ប្រជាជនមីយ៉ាន់ម៉ាចេញមកគាំទ្រអោយមានការដោះលែងលោកស្រី Aung San Suu Kyi កាលពីឆ្នាំ ២០១៩។ រូបថត AFP
ប្រព័ន្ធផ្សព្វផ្សាយក្នុងស្រុកមីយ៉ាន់ម៉ាបានរាយការណ៍ថា តុលាការកំពូលមីយ៉ាន់ម៉ាបានច្រានចោលបណ្ដឹងឧទ្ធរណ៍របស់លោកស្រី អ៊ុងសាន ស៊ូជី ដែលប្រឆាំងនឹងការកាត់ទោសឱ្យលោកស្រីជាប់ពន្ធនាគារពីបទអំពើពុករលួយចំនួន ៦ ករណី។ នេះបើតាមការចុះផ្សាយបន្តរបស់ទីភ្នាក់ងារសារព័ត៌មានរ៉យទ័ររបស់អង់គ្លេស។
លោកស្រី ស៊ូជី ដែលជាប់ឃុំខ្លួនចាប់តាំងពីយោធាបានផ្តួលរំលំរដ្ឋាភិបាលជាប់ឆ្នោតរបស់លោកស្រីក្នុងរដ្ឋប្រហារកាលពីថ្ងៃទី ១ ខែកុម្ភៈឆ្នាំ ២០២១ មកនោះ ត្រូវប្រឈមនឹងការជាប់ពន្ធនាគាររយៈពេល ២៧ ឆ្នាំ បន្ទាប់ពីរដ្ឋាភិបាលយោធាលើកលែងទោសឱ្យ ៥ ឆ្នាំ។
លោកស្រី ស៊ូជី ដែលជាម្ចាស់មេដាយណូបែលសន្តិភាព កំពុងជាប់ទោសជាច្រើនឆ្នាំក្នុងបណ្ដឹងដែលរៀបចំឡើងដោយរបបយោធា ដោយមានបទចោទជាច្រើនរាប់ចាប់តាំងពីបទចោទក្បត់ជាតិ និងអំពើពុករលួយជាដើម ប៉ុន្តែទោះជាបែបនេះក្តី លោកស្រីតែងបានបដិសេធ «ការប្រព្រឹត្តខុស»។
ជុំវិញការច្រានចោលបណ្ដឹងឧទ្ធរណ៍របស់លោកស្រី ស៊ូជី រដ្ឋាភិបាលយោធាមីយ៉ាន់ម៉ា មិនទាន់ចេញប្រតិកម្មយ៉ាងណានៅឡើយទេ។
មីយ៉ាន់ម៉ាធ្លាក់ចូលទៅក្នុងភាពចលាចលសង្គមជាថ្មី ចាប់តាំងពីរដ្ឋប្រហារបានកើតឡើង ដែលបង្កបានជាចលនាតស៊ូប្រឆាំង និងការបង្ក្រាបពីក្រុមយោធាផ្សេងៗ ដោយបន្សល់ទុកនូវការចាប់ខ្លួន និងការសម្លាប់ជនស៊ីវិលរាប់លាននាក់។
រដ្ឋាភិបាលក្រៅប្រទេសជាច្រើន រួមទាំងនៅអាស៊ាន បានអំពាវនាវឱ្យមានការដោះលែងលោកស្រី អ៊ុនសាន ស៊ូជី ដោយឥតលក្ខខណ្ឌរួមជាមួយនឹងអ្នកទោសនយោបាយរាប់ពាន់នាក់ផ្សេងទៀត ប៉ុន្តែរបបយោធាមីយ៉ាន់ម៉ាមិនបានអើពើនឹងការអំពាវនាវទាំងនោះឡើយ។
ការច្រានចោលបណ្ដឹងឧទ្ធរណ៍លើកនេះ បានធ្វើឡើងបន្ទាប់ពីតុលាការដដែលបានច្រានចោលបណ្តឹងឧទ្ធរណ៍ចំនួន៥របស់លោកស្រី ស៊ូជី កាលពីខែសីហា ដោយបណ្ដឹងទាំងនោះរាប់បញ្ចូលទាំងបទចោទរួមមាន ការនាំចូល និងកាន់កាប់អេកូមដោយខុសច្បាប់ ការបះបោរ និងការរំលោភលើការរឹតបន្តឹងកូវីដ ១៩ ជាដើម។
កាលពីដើមខែសីហាផងដែរ រដ្ឋាភិបាលយោធាមីយ៉ាន់ម៉ា បានផ្តល់ការលើកលែងទោសមួយចំនួនដល់លោកស្រី ស៊ូជី ដែលបន្ថយទោសចំនួន ៥ ឆ្នាំ។ ប៉ុន្តែទង្វើនេះ នៅតែរងការរិះគន់ថា គ្មានន័យអ្វីទាំងអស់។
រដ្ឋាភិបាលយោធាមីយ៉ាន់ម៉ាក៏បានប្រកាសពន្យារច្បាប់ដាក់ប្រទេសក្នុងគ្រាអាសន្នម្តងហើយម្តងទៀតដើម្បីគេចចេញពីការរៀបចំការបោះឆ្នោតឡើងវិញដែលខ្លួនបានសន្យា៕
