ប្រធានាធិបតីហ្វីលីពីន លោក Ferdinand Marcos Jr ដែលងាកទៅរកមហាអំណាចលោកសេរីដែលមានទំនាក់ទំនងជាប្រពៃណីកន្លងមក។ AFP
ប្រទេសហ្វីលីពីន ស្វែងរកការពង្រឹងសមត្ថភាពរបស់ខ្លួនក្នុងការដោះស្រាយការគំរាមកំហែង ខណៈពេលដែលគូសបញ្ជាក់ពីតម្រូវការក្នុងការពង្រឹងទំនាក់ទំនងជាមួយសម្ព័ន្ធមិត្ត និងបន្តគោលនយោបាយការបរទេសឯករាជ្យក្នុងពេលតែមួយ ក្រោមគោលនយោបាយសន្តិសុខជាតិរយៈពេលប្រាំមួយឆ្នាំដែលបានចេញផ្សាយកាលពីថ្ងៃអង្គារ។ នេះបើយោងតាមទីភ្នាក់ងារព័ត៌មាន រ៉យទ័រ។
ហ្វីលីពីនជាដែនដីនៅអាស៊ីអាគ្នេយ៍ បានដាក់ចេញឯកសារគោលនយោបាយសន្តិសុខជាតិកម្រាស់៤៨ទំព័រ ដែលប្រធានាធិបតី Ferdinand Marcos Jr បានអនុម័តនាពេលថ្មីៗនេះ ដោយឯកសារនោះបានគូសបញ្ជាក់ពី «ការពង្រឹងការប្រកួតប្រជែងជាយុទ្ធសាស្ត្ររវាងសហរដ្ឋអាមេរិក និងចិន» និង «ការបង្កើនការប្រកួតប្រជែងក្នុងចំណោមមហាអំណាចធំៗ» ដែលរួមចំណែកដល់ «ទិដ្ឋភាពភូមិសាស្ត្រនយោបាយកាន់តែតានតឹង»។
រដ្ឋាភិបាលបាននិយាយនៅក្នុងឯកសារដែលបានបោះពុម្ពផ្សាយដោយក្រុមប្រឹក្សាសន្តិសុខជាតិដោយសំដៅទៅលើច្រកសមុទ្រតៃវ៉ាន់ថា«ការព្រួយបារម្ភចម្បងក៏ត្រូវបានគេមើលឃើញផងដែរនៅក្នុងទំនាក់ទំនងឆ្លងកាត់ច្រកសមុទ្រដែលមានសក្តានុពលក្នុងការក្លាយជាចំណុចសំខាន់នៅក្នុងតំបន់»។
«ហ្វីលីពីនព្រួយបារម្ភអំពីស្ថិរភាពសេដ្ឋកិច្ចរបស់ខ្លួន លំហូរជនភៀសខ្លួនដែលមានសក្តានុពល និងសុខុមាលភាពរបស់ប្រជាជននៅក្រៅប្រទេស»។
ទីក្រុងប៉េកាំង ដែលប្រកាសតៃវ៉ាន់ដែលគ្រប់គ្រងដោយខ្លួនឯង ជាកម្មសិទ្ធិរបស់ខ្លួននោះ បាននិងកំពុងធ្វើសមយុទ្ធយោធា នៅក្នុងដែនទឹកនៃកោះនេះ ដើម្បីទាមទារអធិបតេយ្យភាពរបស់ខ្លួន។ សហរដ្ឋអាមេរិក និងសម្ព័ន្ធមិត្តដូចជាជប៉ុនបានរិះគន់សម្ពាធបែបនេះលើតៃវ៉ាន់។
រដ្ឋាភិបាលហ្វីលីពីនបាននិយាយនៅក្នុងឯកសារថា៖«ជម្លោះយោធាណាមួយនៅក្នុងច្រកសមុទ្រតៃវ៉ាន់នឹងជះឥទ្ធិពលដោយជៀសមិនរួចពីហ្វីលីពីន ដោយសារភូមិសាស្ត្រជិតកោះតៃវ៉ាន់ទៅនឹងប្រជុំកោះហ្វីលីពីន និងវត្តមានរបស់ប្រជាជនហ្វីលីពីនជាង ១៥ម៉ឺននាក់នៅតៃវ៉ាន់»។
ផែនការនេះក៏បានគ្របដណ្តប់លើអាទិភាពសន្តិសុខស្បៀងអាហារ និងថាមពលរបស់រដ្ឋាភិបាល ហើយបានកត់សម្គាល់ថាសមុទ្រចិនខាងត្បូង «នៅតែជាផលប្រយោជន៍ជាតិចម្បង»។
ហ្វីលីពីន ដែលកំពុងមានជម្លោះជាមួយចិនលើផ្នែកនៃសមុទ្របាននិយាយថា៖ «ភាពខុសគ្នានៃការទាមទារ ... វិធីសាស្ដ្ររបស់អ្នកទាមទារក្នុងការអះអាងពីជំហររបស់ពួកគេបន្តបង្កបញ្ហាប្រឈមយុទ្ធសាស្ត្រ» ដែលបង្កគ្រោះថ្នាក់ដល់បូរណភាពទឹកដី និងសិទ្ធិរបស់ប្រជាជន។
ដើម្បីសម្រេចបាននូវសន្តិសុខថាមពល រដ្ឋាភិបាលបាននិយាយថា ខ្លួននឹងស្វែងរកការអភិវឌ្ឍទុនបំរុងនៅឯនាយសមុទ្រ រួមទាំងនៅក្នុងសមុទ្រចិនខាងត្បូង ដើម្បីជួយកាត់បន្ថយការពឹងផ្អែកលើការនាំចូល។
ទំនាក់ទំនងជាមួយចិនកាន់តែតានតឹងក្រោមប្រធានាធិបតីថ្មី លោក Marcos ខណៈហ្វីលីពីនងាកទៅរកសម្ព័ន្ធមិត្តប្រពៃណីរបស់អាមេរិក។
ហ្វីលីពីននឹងពង្រឹងសន្ធិសញ្ញាការពារទៅវិញទៅមកជាមួយសហរដ្ឋអាមេរិក រួមជាមួយនឹងយន្តការដែលមានស្រាប់ផ្សេងទៀតជាមួយដៃគូក្នុងតំបន់ ដើម្បី «សម្រេចបាននូវសមត្ថភាពការពារដែលអាចទុកចិត្តបាន»៕
