ប្រធានាធិបតីអ៊ុយក្រែន លោក ហ្សេឡេនស្គី នាពេលកន្លងទៅ។ រូបថត AFP
មន្ត្រីរុស្ស៊ីបានព្រមានជាថ្មីទៀតពីមហន្តរាយនុយក្លេអ៊ែរ ដែលឆ្លើយតបទៅនឹងសុន្ទរកថារបស់ប្រធានាធិបតីអ៊ុយក្រែន លោក វ៉ូឡូឌីមៀរ ហ្សេឡេនស្គី ទៅកាន់មហាសន្និបាតអង្គការសហប្រជាជាតិ ដោយចោទប្រកាន់មេដឹកនាំអ៊ុយក្រែនថាបានត្រៀមខ្លួនប្រើប្រាស់អាវុធនុយក្លេអ៊ែរ។
យោងតាមទីភ្នាក់ងារព័ត៌មានរុស្ស៊ី TASS លោក Rodion Miroshnik មន្ត្រីជាន់ខ្ពស់នៃក្រសួងការបរទេសរុស្ស៊ីបាននិយាយថា លោក ហ្សេឡេនស្គីបានរំឭកអំពីការប្រើប្រាស់អាវុធនុយក្លេអ៊ែរនៅក្នុងសុន្ទរកថារបស់អង្គការសហប្រជាជាតិ។
លោក Rodion Miroshnik បានចោទប្រកាន់ប្រធានាធិបតីអ៊ុយក្រែនថា បានត្រៀមខ្លួនរួចជាស្រេចទៅហើយក្នុងការប្រើប្រាស់អាវុធនុយក្លេអ៊ែរ បើសិនជាលោកមានអាវុធប្រភេទនេះនៅក្នុងអំណាចរបស់លោក។ លោកនិយាយថា៖ «នៅក្នុងពាក្យសម្ដីរបស់គាត់ សុន្ទរកថារបស់មេដឹកនាំអ៊ុយក្រែនបានបន្សល់ទុកការងឿងឆ្ងល់អំពីការត្រៀមខ្លួនរបស់គាត់ក្នុងការប្រើប្រាស់អាវុធនុយក្លេអ៊ែរ»។
លោកបន្ថែម៖ «បើគ្មានអនុស្សរណៈនៃទីក្រុង Budapest និងការប្រគល់អាវុធនុយក្លេអ៊ែររបស់កៀវទៅឱ្យរុស្ស៊ីទេ ពិភពលោកនឹងរកឃើញខ្លួនឯងនៅគែមនៃគ្រោះមហន្តរាយនុយក្លេអ៊ែរ ឬនឹងត្រូវប្រឈមមុខនឹងផលវិបាករបស់វារួចហើយ»។
យោងតាមខ្លឹមសារដើមដែលដកស្រង់ផ្សាយនៅសន្និបាតអង្គការសហប្រជាជាតិ លោក ហ្សេឡេនស្គី បានថ្លែងថា៖ «សាលនេះបានឃើញសង្គ្រាមជាច្រើន ប៉ុន្តែមិនមែនជាអ្នកការពារសកម្មប្រឆាំងនឹងការឈ្លានពាននោះទេ។ ខណៈពេលដែលសង្គ្រាមលោកលើកក្រោយត្រូវបានគេមើលឃើញថា ជាសង្គ្រាមនុយក្លេអ៊ែរជម្លោះរវាងរដ្ឋ និងរដ្ឋស្ថិតនៅលើផ្លូវហាយវេទៅរកសង្គ្រាមនុយក្លេអ៊ែរ»៕
