រូបថតឯកសារនេះ ត្រូវបានថតនៅថ្ងៃទី ១៥ ខែកុម្ភៈ ឆ្នាំ ២០២១ ផ្ទាំងបដាដែលមានលោកស្រី អ៊ុងសាន ស៊ូជី បង្ហាញបាតុករចូលរួមក្នុងបាតុកម្មប្រឆាំងនឹងរដ្ឋប្រហារយោធានៅមុខការិយាល័យសម្ព័ន្ធជាតិដើម្បីប្រជាធិបតេយ្យ (NLD) ក្នុងទីក្រុងយ៉ាំងហ្គោន។ AFP
ប្រព័ន្ធផ្សព្វផ្សាយរដ្ឋបានឱ្យដឹងថា គណៈកម្មាធិការរៀបចំការបោះឆ្នោតដែលគ្រប់គ្រង ដោយរបបយោធាមីយ៉ាន់ម៉ាកាលពីថ្ងៃអង្គារបានប្រកាសថា គណបក្សសម្ព័ន្ធជាតិដើម្បីប្រជាធិបតេយ្យ (NLD) របស់លោកស្រី អ៊ុងសាន ស៊ូជី នឹងត្រូវបានរំលាយ ដោយសារខកខាន មិនបានចុះឈ្មោះឡើងវិញ ក្រោមច្បាប់បោះឆ្នោតថ្មីព្រាងដោយយោធា។
យោធាបានធ្វើឱ្យរដ្ឋប្រហារ ខែកុម្ភៈ ឆ្នាំ ២០២១ ត្រឹមត្រូវ ជាមួយនឹងការអះអាងដែលមិនច្បាស់លាស់នៃការក្លែងបន្លំយ៉ាងទូលំទូលាយនៅក្នុងការបោះឆ្នោតឆ្នាំ ២០២០ ដែល NLD បានឈ្នះ ដោយបញ្ចប់ការពិសោធន៍លទ្ធិប្រជាធិបតេយ្យរយៈពេល ១០ ឆ្នាំ និងធ្វើឱ្យប្រទេសនេះ ធ្លាក់ក្នុងភាពចលាចល។
នៅក្នុងខែមករា គណៈកម្មាការរៀបចំការបោះឆ្នោតបានផ្តល់ឱ្យគណបក្សនយោបាយរយៈពេល ២ ខែដើម្បីចុះឈ្មោះឡើងវិញនៅក្រោមច្បាប់បោះឆ្នោតថ្មីដ៏តឹងរឹងមួយ មុនពេលការបោះឆ្នោតថ្មីដែលខ្លួនបានសន្យាថា នឹងរៀបចំ ប៉ុន្តែដែលគូប្រជែងរបស់ខ្លួន និយាយថា នឹងមិនប្រកបដោយសេរី ឬយុត្តិធម៌។
ទូរទស្សន៍រដ្ឋ MRTV បានឱ្យដឹងថា ក្នុងចំណោមគណបក្សដែលមានស្រាប់ចំនួន ៩០ មានតែ ៥០ ប៉ុណ្ណោះ ដែលបានដាក់ពាក្យសុំចុះឈ្មោះឡើងវិញក្រោមច្បាប់ថ្មីនេះ។ ក្រៅទីនេះ នឹងត្រូវរំលាយ ចាប់ពីថ្ងៃពុធនេះ។
លោកស្រី ស៊ូជី បានបង្កើតគណបក្ស NLD ក្នុងឆ្នាំ ១៩៨៨ ហើយបានឈ្នះឆ្នោតភ្លូកទឹកភ្លូកដីនៅក្នុងការបោះឆ្នោតឆ្នាំ ១៩៩០ ដែលត្រូវបានរំលាយដោយរបបយោធា នៅពេលនោះ។
គណបក្ស NLD បានខិតខំប្រឹងប្រែងដើម្បីលទ្ធិប្រជាធិបតេយ្យនៅក្នុងប្រទេសមីយ៉ាន់ម៉ា ដែលគ្រប់គ្រងដោយយោធា ហើយក្រោយមកបានទទួលជ័យជម្នះលើគណបក្សនានាដែលគាំទ្រដោយយោធានៅក្នុងការបោះឆ្នោតនៅក្នុងឆ្នាំ ២០១៥ និង ២០២០៕
