ទង់ជាតិនៃក្រុមប្រទេសប្រ៊ីកស៍។ រូបថត AFP
មេដឹកនាំនៃក្រុមប្រទេសប្រ៊ីកស៍ (BRICS) នឹងជួបប្រជុំគ្នានៅអាហ្រ្វិកខាងត្បូងនាសប្តាហ៍ក្រោយ ដើម្បីពិភាក្សាអំពីរបៀបដែលអាចបង្វែរប្លុកនេះទៅជាកម្លាំងភូមិសាស្ត្រនយោបាយ ដែលទប់ទល់នឹងឥទ្ធិពលវាតទីលើកិច្ចការពិភពលោករបស់លោកខាងលិច។ នេះបើតាមការរាយការណ៍របស់ទីភ្នាក់ងារសារព័ត៌មានរ៉យទ័រ។
កិច្ចប្រជុំកំពូលប្រ៊ីកស៍ ដែលនឹងចូលរួមដោយប្រធានាធិបតីចិន លោក ស៊ី ជិនពីង ប្រធានាធិបតីប្រេស៊ីល លោក Luiz Inacio Lula da Silva និងនាយករដ្ឋមន្ត្រីឥណ្ឌា លោក ណារិនដ្រា ម៉ូឌីក្រោមការរៀបចំទទួលរបស់អាហ្វ្រិកខាងត្បូងនេះ នឹងធ្វើឡើងចន្លោះពីថ្ងៃទី២២-២៤ ខែសីហា ខាងមុខ។
កិច្ចប្រជុំកំពូលលើកទី ១៥ នេះ ធ្វើឡើងក្រោមប្រធានបទ «ប្រ៊ីកស៍និងអាហ្វ្រិក» ដោយសង្កត់ធ្ងន់ពីរបៀបដែលប្លុកនេះ អាចកសាងទំនាក់ទំនងជាមួយទ្វីបអាហ្វ្រិកទាំងមូលកាន់តែខ្លាំងឡើង ក្លាយជារោងមហោស្រពសម្រាប់ការប្រកួតប្រជែងរវាងមហាអំណាចពិភពលោក។
យ៉ាងណាមិញ ប្រធានាធិបតីរុស្ស៊ី លោក វ្ល៉ាឌីមៀ ពូទីន ដែលប្រឈមមុខនឹងដីកាចាប់ខ្លួនពីតុលាការឧក្រិដ្ឋកម្មអន្តរជាតិជុំវិញឧក្រិដ្ឋកម្មសង្រ្គាមនៅអ៊ុយក្រែន នឹងមិនចូលរួមជាមួយមេដឹកនាំមកពីប្រទេសសមាជិកប្រ៊ីកស៍ផ្សេងទៀត ដែលរួមមានប្រេស៊ីល ឥណ្ឌា ចិន និងអាហ្វ្រិកខាងត្បូងនោះទេ។
អវត្តមានដោយផ្ទាល់របស់លោក ពូទីន កើតមានចំពេលមានការដេញដោលគ្នាអំពីថាតើប្លុកនេះគួរពង្រីកខ្លួន ដើម្បីទទួលប្រទេសកំពុងអភិវឌ្ឍន៍ជាច្រើនផ្សេងទៀតធ្វើជាសមាជិកឬយ៉ាងណា។
បើតាមរ៉យទ័រ គេមិនដឹងពីព័ត៌មានលម្អិតច្រើនអំពីអ្វីដែលក្រុមមេដឹកនាំគ្រោងនឹងពិភាក្សានោះទេ ប៉ុន្តែការពង្រីកខ្លួនរបស់ប្លុករំពឹងថានឹងជាប្រធានបទសំខាន់នៅក្នុងរបៀបវារៈនៃកិច្ចប្រជុំ ខណៈអាហ្វ្រិកខាងត្បូងបានអះអាងថា មានប្រទេសចំនួន ៤០ បានបង្ហាញចំណាប់អារម្មណ៍ក្នុងការចូលរួម ទាំងផ្លូវការ ឬក្រៅផ្លូវការដែលរួមមានទាំងអារ៉ាប៊ីសាអូឌីត អាហ្សង់ទីន និងអេហ្ស៊ីប។
គួរគូសបញ្ជាក់ថា ប្រ៊ីកស៍ ដែលរួមចំណែក១/៤នៃសេដ្ឋកិច្ចពិភពលោក ចងផ្ដុំគ្នាដោយប្រទេសដែលមានប្រព័ន្ធសេដ្ឋកិច្ចខុសៗគ្នា ប៉ុន្តែបង្រួបបង្រួមគ្នា ដើម្បីទប់ទល់នឹងអនុត្តរភាពលើកិច្ចការពិភពលោករបស់សហរដ្ឋអាមេរិក និងប្រទេសលោកខាងលិចមានៗផ្សេងទៀត។
ប្រទេសចិន ដែលស្វែងរកការពង្រីកឥទ្ធិពលភូមិសាស្ត្រនយោបាយរបស់ខ្លួន ខណៈមានជម្លោះជាមួយអាមេរិកលើបញ្ហាផ្សេងៗ ចង់ពង្រីកប្រ៊ីកស៍ឱ្យបានឆាប់រហ័សខណៈប្រេស៊ីលប្រឆាំងនឹងការពង្រីកខ្លួន ដោយបារម្ភថាវានឹងធ្វើឱ្យប្លុកចុះខ្សោយ។
ចំណែកឯរុស្ស៊ីឯនោះវិញ ត្រូវការសម្ព័ន្ធមិត្តដើម្បីទប់ទល់នឹងភាពឯកោខាងការទូត ក្រោមទណ្ឌកម្មរបស់លោកខាងលិចជុំវិញការឈ្លានពានអ៊ុយក្រែន ដែលជំរុញឱ្យប្រទេសចង់នាំយកប្រទេសថ្មីចូលជាសមាជិក ក្នុងទំនោរដូចនឹងអាហ្រិកខាងត្បូងដែរ។ ចំណែកឯឥណ្ឌាវិញ ជាប្រទេសចាក់ខ្សែកណ្ដាល៕
