លោកប្រធានាធិបតីអេហ្ស៊ីប អាប់ ដែល ហ្វាតា អែលស៊ីស៊ី។ AFP
ថ្ងៃទី ១ ខែឧសភា ឆ្នាំ ២០២៣ សារព័ត៌មាន AlJazeera បានរាយការណ៍ថា អ្នកឆ្លើយឆ្លងព័ត៌មានរបស់ខ្លួនម្នាក់ដែលត្រូវបានឃុំខ្លួននៅក្នុងប្រទេសអេហ្ស៊ីប តាំងពីឆ្នាំ ២០១៩ ត្រូវបានដោះលែងពីពន្ធនាគារមុនថ្ងៃកាត់ក្ដីនៅសវនាការឈានមកដល់។
អ្នកឆ្លើយឆ្លងព័ត៌មានលោក ហ៊ីសាម អាបដេល អាហ្ស៊ីស (Hisham Abdel Aziz) គឺជាអ្នកផលិតវីដេអូសម្រាប់កម្មវិធីAl Jazeera Mubasher ដែលត្រូវបានផ្តល់មូលនិធិទ្រទ្រង់ដោយប្រទេសកាតា។
យ៉ាងណាក៏ដោយអាជ្ញាធរអេហ្ស៊ីបមិនទទួលស្គាល់ការដោះលែងរូបលោកទេ ហើយក្រសួងការ បរទេសអេហ្ស៊ីប ក៏មិនបានឆ្លើយ តបភ្លាមៗចំពោះសំណើសុំការអត្ថាធិប្បាយនោះដែរ។ លោក ខាលឡេដ អែលបាលស៊ី (Khaled elBalshy) ប្រធានសហភាពអ្នកកាសែតអេហ្ស៊ីបបានឱ្យដឹងថាលោក អាបដេល អាហ្ស៊ីស ត្រូវបានដោះលែងកាលពីថ្ងៃអាទិត្យ ហើយភរិយារបស់លោកបានបង្ហោះរូបភាពរបស់លោកនៅលើបណ្ដាញសង្គម ដោយបានអរគុណព្រះជាម្ចាស់ដែលបានជួយរូបលោក។
សារព័ត៌មាន Al Jazeera បានបញ្ជាក់ឱ្យដឹងថា លោក អាបដេល អាហ្ស៊ីស ជាជនជាតិអេហ្ស៊ីបដែលមានមូលដ្ឋាននៅប្រទេសកាតាដើម្បីធ្វើការលើរឿងកិច្ចការសាធារណៈ។
លោកត្រូវបានប៉ូលិសឃាត់ខ្លួននៅអាកាសយានដ្ឋានអន្តរជាតិទីក្រុងខាយរ៉ូ (Cairo) ប្រទេសអេហ្ស៊ីបក្នុងខែមិថុនា ឆ្នាំ ២០១៩ ខណៈពេលដែលលោកកំពុងធ្វើដំណើរកម្សាន្តជាលក្ខណៈគ្រួសារ។ មនុស្សជាច្រើនបាននិយាយថា លោកត្រូវបានបាត់ខ្លួនដោយបង្ខំប្រហែលជា១ខែ មុនពេលគេឃើញលោកស្ថិតនៅក្នុងមន្ទីរឃុំឃាំង។
ចាប់តាំងពីពេលនោះមកអាជ្ញាធរបានអនុវត្តការឃុំខ្លួនបណ្ដោះអាសន្នរយៈពេល ៤៥ ថ្ងៃម្តងហើយ ម្តង ទៀតទៅលើរូបលោកអស់ជាច្រើនដងរហូតមកដល់សព្វថ្ងៃនេះ។
សូមជម្រាបដែរថា សារព័ត៌មាន Al Jazeera ត្រូវបានអាជ្ញាធរនៅទីក្រុងខាយរ៉ូកំណត់មុខសញ្ញាជាយូរយារណាស់មកហើយពោលគឺចាប់តាំងពីអេហ្ស៊ីបត្រូវបានគ្រប់គ្រងដោយពួកយោធានៅឆ្នាំ២០១៣ដឹកនាំដោយលោកឧត្តមសេនីយ៍ អាប់ដែល ហ្វាតា អែលស៊ីស៊ី (Abdel Fattah elSissi)ដែលបានឡើងកាន់តំណែងជាប្រធានាធិបតី។
គួររំឭកផងដែរថា ប្រទេសកាតាជាប្រទេសដែលធ្លាប់បានគាំទ្រអតីតប្រធានាធិបតីរបស់អេហ្ស៊ីប គឺលោក ម៉ូហាម៉េដ ម៉ូស៊ី (Mohammed Morsi)ដែលជាអ្នកកាន់សាសនាអ៊ិស្លាម និងដែលជាអ្នកជាប់ឆ្នោតក្រោយព្រឹត្តិការណ៍និទាឃរដូវនៅឆ្នាំ ២០១១ បានបញ្ចប់ទៅ។
លោក ម៉ូស៊ី គឺជាផ្នែកមួយនៃអង្គការភាតរភាពមូស្លីម (Muslim Brotherhood) ជាអង្គការអ៊ិស្លាមដែលមានគោលបំណងបង្រួបបង្រួមប្រជាជនមូស្លីមនៅទូទាំងប្រទេសផ្សេងៗគ្នាក្នុងតំបន់។ យ៉ាងណាក៏ដោយ បណ្ដាប្រទេសអារ៉ាប់នៅតំបន់ឈូងសមុទ្រមួយចំនួនបានចាត់ទុកក្រុមនេះថា ជាការគំរាមកំហែងដល់ការគ្រប់គ្រងតាមបែបប្រពៃណីរបស់ពួកគេដែលធ្លាប់តែផ្អែកលើពូជពង្សវង្សត្រកូលរបស់ពួកគេ។
ក្នុងឆ្នាំ ២០១៣ នោះផងដែរ Al Jazeera បានធ្វើការផ្សាយបន្តផ្ទាល់អំពីព្រឹត្តិការណ៍ទាមទារតវ៉ារបស់អង្គការភាតរភាពមូស្លីមដែលបានធ្វើឱ្យរដ្ឋាភិបាលយោធាខឹងសម្បាយ៉ាងខ្លាំង។ ជាលទ្ធផល អេហ្ស៊ីបបានដកហូតអាជ្ញាប័ណ្ណរបស់ Al Jazeera និងបានចុះត្រួតពិនិត្យការិយាល័យរបស់ពួកគេ ថែមទាំងបានចាប់ខ្លួនអ្នកសារព័ត៌មានជាច្រើននាក់ទៀតផង។
ក្នុងនោះអ្នកកាសែត Al Jazeera ៣ នាក់គឺលោកភីធើ ហ្រ្គេស (Peter Greste) លោក ម៉ូហាម៉េដ ហ្វាមី (Mohamed Fahmy) និងលោក បាហេ ម៉ូហាម៉េដ (Baher Mohamed) ត្រូវបានចាប់ខ្លួន និងកាត់ទោសឱ្យជាប់ពន្ធនាគាររយៈពេល ១០ឆ្នាំ ដែលបង្កឱ្យមានការរិះគន់ពីសំណាក់អន្តរជាតិយ៉ាងខ្លាំង។ ក្រោយមកពួកគេត្រូវបានដោះលែងនៅឆ្នាំ ២០១៥។
យ៉ាងណាក៏ដោយ ការដោះលែង នេះធ្វើឡើងនៅពេលដែលប្រទេសកាតា បាននិងកំពុងបង្កើនទំនាក់ទំនងការទូតឡើងវិញជាមួយប្រទេសក្នុងតំបន់។ ជាក់ស្ដែងលោក អែល ស៊ីស៊ី បានចូលរួមក្នុងកម្មវិធីបើកការប្រកួត FIFA World Cup កាលពីឆ្នាំមុននៅប្រទេសកាតា តបតាមការអញ្ជើញរបស់មេដឹកនាំប្រទេសកាតា។ សារព័ត៌មាន Al Jazeera បានឱ្យដឹងថា អ្នកកាសែតរបស់ខ្លួន ២ នាក់ទៀតនៅតែត្រូវបានឃុំខ្លួនដោយអាជ្ញាធរអេហ្ស៊ីប ពោលគឺត្រូវបានចាប់ខ្លួនអំឡុងពេលដែលពួកគេកំពុងសម្រាកលំហែកាយនៅទីនោះដូចគ្នា៕
