មេដឹកនាំកូរ៉េខាងជើងលោក គីម ជុងអ៊ុន ចូលរួមក្នុងកិច្ចប្រជុំពេញអង្គលើកទី៧ នៃគណៈកម្មាធិការមជ្ឈិមបក្សពលករកូរ៉េ (WPK)នៅទីក្រុងព្យុងយ៉ាង កាលពីថ្ងៃទី២ ខែមីនា ឆ្នាំ២០២៣។ AFP
ទីភ្នាក់ងារព័ត៌មានរដ្ឋកូរ៉េខាងជើង KCNA រាយការណ៍នៅថ្ងៃអង្គារ ទី ៧ ខែមីនានេះថា ក្រុងព្យុងយ៉ាង បានព្រមានថា សកម្មភាពបាញ់ទម្លាក់មីស៊ីលសាកល្បងរបស់កូរ៉េខាងជើង នឹងត្រូវចាត់ទុកថាជាការប្រកាសសង្រ្គាមជាមួយប្រទេសនេះ ហើយថា សមយុទ្ធយោធារួមគ្នារវាងសហរដ្ឋអាមេរិក និងកូរ៉េខាងត្បូងគឺជាមូលហេតុដែលធ្វើឱ្យភាពតានតឹងកាន់តែយ៉ាប់យឺនទៅៗ។ នេះបើតាមការចុះផ្សាយរបស់ទីភ្នាក់ងារព័ត៌មានរ៉យទ័រ។
លោកស្រី គីម យូចុង ដែលជាប្អូនស្រីដ៏មានឥទ្ធិពលរបស់មេដឹកនាំកូរ៉េខាងជើង លោក គីម ជុងអ៊ុន បានព្រមានក្នុងសេចក្តីថ្លែងការណ៍ថា ទីក្រុងព្យុងយ៉ាង នឹងមើលឃើញថា វាជាការប្រកាសសង្រ្គាម ប្រសិនបើសហរដ្ឋអាមេរិកចាត់វិធានការយោធាប្រឆាំងនឹងការសាកល្បងអាវុធយុទ្ធសាស្ត្ររបស់កូរ៉េខាងជើង។
គួរគូសបញ្ជាក់ថា សហរដ្ឋអាមេរិក និងសម្ព័ន្ធមិត្តមិនដែលបាញ់ទម្លាក់មីស៊ីលផ្លោងរបស់កូរ៉េខាងជើងដែលក្រុមប្រឹក្សាសន្តិសុខអង្គការសហប្រជាជាតិហាមឃាត់នោះទេ ប៉ុន្តែបញ្ហានេះ បានទាក់ទាញការពិចារណាជាថ្មីក្រោយកូរ៉េខាងជើងស្នើថា ខ្លួននឹងបាញ់មីស៊ីលបន្ថែមទៀតលើប្រទេសជប៉ុន។
ក្នុងសេចក្ដីថ្លែងការណ៍ដដែល លោកស្រី គីម បានអះអាងជាថ្មីម្ដងទៀតថា កូរ៉េខាងជើងអាចបាញ់មីស៊ីលចូលទៅក្នុងមហាសមុទ្រប៉ាស៊ីហ្វិកបន្ថែមទៀត ព្រោះ «មហាសមុទ្រប៉ាស៊ីហ្វិក មិនមែនជាកម្មសិទ្ធិរបស់អាមេរិក ឬជប៉ុននោះទេ»។
ជុំវិញបញ្ហានេះ ក្រុមអ្នកវិភាគបាននិយាយថា ប្រសិនបើកូរ៉េខាងជើងធ្វើតាមការគំរាមកំហែងរបស់ខ្លួនក្នុងការយកមហាសមុទ្រប៉ាស៊ីហ្វិកធ្វើជាកន្លែងបាញ់គ្រាប់របស់ខ្លួន នោះនឹងធ្វើឱ្យរដ្ឋឯកោប្រដាប់ដោយនុយក្លេអ៊ែរមួយនេះមានភាពជឿនលឿនផ្នែកបច្ចេកទេស បន្ថែមពីលើការបង្ហាញពីដំណោះស្រាយយោធារបស់ខ្លួន។
ក្នុងសេចក្តីថ្លែងការណ៍ដាច់ដោយឡែកមួយផ្សេងទៀតប្រធានផ្នែកព័ត៌មានបរទេសនៅក្រសួងការបរទេសកូរ៉េខាងជើង បានចោទប្រកាន់សហរដ្ឋអាមេរិកថា «ធ្វើឱ្យស្ថានការណ៍កាន់តែធ្ងន់ធ្ងរទៅ» តាមរយៈការធ្វើសមយុទ្ធផ្លូវអាកាសរួមគ្នាដោយប្រើយន្តហោះទម្លាក់គ្រាប់បែក B-52 កាលពីថ្ងៃចន្ទ និងការរៀបចំផែនការធ្វើសមយុទ្ធយោធាអាមេរិក-កូរ៉េខាងត្បូងជាដើម។
សូមបញ្ជាក់ថា សហរដ្ឋអាមេរិកបានដាក់ពង្រាយយន្តហោះទម្លាក់គ្រាប់បែកយុទ្ធសាស្រ្ត B-52 ដើម្បីប្រើក្នុងសមយុទ្ធរួមគ្នាជាមួយយន្តហោះចម្បាំងកូរ៉េខាងត្បូងក្នុងអ្វីដែលក្រសួងការពារជាតិកូរ៉េខាងត្បូង បាននិយាយថា គឺជាការបង្ហាញកម្លាំងប្រឆាំងនឹងការគំរាមកំហែងនុយក្លេអ៊ែរ និងមីស៊ីលរបស់កូរ៉េខាងជើង ដែលហៅសមយុទ្ធរបស់អាមេរិក-កូរ៉េខាងត្បូងថា ជាសកម្មភាពត្រៀមធ្វើសង្រ្គាម៕
