![](https://pppkhmer.sgp1.digitaloceanspaces.com/image/main/field/image/000_9q26yf.jpg)
អ្នកវិទ្យាសាស្រ្តជប៉ុន កំពុងពិនិត្យក្នុងមន្ទីរពិសោធន៍។ AFP
ថ្មីៗនេះ ក្រុមអ្នកស្រាវជ្រាវនៅក្នុងប្រទេសជប៉ុន បានបញ្ជាក់ថាមីក្រូប្លាស្ទិក មានវត្តមាននៅក្នុងពពក និងថាពពួកមីក្រូប្លាស្ទិកទាំងនោះ ទំនងជាប៉ះពាល់ដល់អាកាសធាតុតាមរបៀបមួយបែប ដែលគេមិនទាន់អាចយល់ច្បាស់នៅឡើយ។
នៅក្នុងការសិក្សាមួយដែលត្រូវបានចេញផ្សាយនៅក្នុង Environmental Chemistry Letters បានរៀបរាប់ឱ្យដឹងថា អ្នកវិទ្យាសាស្ត្រមួយក្រុមបានឡើងភ្នំ Fuji និង Mount Oyama ដើម្បីប្រមូលទឹកពីអ័ព្ទ ដែលគ្របដណ្តប់លើកំពូលភ្នំទាំងនោះ បន្ទាប់មកពួកគេបានបញ្ចូលបច្ចេកទេសរូបភាពកម្រិតខ្ពស់ទៅនឹងគំរូ ដើម្បីកំណត់លក្ខណៈរូបវន្ត និងគីមីនៃវត្ថុទាំងនោះ។
ជាលទ្ធផលក្រុមអ្នកវិទ្យាសាស្ត្រកំណត់បានប្រភេទប៉ូលីម៊ែរចំនួន ៩ ប្រភេទខុសៗគ្នា និងកៅស៊ូមួយប្រភេទនៅក្នុងមីក្រូប្លាស្ទីកក្នុងខ្យល់ ដែលមានទំហំចាប់ពី ៧,១ ដល់ ៩៤,៦ មីក្រូម៉ែត្រ។ លើសពីនេះក្នុងមួយលីត្រនៃទឹកពីអ័ព្ទមាន ៦,៧ ទៅ ១៣,៩ បំណែកនៃប្លាស្ទិក។
អ្វីដែលសំខាន់ជាងនេះទៅទៀត «hydrophilic» ឬពពួកប៉ូលីម៊ែរមានច្រើនក្រៃលែងដែលនេះបង្ហាញថា ភាគល្អិតទាំងនេះបានដើរតួនាទីយ៉ាងសំខាន់ក្នុងការបង្កើតពពកយ៉ាងឆាប់រហ័សនិងប្រព័ន្ធអាកាសធាតុ។
អ្នកដឹកនាំផ្នែកនិពន្ធលោក Hiroshi Okochi នៃសាកលវិទ្យាល័យ Waseda បានព្រមាននៅក្នុងសេចក្តីថ្លែងការណ៍មួយ កាលពីថ្ងៃពុធថា៖ «ប្រសិនបើបញ្ហានៃការបំពុលបរិយាកាសដោយប្លាស្ទិក មិនត្រូវបានដោះស្រាយដោយសកម្មទេការប្រែប្រួលអាកាសធាតុ និងហានិភ័យនៃប្រព័ន្ធអេកូឡូស៊ីអាចក្លាយជាការពិតដែលបណ្តាលឱ្យមានការខូចខាតបរិស្ថានដែលមិនអាចត្រឡប់ក្រោយបានហើយវានឹងកាន់ធ្ងន់ធ្ងរខ្លាំងនាពេលអនាគត»។
មីក្រូប្លាស្ទិក ត្រូវបានកំណត់ថាជាភាគល្អិតប្លាស្ទិកក្រោម ៥ មីលីម៉ែត្រដែលកើតចេញពីកាកសំណល់ឧស្សាហកម្មវាយនភ័ណ្ឌសំបកកង់រថយន្តសំយោគផលិតផលថែរក្សាស្បែកនិងច្រើនទៀត។
គួររំឭកថាបំណែកមីក្រូប្លាស្ទិកតូចៗទាំងនេះធ្លាប់ត្រូវបានគេរកឃើញនៅក្នុងសាច់ត្រីដែលរស់នៅតំបន់ជ្រៅបំផុតនៃមហាសមុទ្រលាយឡំជាមួយទឹកកកសមុទ្រអាកទិកនិងគ្របដណ្តប់ព្រិលនៅលើភ្នំ Pyrenees រវាងប្រទេសបារាំងនិងអេស្ប៉ាញ។
គួរជម្រាបដែរថាមកទល់ពេលនេះបើតាមភស្តុតាងថ្មីៗ សារធាតុមីក្រូប្លាស្ទិកអាចបង្កផលប៉ះពាល់ជាច្រើនលើសុខភាពបេះដូងនិងសួតក៏ដូចជាជំងឺមហារីកនិប៉ះពាល់យ៉ាងធំធេងដល់បរិស្ថាន៕