ផ្សែងអ័ព្ទនៅម្ដុំ Sydney Opera House កាលពីថ្ងៃទី ១៣ ខែកញ្ញា ឆ្នាំ ២០២៣។ រូបថត AFP
ការិយាល័យអាកាសធាតុនៃប្រទេសអូស្ត្រាលី បានឱ្យដឹងថា នាដើមនិទាឃរដូវស្ទើរទាំងស្រុងនៃភាគអាគ្នេយ៍រួមទាំងទីក្រុងស៊ីដនី នឹងប្រឈមរលកកម្តៅកាន់តែខ្លាំងដោយគេរំពឹងថា សីតុណ្ហភាពនឹងកើនឡើង ១៦ អង្សាសេ បន្ថែមពីលើសីតុណ្ហភាពជាមធ្យមនៃខែកញ្ញា។
ប្រទេសអូស្ត្រាលី កំពុងរងប៉ះពាល់នៃរលកកម្តៅដែលកំពុងកើនឡើងនៅក្នុងមួយភាគធំរបស់ប្រទេសដោយវាបានចាប់ផ្តើមតាំងពីចុងសប្តាហ៍កន្លងទៅថ្មីនេះ ហើយវាទំនងជាបន្តរហូតដល់ថ្ងៃពុធនៅទូទាំងរដ្ឋ South Australia រដ្ឋ Victoria និងរដ្ឋ New South Wales។
ការិយាល័យឧតុនិយមអូស្ត្រាលីបានឱ្យដឹងបន្ថែមថា ខ្លួនរំពឹងថាកំណត់ត្រាអាកាសធាតុដើមនិទាឃរដូវចាស់ ទំនងជាត្រូវបានបំបែកក្នុងរយៈពេលប៉ុន្មានថ្ងៃខាងមុខ និងបានហៅវាថា ជាខែកញ្ញាមិនធម្មតា។
ជាមួយគ្នានេះកាលពីថ្ងៃអាទិត្យរលកកម្តៅនេះបានធ្វើឱ្យអត្តពលិករត់ប្រណាំងនៅក្នុងកម្មវិធីម៉ារ៉ាតុងនាទីក្រុងស៊ីដនីចំនួន ២៦ នាក់ ត្រូវបានបញ្ជូនទៅមន្ទីរពេទ្យភ្លាមៗ និងចំនួនប្រមាណ ៤០ នាក់ផ្សេងទៀត ត្រូវបានព្យាបាលសង្គ្រោះបឋមក្រោមមូលហេតុអស់កម្លាំងខ្លាំងពេកដែលបង្កមកពីរលកកម្តៅ។
ការព្យាកររបស់ការិយាល័យអាកាសធាតុបានបង្ហាញថា សីតុណ្ហភាពនៅភាគខាងលិចទីក្រុងស៊ីដនី នឹងអាចឡើងដល់ ៣៦ អង្សាសេ (៩៦,៨ ហ្វារិនហៃ (៩៦,៨ F) នៅថ្ងៃចន្ទនេះ ហើយវានឹងអាចធ្លាក់ចុះដល់ប្រហែល ២២ អង្សាសេ (71 F) វិញនៅថ្ងៃព្រហស្បតិ៍។
លើសពីនេះទៅទៀតរលកកម្តៅក៏បានបង្កើនហានិភ័យនៃអគ្គិភ័យនៅក្នុងតំបន់ជាច្រើនដែលងាយរងគ្រោះដែលបង្កមកពីអគ្គិភ័យ ខណៈអាជ្ញាធរអូស្ត្រាលីក៏បានជំរុញឱ្យពលរដ្ឋតាមតំបន់ត្រៀមខ្លួនសម្រាប់ភ្លើងឆេះព្រៃផងដែរ៕
