តំបន់សន្និធិប្រេងនៅទីក្រុង Sevastopol ក្នុងតំបន់គ្រីមាដែលអះអាងវាយប្រហារដោយដ្រូនអ៊ុយក្រែនកាលពីខែមេសា។ AFP
តាមការផ្សាយរបស់ទីភ្នាក់ងារព័ត៌មានរ៉យទ័រមានមូលដ្ឋាននៅអង់គ្លេស ក្រសួងការពារជាតិរុស្ស៊ី បានអះអាងថា កងកម្លាំងរបស់ខ្លួនបានទប់ស្គាត់អ៊ុយក្រែនពីការវាយប្រហារកំពង់ផែ នៃទីក្រុង Sevastopol នៅសមុទ្រខ្មៅ កាលពីថ្ងៃអាទិត្យ ដោយកងកម្លាំងរបស់ខ្លួនបានបំផ្លាញយន្តហោះគ្មានមនុស្សបើកចំនួន ៧ និងដ្រូនក្នុងទឹកចំនួន ២។
ក្រសួងបាននិយាយនៅលើ Telegram ថា៖«នៅព្រឹកនេះ ការប៉ុនប៉ងរបស់របបក្រុងកៀវ ដើម្បីប្រតិបត្តិការវាយប្រហារភេរវកម្មដោយយន្តហោះគ្មានមនុស្សបើកចំនួន៧និងយានក្រោមទឹកគ្មានមនុស្សបើកចំនួន២ ដែលប៉ងវាយប្រហារលើទឹកដីនៃឧបទ្វីបគ្រីមាក្បែរទីក្រុង Sevastopol ត្រូវបានរារាំង»។
ក្រសួងការពារជាតិរុស្ស៊ីបានបន្ថែមថា មិនមានអ្នករងរបួស ឬខូចខាតទេ។
វាបាននិយាយថា ដ្រូនពីរគ្រឿងត្រូវបានបាញ់ទម្លាក់នៅសមុទ្រខ្មៅនៅចម្ងាយឆ្ងាយពីឆ្នេរសមុទ្រ ខណៈពេលដែល៥ត្រូវបានស្ទាក់ចាប់ដោយកងកម្លាំងសង្គ្រាមអេឡិចត្រូនិចរបស់រុស្ស៊ី។
ក្រសួងបាននិយាយថា យាននៅក្រោមទឹកគ្មានមនុស្សបើកចំនួនពីរ (UUV) ដែលគេស្គាល់ថាជាយន្តហោះគ្មានមនុស្សបើកក្រោមទឹក ត្រូវបានរកឃើញនៅភាគខាងជើងនៃសមុទ្រខ្មៅ ហើយត្រូវបានបំផ្លាញដោយកាំភ្លើង។
មុននេះ លោក Mikhail Razvozhayev អភិបាលក្រុង Sevastopol ដែលតែងតាំងដោយទីក្រុងម៉ូស្គូ បាននិយាយនៅលើកម្មវិធីផ្ញើសារ Telegram ថា ការវាយប្រហារបានកើតឡើងលើកំពង់ផែ Sevastopol និងស្រុក Balaklava និង Khersones របស់ទីក្រុង។
ចាប់តាំងពីសង្គ្រាមផ្ទុះឡើងរវាងប្រទេសរុស្ស៊ីនិងអ៊ុយក្រែនកាលពីខែកុម្ភៈឆ្នាំ២០២២ មានការចរចាតែពីរលើកប៉ុណ្ណោះកាលពីសង្គ្រាមចាប់ផ្តើម ហើយ ក្រោយមកលទ្ធភាពនៃការចរចាបញ្ចប់សង្គ្រាមបានរលាយបាត់ ដោយសារការដាក់លក្ខខ័ណ្ឌមុនរបស់រុស្ស៊ី ខណៈដែលអ៊ុយក្រែនបង្កើនមហិច្ឆតារំំដោះតំបន់ឧបទ្វីបគ្រីមាដែលរុស្ស៊ីកាន់កាប់តាំងពីឆ្នាំ២០១៤មកវិញ៕
