រដ្ឋមន្ត្រីការបរទេសអ៊ីរ៉ង់ លោក Hossein Amir-Abdollahian បានព្រមានទុកជាមុនពីលទ្ធភាពវាយប្រហារអ៊ីស្រាអែល។ AFP
អ៊ីរ៉ង់បានព្រមានកាលពីថ្ងៃចន្ទ អំពីលទ្ធភាពនៃ «ចំណាត់ការទុកជាមុន» ប្រឆាំងនឹងអ៊ីស្រាអែលក្នុងរយៈពេល «ប៉ុន្មានម៉ោងខាងមុខ» ខណៈអ៊ីស្រាអែលត្រៀមខ្លួនដើម្បីចូលវាយលុកដោយផ្ទាល់នៅតំបន់ហ្គាហ្សា។ នេះបើតាមការរាយការណ៍របស់ទីភ្នាក់ងារសារព័ត៌មាន AFP។
ការលើកឡើងបែបនេះ ធ្វើឡើងបន្ទាប់ពីទីក្រុងតេអេរ៉ង់បានព្រមានម្តងហើយម្តងទៀតថា ការលុកលុយដោយផ្ទាល់នៅលើតំបន់ហ្គាហ្សា នឹងរងការឆ្លើយតបពីកងប្រដាប់អាវុធតស៊ូផ្សេងៗទៀត ដែលការណ៍នេះជំរុញឱ្យមានការភ័យខ្លាចថា ជម្លោះអ៊ីស្រាអែល និងហាម៉ាស់នឹងរីករាលដាលក្នុងតំបន់។
រដ្ឋមន្ត្រីការបរទេសអ៊ីរ៉ង់ លោកHossein Amir-Abdollahian បាននិយាយនៅក្នុងការផ្សាយផ្ទាល់មួយទៅកាន់ទូរទស្សន៍រដ្ឋអ៊ីរ៉ង់ថា៖ «លទ្ធភាពនៃចំណាត់ការទុកជាមុនដោយទ័ពតស៊ូ រំពឹងទុកថានឹងធ្វើឡើងក្នុងរយៈពេលប៉ុន្មានម៉ោងខាងមុខនេះ»។ លោកមិនបានបញ្ជាក់ព័ត៌មានលម្អិតស្ដីពីចំណាត់ការបែបណានោះទេ។
នៅព្រឹកថ្ងៃចន្ទទី១៦ ខែតុលា ផងដែរ មន្ត្រីការទូត និងប្រធានាធិបតីកំពូលរបស់អ៊ីរ៉ង់ លោក EbrahimRaisi បាននិយាយថាវាអស់ពេលវេលាក្នុងការឈានទៅរកដំណោះស្រាយនយោបាយហើយ និងបានព្រមានប្រឆាំងនឹងការរាលដាលនៃសង្រ្គាមអ៊ីស្រាអែល-ក្រុមហាម៉ាស់ ទៅកាន់ក្រុមកងទ័ពប្រដាប់អាវុធផ្សេងទៀត។
លោក Amir-Abdollahianដដែល បាននិយាយនៅថ្ងៃចន្ទទៀតថា៖«មេដឹកនាំក្រុមតស៊ូនឹងមិនអនុញ្ញាតឱ្យអ៊ីស្រាអែលធ្វើអ្វីគ្រប់យ៉ាងតាមតែចិត្តរបស់ខ្លួននៅក្នុងតំបន់ហ្គាហ្សានោះទេ។ លោកបន្ថែមថា៖ «ប្រសិនបើយើងមិនការពារហ្គាហ្សានៅថ្ងៃនេះទេ ថ្ងៃស្អែក យើងត្រូវតែការពារប្រឆាំងនឹងការទម្លាក់គ្រាប់បែកលើមន្ទីរពេទ្យកុមារក្នុងប្រទេសរបស់យើង»។
អ៊ីស្រាអែលបានប្រកាសសង្រ្គាមលើក្រុមហាម៉ាស់របស់ប៉ាឡេស្ទីន១ថ្ងៃបន្ទាប់ពីក្រុមសកម្មប្រយុទ្ធមួយនេះទម្លុះព្រំដែនយោធាពីហ្គាហ្សា បើកការវាយប្រហារលើអ៊ីស្រាអែលកាលពីថ្ងៃទី៧ ខែតុលា ហើយបានសម្លាប់មនុស្សជាង ១ ៤០០ នាក់ ដែលភាគច្រើនជាជនស៊ីវិល គិតមកត្រឹមពេលនេះ។ អ៊ីស្រាអែលបានឆ្លើយតបវិញ ដោយការវាយលុកលើតំបន់ហ្គាហ្សាស្ទ្រីប រួមទាំងការទម្លាក់គ្រាប់បែក និងផ្លោងគ្រាប់ឥតឈប់ឈរ ដោយសម្លាប់មនុស្សជាង ២ ៧០០ នាក់ ដែលភាគច្រើនជាប្រជាជនប៉ាឡេស្ទីនសាមញ្ញដូចគ្នា។
កន្លងមក អ៊ីរ៉ង់បានអបអរការវាយប្រហាររបស់ក្រុមហាម៉ាស់ ប៉ុន្តែបានទទូចថា ខ្លួនមិនជាប់ពាក់ព័ន្ធនោះឡើយ។ យ៉ាងណាមិញ ការព្រមានពីចំណាត់ការរបស់អ៊ីរ៉ង់កាលពីថ្ងៃចន្ទ ធ្វើឡើងចំពេលដែលអ៊ីស្រាអែលត្រៀមខ្លួនចូលលុកលុយតំបន់ហ្គាហ្សា ដើម្បីបោកសម្អាតក្រុមហាម៉ាស់ ដែលបង្កជាការភ័យខ្លាច ថានឹងធ្វើឱ្យជនស៊ីវិលស្លាប់កាន់តែច្រើន។
ការព្រមានដដែល ក៏កើតឡើងផងដែរ ចំពេលសហរដ្ឋអាមេរិកបានលើកឡើងពីការព្រួយបារម្ភថា ជម្លោះនឹងរីករាលដាលពីក្នុងតំបន់ ដោយក្រុមហេសប៊ូឡាហ៍របស់ប្រទេសលីបង់ បន្ថែមធ្វើការវាយប្រហារអ៊ីស្រាអែលពីភាគខាងជើង ក៏ដូចជាអ៊ីរ៉ង់នឹងលូកដៃចូលជម្លោះ។
ក្រុមហេសប៊ូឡាហ៍ ក៏ធ្វើការវាយប្រហារអ៊ីស្រាអែលផងដែរ ដោយនិយាយថា ជាការបង្ហាញការគាំទ្រចំពោះក្រុមហាម៉ាស់ ដែលសុទ្ធសឹងតែជាក្រុមទទួលបានការគាំទ្រពីអ៊ីរ៉ង់ដូចគ្នា៕
