សាច់ញាតិជនរងគ្រោះឈរក្បែរគំនរបាក់បែកនៃអគារបាក់រលំ នៅភាគអាគ្នេយ៍នៃទីក្រុង Kahraman maras ប្រទេសតួកគី កាលពីថ្ងៃទី៨ ខែកុម្ភៈ ឆ្នាំ២០២៣។ AFP
លោកប្រធានាធិបតីរ៉េសិបតៃយីប អេរដូហ្គែន កាលពីថ្ងៃពុធ បានសារភាពថា មានចំណុចខ្វះខាត ក្រោយពីមានការរិះគន់ចំពោះការឆ្លើយតបរបស់រដ្ឋាភិបាលទៅនឹងរញ្ជួយដីដ៏ខ្លាំងក្លា ដែលបានបណ្តាលឱ្យមនុស្សជាង ១៥ ០០០ នាក់ស្លាប់នៅក្នុងប្រទេសតួកគី និងស៊ីរី។
គ្រោះមហន្តរាយដែលបានបំផ្លិចបំផ្លាញអគាររាប់ពាន់ខ្នង និងចំនួនមនុស្សជាប់នៅក្នុងគំនរបានបាក់បែកមិនត្រូវបានដឹង បានធ្វើឱ្យប្រតិបត្តិការជួយសង្គ្រោះជាប់គាំង ដោយអាកាសធាតុត្រជាក់ខ្លាំងពេក ។
អ្នកនៅរស់រានមានជីវិត ត្រូវស្វះ ស្វែងរកអាហារ និងទីជម្រក ហើយក្នុងករណីខ្លះមើលដោយមិនអស់សង្ឃឹម នៅពេលដែលសាច់ញាតិរបស់ពួកគេអំពាវនាវឱ្យជួយសង្រ្គោះ ហើយនៅទីបំផុតបានស្ងប់ស្ងាត់នៅក្រោមកម្ទេចកម្ទីថ្មអគារ។
Semire Coban ជាគ្រូបង្រៀនថ្នាក់មត្តេយ្យនៅទីក្រុងHatayនៃប្រទេសតួកគី បាននិយាយថា ៖«ក្មួយប្រុសរបស់ខ្ញុំ ប្អូនថ្លៃរបស់ខ្ញុំ និងប្អូនស្រីបង្កើតរបស់ខ្ញុំគឺស្ថិតនៅក្នុងគំនរបាក់បែក»។
អ្នកស្រី បាននិយាយថា៖«យើងមិនអាចទៅជួយពួកគេបាន។ យើងព្យាយាមនិយាយទៅកាន់ពួកគេ ប៉ុន្តែពួកគេមិនបានឆ្លើយតបមកវិញទេ... យើងកំពុងរង់ចាំជំនួយ។ ឥឡូវនេះ វាមានរយៈពេល ៤៨ម៉ោង»។
"
ទោះបីជាយ៉ាងណាក៏ដោយ ក្រុមអ្នករុករក បានបន្តទាញអ្នកនៅរស់រានមានជីវិតចេញពីកម្ទេចកម្ទី ៣ថ្ងៃ ហើយ ក្រោយពី រញ្ជួយដីកម្រិត ៧,៨ រ៉ិចទ័រ ដែលបានបណ្តាលឱ្យមនុស្សស្លាប់ច្រើនបំផុតក្នុងសតវត្សរ៍នេះ ខណៈដែលចំនួនអ្នកស្លាប់ នៅតែបន្តកើនឡើងតទៅទៀតនោះ។
ខណៈដែលការរិះគន់បានកើនឡើងនៅតាមអនឡាញ លោកអេរដូហ្គែន បានចុះទៅមើលកន្លែង១ក្នុងចំណោមកន្លែងដែលរងការប៉ះពាល់ខ្លាំងបំផុត គឺចំណុចកណ្តាលនៃរញ្ជួយដីក្នុងទីក្រុង Kahramanmaras បានទទួលស្គាល់បញ្ហានានាក្នុងការឆ្លើយតប។
លោកបាននិយាយថា៖ «ជាការពិតណាស់ មានចំណុចខ្វះខាតជាច្រើន។ លក្ខខណ្ឌ គឺអាចមើលឃើញយ៉ាងច្បាស់ ប៉ុន្តែយើងមិនអាចត្រៀមខ្លួនសម្រាប់គ្រោះមហន្តរាយបែបនេះបានទេ» ។
Twitter ក៏មិនដំណើរការលើបណ្តាញទូរស័ព្ទតួកគីដែរ។ នេះបើយោងតាមអ្នកកាសែត AFP និងក្រុមឃ្លាំមើលបណ្តាញ NetBlocks។
ឱកាសសម្រាប់ក្រុមជួយសង្គ្រោះក្នុងការស្វែងរកអ្នកនៅរស់ កាន់តែរួមតូច ខណៈដែលកិច្ចខិតខំប្រឹងប្រែងខិតជិតដល់ ៧២ ម៉ោង ដែលអ្នកជំនាញគ្រោះមហន្តរាយចាត់ទុកថាជារយៈពេលច្រើន បំផុតក្នុងការជួយសង្គ្រោះជីវិតមនុស្ស។
ប៉ុន្តែកាលពីថ្ងៃពុធ ក្រុមជួយសង្គ្រោះ បានទាញក្មេងៗចេញពីក្រោមអគារ ដែលដួលរលំនៅក្នុងខេត្ត Hatay នៃប្រទេសតួកគី។
ចំណែកមន្ត្រី និងក្រុមគ្រូពេទ្យ បាននិយាយថា មនុស្ស ១២ ៣៩១ នាក់ បានស្លាប់នៅក្នុងប្រទេសតួកគី និងមនុស្សយ៉ាងតិច ២ ៩៩២នាក់ស្លាប់ នៅ ប្រទេសស៊ីរីពីការរញ្ជួយដីកម្រិត៧,៨ រិុចទ័រកាលពីថ្ងៃចន្ទ ដែលនាំឱ្យចំនួនសរុបកើនឡើងដល់ ១៥ ៣៨៣នាក់ ហើយអ្នកជំនាញបារម្ភថាចំនួននេះនឹងបន្តកើនឡើងថែមទៀត ។
ការរញ្ជួយដីកាលពីថ្ងៃចន្ទ គឺជារញ្ជួយដីដ៏ធំបំផុត នៅក្នុងប្រទេសតួកគី ចាប់តាំងពីឆ្នាំ ១៩៣៩ ដែលបានបណ្តាលឱ្យមនុស្ស ៣៣ ០០០ នាក់ស្លាប់ នៅក្នុងខេត្ត Erzincan ភាគខាងកើត។
នៅឆ្នាំ ១៩៩៩ រញ្ជួយដីកម្រិត ៧,៤ រ៉ិចទ័រ បានបណ្តាលឱ្យ ជាង១៧០០០នាក់ស្លាប់៕
វីដេអូ៖
