លោកស្រី Annalena Baerbock រដ្ឋមន្ត្រីការបរទេសអាល្លឺម៉ង់។ AFP
ថ្ងៃទី ៣១ ខែឧសភា ឆ្នាំ ២០២៣ ប្រទេសអាល្លឺម៉ង់បានឱ្យដឹងថា ខ្លួននឹងបិទស្ថានកុងស៊ុលរុស្ស៊ីចំនួន ៤ កន្លែងក្នុងចំណោម ៥ ស្ថានកុងស៊ុលផ្សេងទៀតដោយដកហូតអាជ្ញាប័ណ្ណរបស់ពួកគេ។ ការធ្វើបែបនេះ គឺដើម្បីជាការឆ្លើយតបទៅនឹងរុស្ស៊ី បន្ទាប់ពីរុស្ស៊ីបានសម្រេចកំណត់ចំនួនមន្ត្រីអាល្លឺម៉ង់ដែលកំពុងធ្វើការនៅក្នុងប្រទេសរុស្ស៊ីមកត្រឹមតែ ៣៥០ នាក់។
ការឆ្លើយតបរបស់អាល្លឺម៉ង់បែបនេះ បានជំរុញឱ្យទំនាក់ទំនងទ្វេភាគីរវាងប្រទេសទាំង ២ ធ្លាក់ចុះកាន់តែខ្លាំងបន្ថែមទៀត ខណៈដែលទំនាក់ទំនងរវាងប្រទេសទាំង ២ កំពុងធ្លាក់ដុនដាបស្រាប់ ពោលគឺចាប់តាំងពីការឈ្លានពានរបស់រុស្ស៊ីទៅលើទឹកដីរបស់អ៊ុយក្រែនកាលពីដើមឆ្នាំ ២០២២។ ដោយឡែក រុស្ស៊ីបានសម្ដែងការមិនពេញចិត្តចំពោះទង្វើរបស់អាល្លឺម៉ង់យ៉ាងខ្លាំង និងបានលើកឡើងថា សកម្មភាពរបស់អាល្លឺម៉ង់ គឺមានចេតនារករឿងបង្កហេតុ ហើយថា រុស្ស៊ីនឹងឆ្លើយតបវិញជាក់ជាមិនខាន។
រីឯក្រសួងការបរទេសអាល្លឺម៉ង់វិញ បានចោទប្រកាន់ទីក្រុងម៉ូស្គូថា ជាអ្នកបង្កើនភាពតានតឹងតាមរយៈការកំណត់ចំនួនមន្ត្រីអាល្លឺម៉ង់ដែលកំពុងបំពេញតួនាទីនៅរុស្ស៊ី។
អ្នកនាំពាក្យម្នាក់ បាននិយាយថា «ការសម្រេចចិត្តដែលមិនសមហេតុផលនេះ កំពុងបង្ខំឱ្យរដ្ឋាភិបាលសហព័ន្ធធ្វើការកាត់ផ្ដាច់ទំនាក់ទំនងស្ទើរគ្រប់វិស័យនៅក្នុងប្រទេសរុស្ស៊ី»។
ក្រសួងការបរទេសអាល្លឺម៉ង់ បានបញ្ជាក់ថា រដ្ឋាភិបាលរុស្ស៊ីនឹងនៅតែត្រូវបានអនុញ្ញាតឱ្យបើកដំណើរការស្ថានទូតរបស់ខ្លួននៅទីក្រុងប៊ែរឡាំងជាធម្មតា និងស្ថានកុងស៊ុលទូទៅ ១ កន្លែង ប៉ុន្តែអាល្លឺម៉ង់រំពឹងថា ស្ថានកុងស៊ុលដទៃទៀត នឹងតម្រូវឱ្យឈប់ប្រតិបត្តិការនៅចុងឆ្នាំ ២០២៣ នេះ។
គួរដឹងដែរថា ប្រទេសអាល្លឺម៉ង់ នឹងបិទស្ថានកុងស៊ុលរបស់ខ្លួនផងដែរនៅក្នុងទីក្រុងមួយចំនួននៅប្រទេសរុស្ស៊ី ក្នុងនោះរួមមានទីក្រុងកាលីនីហ្រ្កាដ (Kaliningrad) ទីក្រុងយេកាតឺរីនបឺក (Yekaterinburg) និងទីក្រុងណូវ៉ូស៊ីបឺសក៍ (Novosibirsk) ដោយទុកតែស្ថានទូតអាល្លឺម៉ង់នៅទីក្រុងម៉ូស្គូ និងស្ថានកុងស៊ុលនៅទីក្រុងផេថឺស្បឺក (Petersburg) តែប៉ុណ្ណោះ។
នៅទីក្រុងម៉ូស្គូវិញ ក្រសួងការបរទេសរុស្ស៊ី បានថ្កោលទោសការសម្រេចចិត្តរបស់អាល្លឺម៉ង់ថា «ជាជំហានឈានឆ្ពោះទៅមុខប្រកបដោយភាពសោះកក្រោះ និងមានគោលបំណងបំផ្លិចបំផ្លាញទំនាក់ទំនងទ្វេភាគីរវាងប្រទេសទាំង ២»។
ក្រសួងបានបន្ថែមថា៖ «យើងនឹងធ្វើការឆ្លើយតបវិញចំពោះសកម្មភាពរបស់ទីក្រុងប៊ែរឡាំង»។ យ៉ាងណាក៏ដោយ នៅក្នុងសេចក្តីថ្លែងការណ៍របស់ក្រសួងការបរទេសរុស្ស៊ីមិនបានផ្តល់ព័ត៌មានលម្អិតថានឹងឆ្លើយតបយ៉ាងណានោះទេ។
គួរបញ្ជាក់ថា អាល្លឺម៉ង់គឺជាប្រទេសដែលធ្លាប់ធ្វើការនាំចូលប្រេង និងឧស្ម័នដ៏ធំបំផុតរបស់រុស្ស៊ី ប៉ុន្តែពេលនេះ ប្រទេសទាំង ២ បានបែកបាក់ប្រេះឆា ពោលគឺចាប់តាំងពីរុស្ស៊ីធ្វើការឈ្លានពានអ៊ុយក្រែនក្នុងខែកុម្ភៈ ឆ្នាំ ២០២២ ហើយលោកខាងលិច រួមទាំងអាល្លឺម៉ង់ផងនោះ បានឆ្លើយតបដោយការដាក់ទណ្ឌកម្មសេដ្ឋកិច្ចទៅលើរុស្ស៊ី និងបានផ្គត់ផ្គង់គ្រឿងសព្វាវុធទៅឱ្យអ៊ុយក្រែន។
មិនយូរប៉ុន្មានខាងមុខនេះប្រទេសអាល្លឺម៉ង់នឹងដកបុគ្គលិកជាច្រើននាក់ដែលកំពុងធ្វើការនៅស្ថានបេសកកម្មការទូតរបស់ខ្លួននៅក្នុងប្រទេសរុស្ស៊ីបន្ទាប់ពីទីក្រុងម៉ូស្គូបានកំណត់មន្ត្រីអាល្លឺម៉ង់ក្នុងចំនួនជាក់លាក់ក្នុងការដែលអាចនៅបន្តធ្វើការនៅក្នុងប្រទេសរុស្ស៊ីបាន៕
