្នុងការចរចាជាមួយគ្រប់គ្នាដែលពាក់ព័ន្ធអំពីដំណោះស្រាយដែលអាចទទួលយកបាន ប៉ុន្តែនោះអាស្រ័យលើពួកគេ។ យើងមិនមែនជាអ្នកបដិសេធក្នុងការចរចានោះទេ»។
ឆ្លើយតបទៅនឹងការលើកឡើងនេះ ទីប្រឹក្សាប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី គឺលោក MykhailoPodolyak បានលើកឡើងថា លោក ពូទីន ចាំបាច់ត្រូវត្រឡប់ទៅរកការពិត ហើយទទួលស្គាល់ថា រុស្ស៊ីទេដែលមិនចង់ឱ្យមានការចរចា។
លោកសរសេរនៅលើបណ្ដាញសង្គមធ្វីធើរថា៖ «រុស្ស៊ីបានវាយប្រហារអ៊ុយក្រែនដោយខ្លួនឯង ហើយកំពុងសម្លាប់ពលរដ្ឋ។ រុស្ស៊ីមិនចង់ចរចានោះទេ ប៉ុន្តែព្យាយាមគេចពីការទទួលខុសត្រូវ»។
កន្លងមក អ៊ុយក្រែនក៏បានអះអាងពីការចរចា ហើយថាខ្លួនមិនឈប់ប្រយុទ្ធនោះទេលុះត្រាតែសម្រេចទៅតាមការចង់បានរបស់ខ្លួន ដែលទាមទារឱ្យរុស្ស៊ីដកកងទ័ពទាំងអស់ចេញពីទឹកដីអ៊ុយក្រែន។ ការវាយប្រហារនៅថ្ងៃបុណ្យណូអែល ធ្វើឡើងខណៈដែលការវាយប្រហាររបស់រុស្ស៊ីកន្លងមកលើហេដ្ឋារចនាសម្ព័ន្ធស៊ីវិល រួមមានថាមពល បន្តធ្វើឱ្យប្រជាជនអ៊ុយក្រែនរាប់លាននាក់គ្មានភ្លើងអគ្គិសនីប្រើប្រាស់។
តាមធម្មតា ប្រជាជនអ៊ុយក្រែនដែលភាគច្រើនកាន់សាសនាគ្រិស្តអូស្សូដក់មិនប្រារព្ធបុណ្យណូអែលនៅថ្ងៃទី ២៥ ខែធ្នូ ទេដោយប្រារព្ធថ្ងៃទី ៧ មករា ដូចគ្នានឹងរុស្ស៊ីដែរ។ យ៉ាងណាមិញ ក៏មានអ្នកកាន់គ្រិស្តសាសនាអ៊ុយក្រែនមួយចំនួន បានសម្រេចចិត្តប្រារព្ធពិធីបុណ្យនេះកាលពីថ្ងៃអាទិត្យ ជាមួយគ្នានឹងការជូនពរផ្សេងៗពីមន្ត្រីកំពូលៗអ៊ុយក្រែនរួមទាំងលោក ហ្សេឡេនស្គី៕
វីដេអូ៖
