រូបភាពដែលបង្ហាញពីគំនិតអភិវឌ្ឍន៍យន្តហោះចម្បាំងជំនាន់ថ្មី ដោយប្រទេសសេដ្ឋកិច្ចលំដាប់ខ្ពស់ចំនួន៣រួមគ្នាគឺ ជប៉ុន អង់គ្លេស និងអ៊ីតាលី។ រូបភាព បណ្តាញសង្គមធ្វឺតធឺ
ក្រុមហ៊ុនឧស្សាហកម្មខ្នាតយក្សរបស់ជប៉ុន អង់គ្លេសនិងអ៊ីតាលី បានឈានដល់កិច្ចព្រមព្រៀងជាមួយគ្នានៅដំណាក់ថ្មីមួយទៀត ដើម្បីរួមគ្នាផលិតយន្តចម្បាំងជំនាន់ចុងក្រោយ។
យោងតាមការចេញផ្សាយរបស់ទីភ្នាក់ងារព័ត៌មានរ៉យទ័រ ក្រុមហ៊ុន BAE Systems របស់ចក្រភពអង់គ្លេស ក្រុមហ៊ុន Mitsubishi Heavy Industries របស់ប្រទេសជប៉ុន និងក្រុមហ៊ុន Leonardo របស់ប្រទេសអ៊ីតាលី ដែលទាំងអស់នេះសុទ្ធតែជាក្រុមហ៊ុនឧស្សាហកម្មធុនធ្ងន់ខ្នាតយក្ស បានព្រមព្រៀងគ្នានូវជំហានបន្ទាប់ ដើម្បីផ្តល់នូវដំណាក់កាលគំនិតនៃយន្តហោះចម្បាំងជំនាន់ក្រោយ។
តាមការចេញផ្សាយនោះ ប្រទេសទាំងបីបានព្រមព្រៀងគ្នាក្នុងខែធ្នូ ឆ្នាំ២០២២ ដើម្បីសហការគ្នាបង្កើតយន្តហោះចម្បាំងជួរមុខកម្រិតខ្ពស់ ដើម្បីចូលបម្រើសេវាកម្មនៅពាក់កណ្តាលទសវត្សរ៍ក្រោយ។
BAE បាននិយាយថា កិច្ចព្រមព្រៀង Global Combat Air Program (GCAP) ថ្មីនឹងគាំទ្រដល់ការពិភាក្សាដើម្បីកំណត់ការរៀបចំការងារ និងតម្រូវការសមត្ថភាពសម្រាប់យន្តហោះ។
លោក Herman Claesen អ្នកដឹកនាំ GCAP របស់ BAE បាននិយាយថា «ល្បឿននៃការចូលរួមកម្រិតខ្ពស់ជាមួយដៃគូឧស្សាហកម្ម និងរដ្ឋាភិបាលនៅក្នុងប្រទេសអ៊ីតាលី និងប្រទេសជប៉ុន» ត្រូវបានរក្សាចាប់តាំងពីការចាប់ផ្តើមនៃកម្មវិធីនេះ។
BAE បាននិយាយថាប្រទេសទាំងបីនឹងធ្វើបច្ចុប្បន្នភាពអំពីវឌ្ឍនភាពនៃគម្រោងនៅឯពិព័រណ៍អាវុធអន្តរជាតិ DSEI នៅទីក្រុងឡុងដ៍ក្នុងសប្តាហ៍នេះ។
GCAP ត្រូវបានគេរំពឹងថានឹងចំណាយអស់ច្រើនពាន់លានដុល្លារ ប៉ុន្តែភាគីមិនទាន់បានបញ្ចប់ថាតើថវិកានឹងត្រូវបែងចែកយ៉ាងដូចម្តេចនោះទេ។
ក្រសួងការពារជាតិរបស់ចក្រភពអង់គ្លេសបានប្តេជ្ញាចិត្តបណ្តាក់ទុន ២ ពាន់លានផោន ដល់គម្រោងនេះ ដែលពីមុនត្រូវបានគេស្គាល់ថា ជាគម្រោង«Tempest» មុនពេលដែលប្រទេសជប៉ុន និងប្រទេសអ៊ីតាលីចូលរួម៕
