នាយករដ្ឋមន្ត្រីថៃ លោក សេដ្ឋា ថាវីស៊ីន ដែលទើបឡើងកាន់តំណែងជាង១ខែ។ AFP
ករណីបាញ់កាំភ្លើង នៅតាមទីសាធារណៈបានកើតឡើងជារឿយៗ នៅក្នុងប្រទេសថៃ ហើយករណីទាំងនេះ បានធ្វើឱ្យប៉ះពាល់ដល់អាយុជីវិតផងដែរ។ ដោយឡែកបញ្ហានៅពីក្រោយការបាញ់រះទាំងនោះភាគច្រើនបង្កចេញពីបញ្ហាសុខភាពផ្លូវចិត្តនិងការប្រើប្រាស់គ្រឿងញៀន។
ជាក់ស្ដែង ករណីក្មេងប្រុសអាយុ១៤ឆ្នាំម្នាក់ ដែលបានប្រើប្រាស់កាំភ្លើងនៅក្នុងផ្សារទំនើបមួយកន្លែង នៅប្រទេសថៃ គឺត្រូវបានប៉ូលិសសន្និដ្ឋានថារូបគេមានជំងឺផ្លូវចិត្ត។ បើទោះជាយ៉ាងនេះក្ដី រហូតមកដល់ពេលនេះមិនទាន់មានការបញ្ជាក់ជាផ្លូវការណាមួយពីប៉ូលិសថៃនៅឡើយទេប៉ុន្តែអ្វីដែលសាធារណៈជនបានដឹងគឺក្មេងប្រុសរូបនេះបានដើរចូលទៅក្នុងផ្សារទំនើប Siam Paragon ដោយកាន់កាំភ្លើងកែច្នៃមួយ និងបានបាញ់សម្លាប់មនុស្ស២នាក់ ហើយធ្វើឱ្យមនុស្ស៥នាក់ទៀតរងរបួស។
បន្ទាប់ពីករណីនេះបានកើតឡើងមន្ត្រីរដ្ឋាភិបាលបានថ្លែងនៅក្នុងសន្និសីទកាលពីថ្ងៃពុធម្សិលមិញដោយបានប្ដេជ្ញាក្នុងការរឹតបន្តឹងសន្តិសុខជាពិសេសត្រួតពិនិត្យទៅលើច្បាប់នៃការកាន់កាប់កាំភ្លើង។
សម្រាប់ប្រជាជាតិថៃច្បាស់ជាចាំមិនភ្លេចនោះទេអំពីករណីអតីតប៉ូលិសម្នាក់ចូលទៅបាញ់កាំភ្លើងរះនៅក្នុងសាលារៀនដោយបានសម្លាប់មនុស្សចំនួន ៣៦នាក់ ក្នុងនោះមានកុមារ ២២នាក់ កាលពីជិតមួយឆ្នាំមុន។
នៅក្នុងឆ្នាំ ២០២០ ឯណោះវិញ ទាហានម្នាក់ដែលប្រដាប់ដោយកាំភ្លើងបានធ្វើសកម្មភាពបាញ់រះខេត្តក្នុង Nakhon Ratchasima ដោយបានសម្លាប់មនុស្ស ២៩ នាក់ និងរបួសជាង ៥០នាក់ក្នុងរយៈពេលត្រឹមតែ ១៧ ម៉ោង។
នៅឆ្នាំ ២០២២ បុរសឈ្មោះ PhisitRaphitphan បានបាញ់សម្លាប់បុរសម្នាក់ក្នុងចំណោម ៤នាក់ ដែលព្យាយាមអុកឡុកហាងរបស់ខ្លួន ។ ក្រោយហេតុការណ៍នេះស្ត្រីជាម្ចាស់ហាងមាសម្នាក់ទៀតនៅខេត្តសុងក្លាបានបង្ហោះរូបភាពខ្លួនតាមអនឡាញដោយកាន់កាំភ្លើងខ្លីមួយដើមនៅក្នុងហាង។ រូបភាពនេះត្រូវបានប្រជាជនថៃចែករំលែកព្រោងព្រាតលើបណ្ដាញសង្គមនិងត្រូវបានគេជឿថាវាអាចជាគំរូមួយដល់ប្រជាជនថៃ ក្នុងការប្រែក្លាយផ្នត់គំនិតនៃការកាន់កាប់កាំភ្លើងទៅជារឿងសាមញ្ញ។
ករណីទាំងអស់នេះបានបង្ហាញពីភាពទូលំទូលាយនៃការប្រើប្រាស់កាំភ្លើងនៅប្រទេសថៃហើយវាត្រូវការឆន្ទៈនយោបាយដើម្បីដោះស្រាយបញ្ហារុំារ៉ៃមួយនេះ។
យ៉ាងណាមិញកាលពីខែមីនាឆ្នាំ២០២៣ អតីតគណៈរដ្ឋមន្ត្រីរបស់ប្រទេសថៃបានអនុម័តលើច្បាប់រឹតបន្តឹងកាំភ្លើងដោយសម្រេចផ្តល់ការលើកលែងទោសរយៈពេល ១៨០ថ្ងៃដល់ជនដែលព្រមប្រគល់អាវុធមិនបានចុះបញ្ជីរបស់ពួកគេ។ ប៉ុន្តែក៏គ្មានអ្វីកើតឡើងនោះដែរព្រោះសភាត្រូវបានរំលាយនៅប៉ុន្មានថ្ងៃក្រោយមកដើម្បីរៀបចំការបោះឆ្នោតថ្មី។
គួរឱ្យដឹងថាអ្នកដែលបានដាក់ពាក្យសុំអាជ្ញាប័ណ្ណកាំភ្លើងនៅប្រទេសថៃមិនមានកាលបរិច្ឆេទផុតកំណត់ប្រើប្រាស់ និងមិនចាំបាច់ឆ្លងកាត់ការត្រួតពិនិត្យលម្អិតអំពីប្រវត្តិអំពើហិង្សាក្នុងគ្រួសារនោះទេ។
តាមរយៈច្បាប់ធូររលុងនៃការប្រើប្រាស់កាំភ្លើងបែបនេះគេអាចជួញដូរកាំភ្លើងដោយសេរីតាមអ៊ីនធឺណិតក្នុងតម្លៃពី ៤០០០ បាត ទៅ ៥០០០ បាត (១០៨ ទៅ ១៣៥ ដុល្លារអាមេរិក)។
យោងតាមការប៉ាន់ប្រមាណរបស់អង្គការ gunpolicy.org ជនស៊ីវិលនៅក្នុងប្រទេសថៃកាន់កាំភ្លើងច្រើនជាង ៧.២ លានដើមក្នុងឆ្នាំ ២០២១ ក្នុងនោះ ១,២ លាននាក់មិនបានចុះបញ្ជីនិងប្រើប្រាស់ដោយខុសច្បាប់។ ក្នុងឆ្នាំ ២០១៩ មនុស្ស ១,២៩២ នាក់ត្រូវបានសម្លាប់ដោយអំពើហិង្សាបង្កចេញពីការប្រើប្រាស់កាំភ្លើង៕
