លោក ប្រធានាធិបតីហ្វីលីពីន លោក ហ្វឺឌីណាន់ ម៉ាកូស ជូនៀ ថ្លែងសុន្ទរកថាក្នុងអំឡុងការបង្ហាញសមត្ថ ភាពរបស់កងទ័ពជើងទឹក នៅលើកប៉ាល់កងទ័ពជើងទឹកBRP Davao del Su កាលពីថ្ងៃទី ១៩ ខែឧសភា។ AFP
ឆ្មាំឆ្នេរសមុទ្ររបស់សហរដ្ឋអាមេរិក ជប៉ុន និងហ្វីលីពីន នឹងធ្វើសមយុទ្ធដែនសមុទ្ររួមគ្នានៅសមុទ្រចិនខាងត្បូងក្នុងសប្តាហ៍នេះ ដែលជាសមយុទ្ធត្រីភាគីលើកដំបូង ខណៈមានការព្រួយបារម្ភកាន់តែខ្លាំងឡើងអំពីអំណាចរបស់ចិននៅក្នុងតំបន់។ នេះបើតាមការរាយការណ៍របស់ទីភ្នាក់ងារព័ត៌មានរ៉យទ័រ។
អ្នកនាំពាក្យឆ្មាំសមុទ្រហ្វីលីពីន លោក Armand Balilo បាននិយាយនៅថ្ងៃចន្ទ ទី២៩ ខែឧសភា ថា សមយុទ្ធកាលពីថ្ងៃទី១ ដល់ថ្ងៃទី៧ ខែមិថុនា នៅក្នុងដែនទឹកនៃខេត្ត Bataan របស់ហ្វីលីពីន គឺជាគំនិតផ្តួចផ្តើមរបស់សហរដ្ឋអាមេ រិក និងជប៉ុន ខណៈអូស្ត្រាលីនឹងចូលរួមជាអ្នកសង្កេតការណ៍។
លោក Baliloបាននិយាយថា នាវាហ្វីលីពីនចំនួន ៤គ្រឿង និង ២គ្រឿងពីសហរដ្ឋអាមេរិក និងជប៉ុន នឹងចូលរួមនៅក្នុងសមយុទ្ធ ដែលធ្វើឡើងក្នុងគោលបំណងដើម្បីកែលម្អកិច្ចសហប្រតិបត្តិការស្វែងរក និងជួយសង្គ្រោះ និងការអនុ វត្តច្បាប់។
សមយុទ្ធដែនសមុទ្ររួមនេះ ធ្វើឡើងតាមការស្នើសុំរបស់ជប៉ុន និងសហរដ្ឋអាមេរិក កាលពីខែកុម្ភៈ ពោលគឺនៅក្នុងខែដែលទីក្រុងម៉ានីល បានចោទប្រកាន់ប្រទេសចិនពីការធ្វើសកម្មភាពគឃ្លើននៅសមុទ្រចិនខាងត្បូង ដែលចិនទទូចទាមទារស្ទើរតែទាំងមូលថា ជាដែនទឹករបស់ខ្លួន។
លោក Balilo បានប្រាប់សន្និសីទសារព័ត៌មានថា៖«នេះ គឺជាសកម្មភាពធម្មតាក្នុងចំណោមភ្នាក់ងារឆ្មាំឆ្នេរសមុទ្រទាំងអស់។ វាគ្មានអ្វីខុសក្នុងការធ្វើសមយុទ្ធជាមួយសមភាគីរបស់យើងនោះទេ»។
ប្រទេសជប៉ុន អូស្ត្រាលី និងសហរដ្ឋអាមេរិក បានថ្កោលទោសជាញឹកញាប់ចំពោះការធ្វើយោធាកម្មរបស់ចិននៅសមុទ្រចិនខាងត្បូង ហើយបានព្យាយាមធ្វើទំនាក់ទំនងឱ្យជិតស្និទ្ធជាមួយហ្វីលីពីន ចាប់តាំងពីលោក ហ្វឺឌីណាន់ ម៉ាកូស ជូនៀ បានឡើងកាន់តំណែងជាប្រធានាធិបតីកាលពីឆ្នាំមុន។
គេសម្គាល់ឃើញថា ទំនាក់ទំនងហ្វីលីពីនជាមួយសហរដ្ឋអាមេរិក កាន់តែរឹងមាំឡើងៗក្រោមអាណត្តិរបស់លោក ម៉ាកូស ជាពិសេសលើកិច្ចសហប្រតិបត្តិការយោធា ខណៈប្រធានាធិបតីហ្វីលីពីនរូបនេះ ប្រកាន់ជំហរកាន់តែខ្លាំងឡើងលើការប្រព្រឹត្តរបស់ចិន រួមទាំងការបាញ់«ឡាស៊ែរកម្រិតយោធា» ដាក់នាវាផ្គត់ផ្គង់ស្បៀងរបស់កងទ័ពជើងទឹកហ្វីលីពីន កាលពីពេលកន្លងទៅ៕
