Ovidio Guzman ត្រូវបានចាប់ខ្លួននៅជិតទីក្រុង Culiacan។ Twitter
អ្នកនាំពាក្យរដ្ឋាភិបាលម៉ិកស៊ិក បាននិយាយថា អាមេរិកបានស្នើឱ្យម៉ិកស៊ិកធ្វើបត្យាប័នកូនប្រុសដ៏មានឥទ្ធិពលរបស់មេជួញដូរគ្រឿងញៀន Joaquin Guzman ដែលត្រូវបានគេស្គាល់ថាជា El Chapo ដែលត្រូវបានចោទប្រកាន់ពីបទឧក្រិដ្ឋកម្មគ្រឿងញៀន។
Ovidio Guzman ដែលត្រូវបានចាប់ខ្លួនកាលពីខែមករា ត្រូវបានគេចោទប្រកាន់ថា បានជួយគ្រប់គ្រងក្រុមឧក្រិដ្ឋជននៅរដ្ឋ Sinaloa ចាប់តាំងពីឪពុករបស់គេ ត្រូវបានប្រគល់ឱ្យអាជ្ញាធរនៅអាមេរិកក្នុងឆ្នាំ ២០១៧។
អ្នកនាំពាក្យរូបនេះ បានប្រាប់ទីភ្នាក់ងារព័ត៌មាន AFP ថា ស្ថានទូតអាមេរិកនៅទីក្រុងម៉ិកស៊ីកូ បានបង្ហាញសំណើធ្វើបត្យាប័នទៅក្រសួងការបរទេស និងការិយាល័យអគ្គមេធាវី។ លោកសុំមិនបញ្ចេញឈ្មោះព្រោះលោកមិនមានសិទ្ធិនិយាយអំពីបញ្ហានេះ។
ប្រភព២របស់រដ្ឋាភិបាលម៉ិកស៊ិកដែលសុំមិនបញ្ចេញឈ្មោះ ក៏បានបញ្ជាក់ពីសំណើធ្វើបត្យាប័នសម្រាប់ Ovidio Guzman អាយុ៣២ឆ្នាំ ទៅកាន់ទីភ្នាក់ងារព័ត៌មានReuters។
Guzman ត្រូវបានចាប់ខ្លួននៅជិតទីក្រុង Culiacan ភាគខាងជើងរដ្ឋ Sinaloa បង្កឱ្យមានរលកនៃអំពើហិ ង្សាដែលបណ្តាលឱ្យមនុស្សរាប់សិបនាក់ ស្លាប់។
El Chapo ដែលផ្អែកលើចក្រភពរត់ពន្ធរបស់គាត់ចេញពីរដ្ឋSinaloa កំពុងជាប់ទោស១ជីវិតនៅអាមេរិកពីបទជួញដូរគ្រឿងញៀនក្នុងរយៈពេល២៥ឆ្នាំ។
Ovidio Guzman បានទទួលដីការបស់តុលាការកាលពីខែមករា ដោយរារាំងការធ្វើបត្យាប័នភ្លាមៗរបស់គាត់ទៅកាន់ អាមេរិក ហើយចៅក្រមបានផ្តល់ឱ្យ អាមេរិករហូតដល់ថ្ងៃទី៥ ខែមីនា ដើម្បីដាក់សំណើធ្វើបត្យាប័ន។
Guzman ត្រូវបានគេចោទប្រកាន់ថា បានជួយត្រួតពិនិត្យមន្ទីរពិសោធន៍ថ្នាំមេតំហ្វេតាមីនជាង១០ កន្លែងនៅក្នុង Sinaloa រួមជាមួយការសមគំនិតក្នុងការចែកចាយកូកាអ៊ីន និងកញ្ឆា។ នេះបើយោងតាមអាជ្ញាធរអាមេរិក។
Guzman ក៏ត្រូវបានបញ្ជាឱ្យធ្វើឃាតអ្នកផ្តល់ព័ត៌មាន អ្នកជួញដូរថ្នាំញៀន និងតារាចម្រៀងម៉ិកស៊ិកម្នាក់ដែលបដិសេធមិនចូលរួមក្នុងពិធីមង្គលការរបស់គេ។
Guzman ធ្លាប់ត្រូវបានចាប់ខ្លួននៅក្នុង ឆ្នាំ ២០១៩ ប៉ុន្តែកងសន្តិសុខ បានដោះលែងរូបគេវិញ បន្ទាប់ពីក្រុមជួញដូររបស់គេ បានធ្វើសង្គ្រាមពេញទំហឹង ក្នុងការឆ្លើយតប៕
