អ្នកស្រុកដើរកាត់គំនរបាក់បែកក្នុងចំណោមអគារបាក់រលំ បន្ទាប់ពីការរញ្ជួយដីក្នុងក្រុង Jandarisal។ AFP
ប្រព័ន្ធផ្សព្វផ្សាយរដ្ឋបាននិយាយថា មនុស្សយ៉ាងតិច ៥៣ នាក់បានស្លាប់នៅក្នុងផ្នែកដែលគ្រប់គ្រងដោយរដ្ឋាភិបាលនៃប្រទេសស៊ីរី ខណៈដែលអគារជាច្រើនបានដួលរលំបន្ទាប់ពីការរញ្ជួយដីកម្រិត ៧,៨ រុិចទ័រ។
ទីភ្នាក់ងារសារព័ត៌មានរដ្ឋ SANA បាននិយាយដោយដកស្រង់សម្តីមន្ត្រីក្រសួងសុខាភិបាលថា៖ «អ្នកស្លាប់ចំនួន ៥៣ នាក់ និងរបួសជាង ២០០ នាក់ ត្រូវបានរាយការណ៍នៅក្នុងទីក្រុងអាឡិបប៉ូហាម៉ា និង Latakia។
ទីភ្នាក់ងារវាស់ស្ទង់ភូមិសាស្ត្រអាមេរិក (USGS) បាននិយាយថា គ្រោះរញ្ជួយដីកម្លាំង ៧,៨ រ៉ិចទ័រ បានវាយប្រហារភាគអាគ្នេយ៍នៃប្រទេសតួកគី កាលពីថ្ងៃចន្ទ។
ទីភ្នាក់ងារអាមេរិកនេះ បាននិយាយថា គ្រោះរញ្ជួយដីនេះ បានកើតឡើងនៅម៉ោង ០៤:១៧ នាទីព្រឹក ម៉ោងក្នុងស្រុក (០១១៧ ម៉ោងសកល) នៅជម្រៅប្រហែល ១៧,៩ គីឡូម៉ែត្រ ជាមួយនឹងការរញ្ជួយដីកម្លាំង ៦,៧ រ៉ិចទ័រ បានកើតឡើង ១៥ នាទីក្រោយមក។
មជ្ឈមណ្ឌលសេវាកម្មសង្គ្រោះបន្ទាន់ AFAD របស់ប្រទេសតួកគី បានដាក់កម្រិតរញ្ជួយដីលើកដំបូងនៅកម្លាំង ៧,៤ រុិចទ័រ។
មន្ត្រីតួកគី បានរាយការណ៍ថាមិនមានតួលេខអ្នកស្លាប់ភ្លាមៗនោះទេ ប៉ុន្តែរូបភាពដំបូងបានបង្ហាញពីអគារបាក់បែក និងភ្លើងឆេះនៅ តាមទីក្រុងជាច្រើន។
រូបភាពនៅលើទូរទស្សន៍តួកគី និងប្រព័ន្ធផ្សព្វផ្សាយសង្គមបានបង្ហាញពីក្រុមអ្នកជួយសង្គ្រោះកំពុងជីកកកាយតាមគំនរបាក់បែកនៃអគារនៅក្នុងទីក្រុង Kahramanmaras និង Gaziantep ដែលនៅជិតខាង។
ប្រធានាធិបតីតួកី លោក រ៉េសិបតៃយីប អេរដូហ្គែន បានសរសេរនៅលើធ្វីធើរថា៖ «ខ្ញុំសូមជូនពរយ៉ាងជ្រាលជ្រៅដល់ប្រជាពលរដ្ឋរបស់យើងទាំងអស់ដែលបានរងគ្រោះដោយការរញ្ជួយដី ឱ្យទទួលបាននូវសុវត្ថិភាពគ្រប់ៗគ្នា៕
