ឧទ្ធម្ភាគចក្រចិនហោះកាត់សមុទ្រជិតតៃវ៉ាន់ នាពេលកន្លងទៅ។ រូបថត AFP
រដ្ឋបាលសុវត្ថិភាពដែនសមុទ្ររបស់ប្រទេសមហាយក្សចិន បាននិយាយនៅក្នុងសេចក្តីថ្លែងការណ៍មួយដែលបានចេញផ្សាយនៅលើវេបសាយរបស់ខ្លួនកាលពីថ្ងៃអង្គារថា កងទ័ពជើងទឹកនៃកងទ័ពរំដោះប្រជាជនចិន កំពុងធ្វើសមយុទ្ធបាញ់គ្រាប់ពិតនៅក្នុងតំបន់ជាច្រើននៃសមុទ្រចិនខាងកើត។
សេចក្តីថ្លែងការណ៍នោះ បានចង្អុលបង្ហាញពីការសម្របសម្រួលនៅតំបន់ដែលបានបិទសម្រាប់ការធ្វើនាវាចរណ៍ ដែលជាពិសេសរួមមានតំបន់ភាគ ខាងជើងនៃកោះតៃវ៉ាន់ក្បែរទីក្រុង Taizhou នៃខេត្ត Zhejiang។
សមយុទ្ធនៅទីនោះបានចាប់ផ្តើមនៅម៉ោង ១១ និង ៣០ ព្រឹក ម៉ោងក្នុងស្រុក ត្រូវនឹងម៉ោង ០៣:៣០ ម៉ោងសកល ហើយគ្រោងនឹងបញ្ចប់នៅម៉ោង ៣:00 រសៀល ត្រូវនឹងម៉ោង 0៧:០០ ដែលជាម៉ោងសកល។
សមយុទ្ធជាច្រើនទៀត បានចាប់ផ្តើមនៅតំបន់ដដែល នៅព្រឹកព្រលឹម ហើយនឹងមានរហូតដល់ម៉ោង ៩ យប់ ម៉ោងក្នុងស្រុកត្រូវនឹងម៉ោង ១៣:០០ ម៉ោងសកល។
ប្រទេសចិនតែងតែធ្វើសមយុទ្ធនៅតាមឆ្នេរសមុទ្ររបស់ខ្លួន ជាពិសេសនៅសមុទ្រចិនខាងកើត ដែលប្រឈមជាមួយកោះតៃវ៉ាន់ដែលជាដែនដីគ្រប់គ្រងដោយខ្លួនឯងតាមបែបលទ្ធិប្រជាធិបតេយ្យ មិនរណបទីក្រុងប៉េកាំង និងរក្សាភាពជាដៃគូដ៏ជិតស្និទ្ធជាមួយសហរដ្ឋអាមេរិក។
របាយការណ៍អំពីការកើនឡើងនៃកម្លាំងយោធារបស់ចិននៅក្នុងតំបន់ បានចាប់ផ្តើមបន្ទាប់ពីកិច្ចប្រជុំ កាលពីថ្ងៃទី ៥ ខែមេសា រវាងប្រធានសភាតំណាងរាស្ត្រអាមេរិក លោក Kevin McCarthy និងលោកស្រី Tsai Ingwen ប្រធានាធិបតីតៃវ៉ាន់។
ក្រសួងការបរទេសចិន បានចេញការតវ៉ាដោយលើកឡើងថា ជំនួបនោះ បានរំលោភលើគោលការណ៍ចិនតែ ១។
នៅថ្ងៃទី ៨-១០ ខែមេសា បញ្ជាការ Theater ភាគខាងកើតរបស់ប្រទេសចិន បានធ្វើសមយុទ្ធនៅច្រកសមុទ្រតៃវ៉ាន់ និងក្នុងដែនទឹកភាគខាងជើង ខាងត្បូង និងខាងកើតនៃកោះដ៏រសើបនេះ។ សមយុទ្ធនេះ ត្រូវបានកំណត់ដាក់ឈ្មោះថា «ដាវរួម» ហើយការល្បាតជុំវិញកោះតៃវ៉ាន់ ត្រូវបានធ្វើឡើងស្របគ្នាផងដែរ។
តៃវ៉ាន់ត្រូវបានគ្រប់គ្រងដោយរដ្ឋបាលមូលដ្ឋានរបស់ខ្លួន តាំងពីឆ្នាំ ១៩៤៩ ប៉ុន្តែទីក្រុងប៉េកាំងបានចាត់ទុកកោះនេះជាខេត្តមួយក្នុងចំណោមខេត្តរបស់ខ្លួន។ រដ្ឋាភិបាលអាមេរិកនៅតែរក្សាទំនាក់ទំនងល្អ និងនៅតែជាអ្នកផ្គត់ផ្គង់សព្វាវុធនិងឧបករណ៍យោធាទំនើបៗដល់តៃវ៉ាន់៕
