ប្រជាជនបារាំងជាង ១ លានាក់ ចេញមុខតវ៉ាលើកំណែទម្រង់ដំឡើងអាយុចូលនិវត្តន៍របស់រដ្ឋាភិបាល កាលពីម្សិលមិញ។ រូបថត AFP
ប្រជាជនបារាំងជាង ១ លាននាក់ កាលពីថ្ងៃព្រហស្បតិ៍ បានធ្វើបាតុកម្មនៅទូទាំងប្រទេស ដើម្បីប្រឆាំងនឹងរដ្ឋាភិបាលបារាំង ដែលបានធ្វើកំណែទម្រង់លើអាយុចូលនិវត្តន៍ ដោយដំឡើងអាយុចូលនិវត្តន៍ពី ៦២ ដល់ ៦៤ ឆ្នាំវិញ។
ការតវ៉ានេះមានការចូលរួមពីប្រជាជនជាង ១ លាននាក់ដែលមកពីសហជីព និងបុគ្គលិកក្នុងវិស័យការងារសំខាន់ៗជាច្រើន បាននាំគ្នាចូលរួមតវ៉ាតាមដងផ្លូវដែលបង្កឱ្យមានការប៉ះពាល់ដល់សេវកម្ម រថភ្លើង យន្តហោះ សាលារៀន និងអាជីវកម្មក្នុងប្រទេស។ ក្នុងនោះគេប្រទះឃើញមានក្រុមតូចៗខ្លះ បានគប់ដុំថ្មនិងដុំភ្លើងចូលស្ថានីយប៉ូលិស និងកន្លែងទេសចរណ៍ដ៏ល្បីល្បាញ Eiffel Tower ត្រូវបានបិទជាបណ្តោះអាសន្ន។
កំណែទម្រង់ថ្មីរបស់រដ្ឋាភិបាលបារាំង លោកប្រធានាធិបតី ម៉ាក្រុង គឺការដំឡើងអាយុចូលនិវត្តន៍ដែលនឹងចាប់ផ្តើមអនុវត្តន៍ចាប់ពីឆ្នាំ ២០៣០ ទៅ ដោយតម្រូវឱ្យធ្វើការបន្ថែម២ឆ្នាំទៀតមុននឹងចូលនិវត្តន៍។
យោងតាមក្រសួងអប់រំប្រទេសបារាំងបានឱ្យដឹងថា ៤០ % នៃគ្រូបង្រៀននៅសាលាបឋមសិក្សា និងវិទ្យាល័យបានចូលរួមធ្វើកូដកម្ម។ ខ្សែរថភ្លើងទូទាំងប្រទេសបារាំង និងខ្សែរថភ្លើងក្រោមដីនៅទីក្រុងប៉ារីស ត្រូវបានវាយប្រហារយ៉ាងធ្ងន់ធ្ងរ និងតម្រូវឱ្យបិទទាំងស្រុងនៅតាមស្ថានីយនីមួយៗ។ ទន្ទឹមនឹងនេះដែរ ស្ថានីយហោះហើរ Eurostar បានលុបចោលរាល់សេវាកម្មធ្វើដំណើរជាច្រើនពីទីក្រុងប៉ារីសទៅកាន់ទីក្រុងឡុដ៍ ដោយសារយន្តហោះមួយចំនួនត្រូវបានវាយកម្ទេចពីសំណាក់អ្នកបាតុកម្ម។ មិនត្រឹមតែប៉ុណ្ណោះ អាកាសយានដ្ឋាន Charles de Gaulle បានរាយការណ៍មកថា ជើងហោះហើរមួយចំនួននឹងត្រូវពន្យារពេលដោយសារតែមានកូដកម្មទៅលើអ្នកត្រួតពិនិត្យចរាចរណ៍ផ្លូវអាកាស និងកម្មករភាគច្រើននៅរោងចក្រប្រេង Totalenergies លាឈប់ពីកន្លែងការងារដែលធ្វើឱ្យរាំងស្ទះដល់ការដឹកជញ្ជូនប្រេង។
កំណែទម្រង់ប្រាក់សោធននិវត្តន៍ដែលបានស្នើឡើងក្រោមលោក ម៉ាក្រុងនេះ កើតឡើងនៅពេលដែលប្រជាជនកំពុងជួបប្រទះនូវកំណើនថ្លៃម្ហូបអាហារ ថាមពល ប្រាក់ខែ និងលក្ខខណ្ឌនៃការងារ។
ក្នុងជំនួបរវាងសារព័ត៌មានអេស្ប៉ាញ និងលោកម៉ាក្រុង បានឱ្យដឹងថា ការចាប់ផ្តើមច្បាប់ថ្មីនេះក្នុងគោលបំណងបង្កើតសិទ្ធិស្មើគ្នាសម្រាប់មនុស្សគ្រប់ជំនាន់ដោយ ៤០% នៃកម្មករបារាំងនឹងអាចទទួលបានប្រាក់បៀវត្សរ៍ មុនអាយុ ៦៤ឆ្នាំ សម្រាប់អ្នកដែលចាប់ផ្តើមចូលធ្វើការមុន។
គួររំឭកផងដែរថា ការកែប្រែប្រាក់សោធននិវត្តន៍គឺជាបញ្ហាដ៏ធំមួយដែលកើតមានជាយូរណាស់មកហើយនៅក្នុងប្រទេសបារាំង ជាមួយនឹងការតវ៉ាតាមដងផ្លូវដែលបានបញ្ឈប់កិច្ចខិតខំប្រឹងប្រែងកំណែទម្រង់ក្នុងឆ្នាំ ១៩៩៥ ហើយរដ្ឋាភិបាលជាបន្តបន្ទាប់ប្រឈមមុខនឹងការតស៊ូយ៉ាងតឹងរ៉ឹងចំពោះការផ្លាស់ប្តូរដែលទីបំផុតបានអនុម័តក្នុងឆ្នាំ ២០០៤ ២០០៨និង ២០១០។
លោក ម៉ាក្រុង ក៏ធ្លាប់មានគម្រោងធ្វើកំណែទម្រង់ប្រព័ន្ធសោធននិវត្តន៍របស់ប្រទេសបារាំងកាលពីឆ្នាំ ២០១៩ ផងដែរ ប៉ុន្តែត្រូវបានលុបចោលដោយសារជំងឺមេរោគរាតត្បាតកូវីដ១៩ បានកើតឡើង។
គួរបញ្ជាក់ឱ្យដឹងផងដែរថា នៅទ្វីបអឺរ៉ុប និងក្នុងប្រទេសអភិវឌ្ឍន៍ជាច្រើនផ្សេងទៀត អាយុដែលប្រាក់សោធននិវត្តន៍ទទួលបានអត្ថប្រយោជន៍ពេញលេញគឺ ៦៥ឆ្នាំ និងកំពុងផ្លាស់ប្តូរកាន់តែខ្លាំងឡើងទៅកាន់អាយុ ៦៧ ឆ្នាំ។ ជាមួយគ្នានេះដែរ សហជីពបារាំង គ្រោងនឹងជួបគ្នានៅល្ងាចថ្ងៃព្រហស្បតិ៍ ដើម្បីសម្រេចថាតើគួរបន្តសកម្មភាពកូដកម្មឬអត់៕
